(先此聲明，呢篇嘢純粹個人意見，冇嚴謹論證，冇有力數據，唔鍾意嘅撳上一頁走先就可以)
呢度講嘅「粵語主題曲」，指嘅係日本/歐美之動畫及特攝嘅主題曲。曾經，係我細個嗰陣仲有，而且都幾流行。相比而家搵啲唔出名嘅歌手唱，以前嘅大台算係會喺呢方面做功夫，都會請吓啲比較紅嘅歌手唱。我嘅年代，可以話係「粵語主題曲」臨終前嘅時刻，都仲會有個兒歌金曲頒獎典禮，象徵式頒個獎噉。呢個獎冇頒幾耐，我都冇乜印象。
既然式微咗咁耐，點解仲要攞出嚟講呢？事關妖台播嘅動畫，某幾套係有粵語主題曲嘅。(其實只不過係我睇一拳超人聽到有咋嘛)而呢幾首主題曲亦都真係唔錯喎！當然啦，我所指嘅唔錯，係指係同其他動畫特攝粵語主題曲比較，一拳超人嘅粵語主題曲的確係好啲，但佢依然有須要改進嘅地方。
喺呢個年頭，仲夠膽出粵語主題曲，已經係一件幾值得欣賞嘅事。喂，而家講緊唔係冇人理，係一定會畀人鬧喎。唔止係話你難聽，啲詞柒咁簡單，係直頭叫你唔好再出。
當然啦，我唔係話叫人唔好批評，話晒有批評先有進步。但好多時，啲人淨係話柒、難聽，邊到難聽點解難聽通通唔講，咁點改？成日話捍衛粵語，捍衛本土文化，但又想粵語配音粵語主題曲收，噉你到底想點先？
（其實講咁耐，純粹想講之後會有個講下粵語動畫主題曲嘅系列。不過隨時爛尾，恕不另行通知。）（都冇人睇㗎啦屌）
