上集:https://post.shikoto.com/posts/118619-點算,啲喪屍俾人食晒(上)

原來,人肚餓果陣,真係乜都會食。
周街都可以聽到廣告語:「生食又得,熟食又得,新鮮喪屍等緊你!」
政府推出電視節目「麥太煮喪屍」,教大家煎炒煮炸喪屍嘅方法。
不過,好多人認為,都係生食最新鮮。

有一日,有朋友send咗條片畀我,話呢條片網上瘋傳,問我呢個係咪阿貓。
阿貓仲在生?我好興奮咁打開條片,片名係「如何捕食喪屍」。
片中四個人一隊,一個負責做誘餌,阿貓傻更更咁張開口,就搵石頭塞住佢個嘴,然後四個一齊撳住佢,活生生......食咗阿貓。
字幕仲有標示,話做誘餌果個最危險,可以食最鮮美嘅臉頰肉。

果條片,我睇咗七十七次,一次比一次心痛。
曾經有人話,上網睇片,最傷心嘅,係睇到女友同其他人嘅色情影片。

你有無想像過,睇住女友被人食咗?
雖然我知阿貓死咗,果個只係喪屍阿貓,但我接受唔到,佢成為「被食典範」。
我逐個留言睇,個個都讚條片拍得清晰,仲有人話,女喪屍好似好食啲。
我忍唔住留言:「全人類瘋狂捕食喪屍,有無諗過,喪屍本來都係人?」
一堆人反駁我:「喪屍食人,點解人唔可以食喪屍?」
因為喪屍無理智無人性,而人......算啦,邊個話人類好有人性。

等到喪屍被捕食得七七八八,政府恢復糧食供應,
人類唔再以喪屍為主食,但大家已經品嘗過喪屍嘅美味,
加上政府推出廣告,話食喪屍可以壯陽養顏,

大家趨之若鶩,喪屍變成高價食物,一屍難求。
有養殖場偷偷繁殖喪屍,囚禁一隻好好味喪屍,捉人畀佢咬,再賣去黑市,一本萬利。

野生喪屍數目逐漸減少,直至絕種,
人類成功解決喪屍危機,但網上哀聲一片:「點算,啲喪屍俾人食晒」、「邊度有黑市喪屍賣?我阿媽就黎生日,想畀佢補一補」......
政府雷厲風行,關晒喪屍養殖場,但據我所知,喪屍病毒仍然存在,
政府偷偷用「喪屍病毒+好好味病毒」處決死囚,之後,隻好好味喪屍,當然變成高官富戶嘅美味佳餚。

至於研究所主管,就順利拎咗諾貝爾獎。
佢嘅得獎感言係咁樣:
「研發『好好味病毒』,係因為我發現,
任何一種生物,只要對人類有用,就有絕種嘅危機......」

而我,研發緊另一隻喪屍病毒,一隻唔好食嘅喪屍病毒。
我終於意識到,阿貓嘅仇人,唔係喪屍......

-完-