上集:https://post.shikoto.com/posts/137426-殭屍唔易做(上)

阿伯聽到都好同情我:「被逼背井離鄉係幾慘嘅,見你唔係出黎作惡,我就放你一馬啦。」
我眼前一亮:「救人救到底,不如你借埋錢畀我做首期。」
阿伯退後兩步:「你諗多咗,我自己都係住劏房咋。」
我唔係好信:「大師你一眼就睇得出我嘅身份,道法高深,應該財源滾滾。」
幾百年前我都去過啲道觀,有啲道士明明無真才實學,都收到唔少香油錢,肚滿腸肥。
「唉,地少人多,魎魅魍魑都少咗,都無乜人要捉鬼啦。」阿伯大吐苦水:「我只好幫人算下命,但依加又塔羅又星座,五花八門,要脫穎而出,就要谷紅自己,出書上電視。你睇下我呢副尊容,似會紅架咩?咪喺廟街同人爭生意。」

阿伯又問我:「生意愈黎愈難做啦,咁你呢,你有咩打算?」
我撓撓頭:「搵份工儲首期,唔去日本,經紀話,廿年就會買到樓,時間長啲,我都等得起嘅。」
「傻仔黎,等你儲咗廿年,到時樓價再升,你點儲都追唔上。就算樓價唔升,呢廿年你住邊?要交租咪一樣儲唔到錢。」阿伯又問:「同埋你識做咩工?」

我靈機一觸,我喺野外狩獵幾百年,獵人獵動物,身手絕對好過電視果啲明星。「我可以拍功夫片!我有睇果個......葉問,我覺得我好打過佢。」
阿伯翻白眼:「甄子丹咩樣,你咩樣?你個樣好似遭遇車禍被火燒完再被雷劈中咁,做有錢人保鏢,人地都嫌你失禮。」
我唯有講:「咁我可以做其他工,由低做起,廿年唔得咪三十年。」
「依加做文員都要識一堆程式,做保安要有證書。」
我自尊心大受打擊,作為一個殭屍,我只係想買樓啫,真係咁難?
阿伯嘆氣:「見你咁陰公,你跟我搵食啦。」
「我可以做到乜野?」
阿伯意味深長咁笑一笑:「做番你嘅老本行,殭屍。」

從此,我就同阿伯組成咗「捉殭屍團隊」,

即係我「扮」殭屍,半夜爬入有錢人嘅花園,跳黎跳去,跳番三五七晚,到佢地惶惶不可終日,阿伯就出現,話佢地屋企陰氣重,收錢驅殭屍。
唔係講笑,工作輕鬆之餘,真係搵到份糧架,夠我買下肉食。
到阿伯百年歸老,我就身兼兩職,做埋驅殭屍果個角色。
有時啲客問我,點解塊臉會搞成咁,
我會答:「想當年,我同隻千年殭屍搏鬥,打到天昏地暗日月無光,終於消滅咗佢,我都被屍毒毀容。但我一啲都無後悔,至少我為人類除一大害......」

終於有一日,我儲夠首期!
過咗咁多年,我「故鄉」啲樓已經起好咗,我滿心歡喜咁揀定個單位。
點知,我都係買唔到樓,因為職業殭屍同職業道士,都係無入息證明嘅,過唔到壓力測試,就無得按揭。
即係話,我要儲夠樓價嘅100%,先可以買到樓。
到果一日,樓價會去到咩地方?我都唔知。
唉,呢個年代,做人做殭屍都唔容易啊。

-完-