事實上係香港地打風有假放嘅人其實好撚幸福。當你地係好爽皮係屋企到睇電影，打機睇ＡＶ個時候，街外就有一班人硬食緊個風。
消防，當差，救護，醫護，清潔，飲食，交通等等等等，由其我有幾個做消防同救護嘅朋友，我更加知道佢地有幾撚憎打風。
我都試過返兩份打風都要返嘅工：飲食，同自己生意。
飲食就唔撚使講啦，一打風唔知點解你賣垃圾都可以變得好好生意，更何況個陣我做個間直頭係區內數一數二嘅餐廳，一到八號風外面排隊嘅人仲多撚過排公屋，個陣不知幾想叫老闆立即加價，以減人流。
人客多，但返工嘅人少，我個陣都唔撚明白點解佢地有個咁嘅機制。一到打風，住得遠嘅同事有權射波，叫我呢啲係樓下返工嘅人係幾咁難受呢。
如是者，每次打風我都有種做到仆街嘅信念先可以捱得過，不過到後起碼我有錢賺先丫。
但個陣做自己生意，就仆街多幾錢重。
一打風，生意無得做，自己準備好嘅嘢又要再搞過，租金又蝕鳩埋，一個唔好彩個場有咩依郁，自己又要返去隨時準備。
個陣一見到打風，我燒哂香咁拜個風球，同用盡念力求李氏力場保我一命！（所以個陣力場我都有份發功架！）
畢竟依家我返Office，已經唔使再捱呢種痛苦，但大家係到哂命嘅同時都要照顧下打風都仲要返工嘅朋友。
嗌少次麥麥送同Pizza，咪撚懶有型咁落街飲茶，自己煮個公仔麵；最重要，咪柒下柒下去睇風睇浪，你死好啦，咪搞到啲人要救你而受傷！
最後祝大家安全，同埋屋企網絡無問題啦～
