大家好，我叫陳伯，今年103歲，我懷疑自己有長生不死嘅超能力。
點解係懷疑？呢件事就要從我40歲講起。
話說我當年都係一個普通男人，番工放工，平平淡淡。
有一次喺條街度，扶咗個盲嘅阿婆過馬路，佢好感激咁話：「你咁好心，我就賜你長生不死嘅超能力啦。」
我暗嘆一口氣，原來個阿婆唔止盲，仲有精神病，真係可憐。

嗱，件事咁就完咗，無後續，我亦無再見過個阿婆。
如果咁就可以長生不死，世界上最長命嘅動物應該係導盲犬。
不過，假如個阿婆講嘅係其他超能力，例如「打麻將鋪鋪都贏」，咁我可能真係會打兩圈試下。
問題係，長生不死呢件事，唔會係「一道金光射進我的體內，我虎軀一震，感受到長生不死的力量」，
而係......喺一個悠閒嘅下午，溫暖嘅陽光，照射住我滿臉嘅皺紋，我突然意識到：點解我仲未死嘅？

其實103歲又唔算好長命，踏入「人瑞」門檻無幾耐啫。
問題係，我不嬲都唔太注重健康，飲下酒食下快餐，唔做運動又無早睡早起，

而且回顧前半生，無殺人放火又無做大慈善家，扶過阿婆過馬路，但又辜負過幾個女人，長命都似乎唔係「善有善報」。
所以，當啲七八十歲嘅後生仔問我「養生之道」果陣，成件事就好尷尬。
「陳伯，你平時午餐通常食咩架？」
「麥樂雞。」
「下，原來食麥樂雞可以長命？我要話畀老婆知先。」

呢啲都係小問題，最大嘅問題係，錢。
無論做咩退休保障，大概都會預計下自己有幾長命。
六十歲退休，預八十歲死，筆錢要夠用廿年；九十歲，要夠用三十年。
一百歲......可能少部份極有危機意識嘅人會預到一百歲啦，但我估無人準備到一百一十歲掛？
保險經紀都唔會講：「陳伯，如果你好似千年烏龜咁長命......」

所以當我啲錢用晒，再發現自己仲未死，並且無要死嘅跡象，問題就嚴重啦。
依加我靠住生果金，加埋個孫補貼少少，先勉強生活到。

不過，我個孫都成六十歲，我每次問佢攞錢，都唔太好意思。
而更大嘅問題係，唔死還唔死，病痛係照黎架。
我就無咩嚴重疾病，只係年紀大機器壞，呢度痛果度痛，啲即時痛苦無得唔醫架嘛，於是又多一筆支出。
生活痛苦，又無咩娛樂，
想做下壞男人，同前度女友搞曖昧，都只可以去佢地個墳上注香。

去到110歲果陣，我個孫都退咗休。
仲做緊野嘅，係我個曾孫。
印象中，我當年都只係抱過佢一兩次，我點好意思問佢攞錢？
同埋到呢個年紀，我已經開始確認，自己真係長生不死。
長貧難顧，過多四五十年，唔通我仲要問我個曾曾曾孫攞錢？
要佢同老婆講「我要入錢畀我阿爺個阿爺個阿爸」？

唉，到呢個年紀，我都睇化晒，見到靚女都有心無力，何必再拖累後生仔？
於是，我決定自殺。

待續...