是咁的。

適逢先前既聖誕加上元旦,呢D日子又真係好搞笑,有時可以好極端架WO,一係就見到一對對情侶係街上面怒放閃!係怒放閃啊!要加個怒字先表達到個心情!

另一面既極端,就係有D人會揀呢D日子分手架WO,真係唔明呢D人係咩野諗法,聖誕本身就係慶祝阿耶穌先生出世既日子,本身係好野硬係有D人要整衰佢既。

又或者D人好大條道理話新一年想有新既開始,咁你唔好去揀投過胎,仲刻骨銘心添啊。

呢D人搞到另一個人每次慶祝呢D節日都會心拿住拿住先安樂,人渣!

但其實只要唔係和平分手,都會成為人渣,無論係飛人果個或被飛果個,你都會突然多左呢一個新成就。

咁果D真係人渣既就抵死唔該等天收啦,但其實有好多本身係好人都會發生類似既情況,點解?你真係想知?

麻煩紙言如果Share 篇文去Facebook 時係度就cut 文,謝謝。

其實要成為呢一種人渣,首先係要先有一個女朋友或者男朋友先……唔好打我,咁我講真架WO,你無另一半又可奈分手呢係未。

如是者,你呢位另一半身邊一定要有一班好朋友,女既簡稱係好姊妹啦,男既當然叫做好兄弟。當你一失戀,呢班人就會好快咁出現係你地身邊,呢D就係友誼,佢地會不停咁陪你一齊鬧衰你既另一半,甚至係,你唔鬧衰佢,你班好朋友都會自動波上身鬧佢地。

至於會係點鬧呢?

個案一:

「妳唔駛喊得咁慘WO,佢唔揀妳係佢損失,妳大把選擇啦。」
「但佢真係好好架。」
「好咩啊,連妳生日都唔記得。」
「唔係啊,佢年年生日都有同我慶祝架。」
「但農歷生日無呢,死罪黎架呢條。」

呢幾句對話係我係某間CAFE聽過,姐係咁,其實每年農歷新年我諗好多人都唔會記得係西歷幾時,咁又點會記得各大小姐妳個農歷生日呢,除非妳屋企係用農歷既,如果係咁你另一半點都會諗辦法記住。但而家點會有人用農歷架,除左果D算命同圍村人……

所以,只要一分手既人,身邊一定出現好多創作人。

個案二:

「飲啦。」
「其實我係未應該哄返佢好?」
「哄咩啊,你同佢一齊果幾年,你就好似失左蹤咁,我地不知幾想去差館報警。」
「唔係WO,我有帶過佢出黎同你地食過飯架。」
「我記得,你做太監果晚嘛,佢成個公主格格上身咁,不停傳召你果晚啊,你成個小春子前小春子後執茶遞水咁,話佢係公主格格已經係比面左佢,因為佢已經係太后娘娘。」
「咁……」
「飲啦。」

呢次就係酒吧聽返黎既,一大班男人圍住一個哭喪咁面口既男人,起初我仲以為佢地係GAY既,聽聽下先知道原來佢地又係玩緊「佢係人渣」遊戲。好多時侯都係咁,男人總會幫D兄弟話佢個前度係公主、霸道、好似坐監咁,仲要係無期徒刑,仲要D朋友無得探監。

但佢地無諗過其實係佢地個兄弟沐浴愛河果陣,係佢重色輕友約極都約唔到囉……

所以有時我地出去出面食野既時候,當你見到一大班男既或者女既坐咗埋一齊,而中間有一個係喊咁口或者苦瓜乾口面既話,好有可能,佢地係到玩緊「佢係人渣」遊戲。

真係唔係好明,其實呢個係佢哋兩個人之間既事,點解要我地講咁多攻擊既說話呢?原因好簡單,因為其實佢地想講,但係佢地講唔出口。

咁都情有可原既,因為當你同情人分開,頭果幾日大家都會仲愛大家,其中一個人一定仲有盼望可以係返埋一齊,所以基於呢份愛,仍然可以將呢一種恨一壓住。

但係時間慢慢咁過,總有一日呢種恨會大過果一份愛,到時,「佢係人渣」呢個遊戲就會繼續及升級。

個案三:
「都唔知點解果陣我會揀呢個男人!」
「係囉!」
「又樣衰!又矮過我!有無錢!仲要有口臭既!」
「係囉!」
「係屎啦你!!!」

行動升級後本身D主攻會變為助攻,發球會變成直接得分,佢地會有幾衰講到有幾衰,就好似已經忘記左當初有幾愛果個人咁。因為,有幾多愛,就有幾多恨。

除非分手果個人真係極度人渣,又或者分手後有手尾跟,如果唔係,呢個時間通常都會維持三個月左右,點解係三個月,因為到時會無野可以再鬧,又或者講到悶自己收聲。

但當過左一排,當大家有機會撞返,兩個人見面果陣,會有咩野講?果個人係未真係好似你D姊妹講到咁衰?個女仔係未真係咁公主病?

好多人自己心中有數,當分手,雙方都必定會有責任,只係睇下邊方面大D咁解姐。無人想做人渣……除左果D真係人渣既人渣外。每個人都想係自己最愛既人眼中係最好,唔係,應該咁講,每個人都想自己係最愛既人眼中變得更好。當變成人渣果一刻,你估對方會好受咩?

鬧人同被鬧果個,一樣痛。

所以當有一日,你朋友係你面前擺左成個失戀樣,好可能,佢就係想玩「佢係人渣」遊戲,嘗試係將遊戲時間縮短,因為嬲一個人,係好辛苦既事。而且,果個人都係曾經帶比你果位兄弟,又或者姊妹,感受過愛既甜蜜,就當減輕佢地既刑期啦。

咁……你地呢?你地今世做過人地口中既人渣未?

我……就做過一次,但已經覺得好多。

-------------------------
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus