是咁的。

香港真係一個人傑地靈既地方，點解我咁講？就好似先排咁，我地有位司長就向我地顯示左一個神蹟，係咩野神蹟？佢話佢聽到上帝同佢講左D野WO。

係啊，無錯啊，就係果單。

其實我聽到呢單新聞，都真係O晒咀企左係部電視前面，隨即就話：「唔撚係啊，出到上帝呢招，妳既國家本身最多人信既係道教啊，妳唔好話係玉皇大帝同觀音菩薩，咁可能就好收科啊。」

我真係唔明，點解可以出埋上帝，係果條友當我地呢班人係傻仔，定係佢自己根本係一條硬膠。

講到呢度澄清返先，本文章係唔講政治野，只係會圍繞佢出呢招黎做一個話題，所以讀者們可以冷靜返先。

其實中國自古五千年以來，都有好多人係用神既感召做籍口……嗱，我唔係隨口講架，所有野有根有據架。

唔信？睇埋落去未知囉。

亦都麻煩紙言如果要SHARE篇文去Facebook 度係呢度就可以Cut文，謝謝。

中國係未有一個朝代統一果陣，就已經有人用神既名義做一D大事，紂王你地聽過啦，武皇伐紂都一定有聽過，所以我可以假設大家一定有聽過「封神榜」。

係啊！就係呢個咁家傳戶曉既故事啊！周武皇帶住成班神去伐紂啊！

所以你話用神黎做籍口係中國五千年歷史遺留落黎既美德……係，可能你會話呢個係人地寫出黎，係故仔，係等D人可以係榕樹頭有D故仔講下呢個空想既事。

好，咁我就再講另一個，咁好睇既神話故事你地唔接受，我就用一個好多人都知既歷史同你地講。

三國你地聽過架啦，三國之前，東漢末年發左D野你地無理由唔知掛。係啊！就係有條友叫唔知咩鬼野張角既人，拎左一本唔知咩春叫做太平要術既書整左個「太平道」，然後創左一個以黃色為主題既黃巾黨，仲打正旗號話「蒼天已死，黃天當立，歲在甲子，天下大吉」。

佢呢個創舉咁出名，你無理由唔知啊。

果陣佢又係話上天既旨意要佢揭竿起義，又算晒命話「蒼天」係指東漢，「黃天」就係指黃巾黨，而且根據五德終始說既推測，漢為火德，火生土，而土為黃色，所以所有信徒都頭上面都綁黃巾為記號，象徵要取代衰败既後漢王朝。

你睇下人地做功課做到幾足先得架，有用咩說咁，又好似整埋成條算式比你睇話你知漢朝而家唔得架拿，改掛黃啦。唔怪得前幾年有咁多人用黃遮啦。

講真，果陣佢真係令到漢朝好頭痛架，但係最後都係比漢朝搞店，點搞店？就係佢唔爭氣病親，最後病死左……如果唔係佢好有可能真係反抗到架，到時歷史就會改寫。

睇到呢到，你可能話三國離我地咁遠時間，不如講D近D，又或者係果條友係話上帝同佢講左D野，有無D歷史係關上帝事先。

有！你聽著！

清朝道光果陣，有兩個人搞左個會轟動全國，果個會叫做拜上帝會，創辦人係洪秀全同馮雲山，最後仲搞左個叫做太平天國出黎。仲話自己係天王，同上帝有親。

咁你話，呢個舉動其實已經興左成五千年，到而家仲興緊，又或者可以話果條友復古姐。

再講下呢個太平天國既情況。最後清朝仲有諗過招覽佢地，同佢地一齊抗外添啊，當然人地搵佢地做馬前卒唔通踢爆佢咩，但佢就真係用左神呢個名義又搞左一場革命……

而其實影響都好深遠下，起馬影響到仲係細佬仔既革命之父孫中山先生，佢細個果陣話過自己係洪秀全第二架。

咁佢地最後被清朝打散左之後，做D咩啊？未全部入晒黑社會囉。我講真架，唔係呃你，呃你有寶咩，果陣佢地加入左一個稱為「袍哥會」既組織，而呢個組織果陣同青幫、洪門都係三大秘密結社。

但係呢度就唔多講，因為而家都無左袍哥會。

睇到呢度，係未好佩服以前D人可以用神呢個籍口，做左咁多大事呢，但你地要睇下WO，通常佢地都係衰收尾。點解，有D野如果你真係想好好地咁做，就唔該腳踏實地，好好諗清諗楚先去馬，唔好一時一樣，唔好一個月前又話唔做，一個月後既今日又話做。一個人咁憂柔寡斷點做到大事呢。

果個人可能會話，事勢迫人佢唯有咁做，大佬大姐，其實時勢係可以你做就出黎，做為一個帶領住眾人既人，係要做就時勢，而唔係比時勢玩弄，唔駛下下見風轉陀，不過佢地都出左名興咁做，講都講到口臭。

睇左咁耐，所有讀者都知道點解會有人用神既名義去做一D野啦，通常咁既人，多數都係革命家，所以你地明白點解果條友講係神既旨意叫佢參選啦，可能佢遲下有唔知係邊度拎本聖經出黎，話第幾章第幾節度講係時侯要……

要咩？你懂的。

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus