是咁的。

今期流行，流行追命林琴。

你地真係可惜而家係睇緊文，如果唔係你地就可以聽到我用美妙既聲線唱呢首歌。

近排係網上又有一個網上熱潮，而且就連同事都一路做野一路討論緊，而呢個熱潮就係某圖日劇既片尾，個主角跳果PART舞。

係啊，就係果套啊，我諗有睇過既人一定會知道我講緊邊套，但其實我自己未睇過套日劇，只係朋友以及同事果邊得知呢個網上熱潮。

其實呢一兩年都出現左好多網上熱潮，好多都係賣萌為主題，但當一呼百應後，就會變成惡搞，就算係D有意義既事，當有一個唔好既人做過之後，就會無左佢既意思，咁今日我地不如睇下呢年既網上熱潮會有D咩，而你地有做過既。

麻煩紙言如果要Share 篇野去Facebook 可以呢度Cut 文，謝謝。

2012年，一首＂江南Style＂騎馬舞席卷世界，果一年一個韓國大叔騎住隻馬走過各國，奪取左不知幾多個音樂排行榜上既第一，而且果陣網上世界已經成熟，能夠接觸呢首歌既人多不勝數。隨左紅起左呢位江南帥氣大叔外，佢搵返你一齊拍MV果位女主角都得都唔少既目光，我地香港仲有人特登拍左個香港Local 版本。甚至到而家，只要呢一首＂江南Style＂一播，所有人都會記得佢既騎馬舞步。

2013年，呢一個MV令所有人對數手指有一個新既方法，但呢個方法最好係顏值較高既人去做會好D啦。係咩歌，無錯，就係果首叫＂GWIYOMI＂。其實到而家，我都唔知道首歌係＂GWIYOMI＂定係＂KIYOMI＂，不過都唔重要啦，好多人識呢首歌都係因為片中各位賣萌既女主角。

係啊，係各位啊，呢首歌始祖係由一個綜藝節目上，一個女子團體組合隨興創作出一到六既新方式數手指，然後先變成做歌，仲要本身係無MV，果位女藝人放上網後，好多人都爭住摸彷，慢慢咁就紅左。

但呢首歌，玩到咁上下就有另一班人做，但係整體感覺上卻變左做惡搞版。唔係話唔好，而且變左另一個潮流添。

2014年，一對筷子夾住小蘋果橫空出世，夾盡全亞洲。留意，我所講既蘋果唔係某牌子電話，只係好單純既蘋果。呢首歌音樂真係係好洗腦，歌詞簡單易上口，最緊要佢配左一個搞笑既MV，好快呢首歌就係網上彈起。

其實我識呢首歌係佢紅左一排我先係朋友口中得知，講陣時我朋友仲話我，「唔識！有無搞錯！」就係咁野比佢一激，我果日就即刻上網搵，但係我睇果個版本係馬來西亞版本。睇完後我就同我朋友講，話個MV入面果三個女仔幾得WO，點知佢覆我話睇錯左其他版本，我再搵，先知呢個網上熱潮已經紅到出左幾個國家版本，星馬泰、韓國同台灣。

2014年除左小蘋果外，仲有一個網上熱潮，果一件，好多時侯你去7仔買冰會買唔到。點解，因為個個都去左買冰參與一個冰筒遊戲，係一個想幫助一種叫做ALS，即漸凍人症既人既慈善活動，呢個遊戲由一位節目主持人係節目上面點名人地參與，慢慢就一傳十，十傳百，更由一個國家傳到去另一個國家。而本身個活動既意思，都比一D只係為左玩又或者跟上潮流既人慢慢扭曲左，果D人其實都唔知個活動意義係邊，可能只係覺得得意先去做。而且呢個活動其實都有危險性，有D人出左意外，比電電親，甚至有人死亡。

本身原意係好既活動，但如果有D人只係盲跟風既話，就會慢慢咁扭曲晒成個活動既意思。

2016年，又有一首神曲出現，呢次係一個日本人，無人會諗到，蘋果、菠羅、筆，就係呢三樣好簡單既野，就可以成為一首洗腦歌，再配合埋果位大叔既舞，加上佢逗趣既樣，同＂GWIYOMI＂不少網上紅人，藝人都爭住跟風，唔同國家既人都將自己所模彷既片放上網參加埋一份。

網絡世界既成熟，可以話造就左更多既機會比有創意既人士，但係就要睇你可以點利用呢個渠道。而且仲要靠少少彩數，因為網絡可以由一件好既野變成更好，亦都可以由一樣好既野變差。

網上多左人表達自己既感受，發佈自己既作品，使每個人都競爭緊網上既存在感。到底呢一件係好事定壞事呢？

而黎緊呢個世代，又唔知會出現幾多網上熱潮會轟動世界呢？

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus