呢個年代,搵食真係好艱難。
我喺度住咗三百年,計起黎,已經有幾十年無吸過人血。
住喺呢度嘅人愈黎愈少,得番村口有幾間鐵皮屋,住咗幾個阿婆。
我唔止無吸佢地血,仲同佢地關係幾好,殭屍都要社交架。
我就成日去馬婆婆屋企睇電視,之前《我和殭屍有個約會》我仲晚晚追,我好鍾意馬小玲。

唔吸人血,得閒捉隻小動物黎食下,都無乜問題嘅。
但唔知係咪污染太嚴重,野生動物都愈黎愈少,殭屍雖然唔會餓死,但肚餓嘅感覺都唔好受。
我有時忍唔住,就去馬婆婆屋企痴餐,唉,堂堂一隻壯年殭屍,要做「啃老族」,我都覺得好尷尬。

但係呢一排,好多人喺我地盤出出入入,又度呢樣又度果樣咁。
趁太陽落咗山,果班人仲未走,我就去打探下發生咩事。
「呢區要發展啦,興建新市鎮,起樓啊。」
我呆一呆,我住咗幾百年,真係唔想搬,

不過諗諗下,做一隻跟時代發展嘅殭屍,住高樓大廈,其實都唔錯,仲可以去街市買肉食。
我問果班人:「我住呢度嘅,你地起完樓,我有無得繼續住架?」
其中一個人哈哈大笑:「你有錢買樓,就邊度都有得你住。」
另一個人好心解釋:「你可以搵房屋署安排清拆安置,比你上公屋啊,只要你住果度有居民登記......」
佢解釋咗一大輪,問題係,我瞓棺材嘅,邊度有登記呢?

我去搵馬婆婆,婆婆話佢都要搬啦,叫我好好照顧自己,最好買層樓,成家立室。
成家立室我就唔諗啦,我又無況天佑咁靚仔,邊有人會想同我約會,
但我真係唔捨得呢個地方,一於等佢地起好樓,我買番個單位。
好彩我練咗兩百年,已經唔使跳下跳下,可以好似人類咁行路,只係個樣恐怖啲,啲皮膚爛晒,混入人羣應該無問題。
咁多年黎,馬婆婆都以為,我係一個毀咗容,所以離羣獨居嘅可憐人。

有咗目標,第二晚,我就決定出城打聽下。
我心入面已經計劃好,第時買咗層樓,就唔要床,喺屋入面擺番幾個棺材,第日認識咗新嘅殭屍朋友,仲可以招呼佢地。

我行咗入一間地產鋪,講咗我嘅要求,經紀話:「樓都未起好,邊有得賣。不過果頭我都知,大概兩萬蚊呎,二百呎就要四百萬。」
「二百呎、四百萬即係幾多?」我無乜概念。
經紀拎咗張相出黎:「二百呎大概係咁大啦。」
我望一望,嘩,連我個棺材都擺唔落。
經紀見到我嘅表情,加上我衣衫襤褸,佢不屑咁笑一笑:「嫌細?要四百萬丫,如果你一個月賺一萬,唔去日本旅行,大概十幾廿年就會儲夠首期。」

作為一隻幾百歲嘅殭屍,廿年本身唔係好長,
但如果你屋企俾人霸咗,要廿年後先有地方住,就真係好長。
離開地產鋪之後,我喺條街度漫無目的咁行,思考自己嘅未來。
我唔使著新衫、唔會病,連野都可以唔食,點解都生活得咁艱難?

「咄!妖孽居然敢光明正大咁出現?等我替天行道!」一個阿伯突然跳出黎,佢睇得出我係殭屍,仲拎咗把桃木劍出黎。
「你殺啦。」我心灰意冷,已經懶得反抗。
阿伯呆一呆,反而放低把桃木劍,問:「你唔係出黎吸人血?」
「我黎買樓架。」我指住後面間地產鋪:「但我買唔起......」我不禁悲從中來,仲流咗幾滴眼淚,講晒我嘅遭遇出黎。

下集:https://post.shikoto.com/posts/137661-殭屍唔易做(下)