上集：https://post.shikoto.com/posts/137852-長生不死之後（上）

於是，我決定自殺。
我用盡我僅餘嘅錢，買咗一張機票，去外國著名嘅自殺森林。
聽講果度風景優美，好多人喺果度自殺。
點知由上機驗證件開始，我就受到「特別關注」。
「伯伯，你都呢個年紀，一個人旅行嘅？你啲仔女呢？」
「死咗。」我答得好坦誠，無加特別哀傷嘅語氣，人生嘅野，唔係你死先就佢死架啦。
但就算係咁，機場嘅人員都對我特別照顧，仲通知埋外國嘅機場。

結果，我由外國落機果一刻，就有個義工跟住我。
我本來想飲啲烈酒壯膽，再去自殺，但個義工話飲酒唔健康。
好，唔飲酒，我直接講去自殺森林。
雖然個義工好猶豫，但我堅持話要「睇下風景」，佢都肯搵人車我去。

我已經打定主意，一落車，就衝入去森林，義工亦唔會再搵到我。

點知，一落車，望住茂密嘅森林，我突然覺得......隻腳有少少痕。
一拉高褲管，就見到有條蟲喺我小腿度爬。
「啊！」我成個跳起，慘叫一聲，義工折騰半日，先幫我搞掂條蟲。
出面已經有蟲，森林裡面咪更多蟲？
大家要明白，人嘅缺點，係唔會因為年紀大而改變。
我係一個細膽嘅男人，老咗，只會變成細膽嘅阿伯。
睇黎自殺呢條路，真係唔岩我。

我又借錢又籌錢，先有錢買機票番屋企。
唔通我嘅人生，要咁樣苟延殘喘落去，連麥樂雞都食唔起？
點知有一日落街，樓下個掃地阿嬸話我知，我紅咗。
原來，當日我喺自殺森林外俾蟲咬，咬到跳黎跳去，慘叫連連，個司機就拎起手機拍片擺上網，稱我為「最有活力的人瑞」，點擊率爆晒。

我即刻問人借電腦，上網睇，先發現網上全部都係對我嘅讚揚。
通常有人「一夕爆紅」果陣，總有啲前女友舊同學出黎爆黑材料，但由於年齡限制（佢地死晒），呢啲事無發生喺我身上。
網民只係見到我嘅優點，長命，於是一面倒咁讚我。

我大大方方咁留言承認我嘅身份，開始有好多保健產品搵我做代言。
我唔明，所有人都知，我110歲先開始受到關注，
即係話，我之前無用過啲保健品，唔係因為食保健品而長命。
但係，大家又接受喎。
睇黎啲美容院廣告，搵出名靚女嘅明星黎做，都唔係無道理。

我知道，我嘅優勢會一路延續落去，只要我唔死，代言就會愈黎愈多。
估唔到，我一個平凡男人，到老反而大放異彩。
人生，只要堅持，就一定有成果。
如果你無辦法做一個出色嘅人，咁就努力做一個出色嘅人瑞！
唔死，就係最大嘅優點。

－完－