前幾日，約咗好耐無見嘅設計師朋友A食飯，只見佢垂頭喪氣，不時長嘆一聲。追問之下，原來佢湊緊個超級麻煩客，整日茶飯不思，幾杯酒落肚，就開始盡訴心中情。
朋友A任職廣告公司，客戶要求朝令夕改係常事，朝早話要現代風，下晝就打嚟轉做復古風，呢啲都見怪不怪。但呢個閪客經常喺下晝四、五點打電話嚟，第二朝十點就要收到個design。辛辛苦苦OT爆肝搞掂喇，隻email send出去唔夠五分鐘，又一個電話打嚟瞬間ban咗個design，要求交過第二個「更impressive」、「更加眼前一亮」嘅，但又講唔出原本個design邊度唔好。如是者，朋友A過咗一個星期通宵生活，交咗差唔多廿個design（每次要交多幾個options比閪客揀），終於改得七七八八，見到曙光時，閪客下晝打嚟話：「依家老細話要行第二個風格，之前嗰啲太普通喇，你地聽朝重新比過啲design我地啦！」一星期嘅努力就咁付諸東流；最攞命嘅係，又要再loop一次不斷交design嘅無間地獄。
朋友A呷一啖酒，搖搖酒杯：「入得呢行就預咗㗎喇，個客話乜就乜㗎啦，食得鹹魚抵得渴。不過屌，鹹魚都無得食。」據佢所講，最失望嘅係，個客根本無尊重設計呢個行業。有次，佢根據個客嘅要求，設計咗一個簡約風封面。一交個design出去，個客就打嚟大發雷霆：「就咁得嗰幾條線，我都識畫啦，唔該你地諗清楚先交貨！」但實際上，當然唔止幾條線咁簡單，要考慮配色、角度、密度，背後嘅功夫尤如水底下嘅冰山。
讀設計時，會講意念、講個人風格，以為人人都係大師；但現實中，設計師只係個客一件任勞任怨嘅工具。大師，有幾多人可以做到？
