是咁的，你叫查良鏞，喺個90廢青，喺明報度做編輯。你好鍾意寫嘢，之前寫過篇《阿麗絲漫遊記》，贏過青年文學奬。
好多朋友都讚你寫嘢叻，不過都係你上司中肯。
「好呀，寫嘢叻！寫嘢叻咪終需乞食囉。學下啲youtuber 同語錄page 啦，今日邊有人睇千字文㗎。我要hit rate 呀屌你！」
打擊更令我堅強。你走咗去連登高登出故，寫你最擅長嘅武俠小說。
一本小說入面集合詩詞、歷史、熱血、政治、愛情，同武術元素，真係諗起都想睇同興奮。
你嘅處女作叫《書劍恩仇錄》，故仔係講清朝乾隆年間，反清幫會紅花會點樣同朝廷對抗，混合歷史同武俠。一定紅一定爆！
經過七日連載，正評數字維持係9，仲有17個負評。
「可唔可以快啲入正題，個主角仲未出現？」好嘅故仔要慢慢鋪排，前面其實好多伏筆，建立緊人物性格，睇落去好正㗎，爸打。
「仲未救到奔雷手文泰來？快啦，加甜啦一係。」仲有五回就救到，古時啲人冇咁隨便，下個故考慮下。要繼續追。
「堅係悶。咩叫烏鞘嶺口拚鬼俠 赤套渡頭扼官軍。不如樓主試下用口語寫。」但係角色入面得十三當家蔣四根係廣東人，唔想破壞設定。下個故先。
「巴打，支持呀！最鍾意武俠小說。」多謝，得你咁講。
無聲無息，個故完咗，正評得12，你喊得慘過陳家洛聽到香香公主死咗。
你再接再厲，之後寫咗《碧血劍》。明朝公主crossover 華山派弟子，又有魏國公徐達府建文帝寶藏可以爭奪，夠哂刺激。
今次反應仲冷淡。巴打唔係唔睇好你，係睇你唔到。你單機寫到金蛇郎君出場就棄故了。你仲諗住出書等TVB 拍劇，心諗金蛇郎君搵江華做就Fit 哂啦。
你不停反思。睇返同期出道嘅老死倪匡，佢寫咗本《那天清晨，我喺IFC搭咗架有入無出嘅𨋢》，已經紅到發紫，本書誠品賣到斷貨。
古龍巴打本《多情政客無情政》，講立會議員去蘭桂坊食女，夠奇情，又係銷量頭三甲。
再睇講故台啲熱門故。《我係干諾道中出女神》，以及《頂！日出康城有喪屍》，兩個故都正評過千。
你終於明白到寫小說嘅真締。原來好嘅故事唔需要描寫人性、唔需要借古諷今、唔需要講求文學修養、唔需要角色立體，亦唔需要咩營養同深層意義。
只要夠怪夠爆夠甜夠快夠juicy 就有人睇。大家都慣咗速食，文要短，圖要靚。喺FB 同IG 熏陶下，慢慢思考同細味文字嘅深意呢樣嘢漸漸得返傻仔先會做。
一星期後，你將原本寫好嘅《射雕英雄傳》大改編，分三集推出。標題如下：
【重甜】我和七師父的禁室培慾
【限制級】 蒙古女仔獵食心得
【震撼甜】 全靠我條女，我做咗武林高手
你一夜爆紅，讀者暴增。你知道寫甜故唔能夠吸納其他女性或者學生讀者。於是你推出愛情語錄系列，開始拍打機片。
一年後，你FB專頁人數破十萬人，過住寫廣告文，投資炒股嘅生活，收入算幾好。
以下係你得意嘅作品：
分開，是因為性格不合嗎？
分開，是因為時間不對嗎？
分開，是因為對象錯配嗎？
分開，是因為不夠愛而已。
-Mr Kam 語錄
「又嚟睇金哥開台啦！今日要介紹嘅Game 係……」你知道每個人成功背後都付出咗好大努力，花咗好多心機。所以你照舊鍾意睇倪匡啲科幻故，照舊正評哂講故台嘅屍故，間中偷睇爆機兄弟拎靈感。
然後呢？你自己鍾意寫嘅嘢呢？武俠呢？又話為國為民，俠之大者？又話文字可以提升人嘅修養同價值？
背棄了理想，誰人都可以。幾時開始like 數同錢變成你真正著重嘅嘢？
你開始好羨慕喬靖夫。佢冇輸呀，佢做到自己想做嘅嘢。你呢？
或者係另一個平行時空，你成功寫咗十五本武俠小說，仲寫咗副對聯紀念呢件事。副對聯係咁嘅：
「飛雪連天射白鹿 笑書神俠倚碧鴛」
或者係另一個平行時空，你有好多讀者，佢地好鍾意睇武俠小說，仲開咗個金庸館，睇你啲手稿，一齊讚嘆你嘅才華。
或者係另一個平行時空，你啲小說改編埋做劇集，仲有個靚女李一桐因為飾演《射雕英雄傳》女主角黃蓉而爆紅。你製造咗一個有血有肉嘅角色，因而成就咗其他人。
或者係另一個平行時空，大家都會識欣賞講歷史、講文化，同歌頌俠義嘅文章，唔會怕睇一啲有深度嘅長文。
或者……
圖片出處: 《射雕英雄傳2017》劇照
