是咁的……

唔好咁大聲……

今日呢個Topic 係好秘密下，點解？因為要講政治。

我諗每個人每日返工，除左密密做等放工之外，都會參與，或間接地參與一種活動，而呢個活動，小則就係一個小圈子內，重則就係成間公司一齊玩。

咁究竟係咩野活動咁引起大家興趣？大家坐穩，無論係玩緊呢個遊戲既你，又或者不斷嘗試逃避呢個活動既你，一定都會聽個呢個活動名⋯⋯辦公室政治。

呢五個字，每個打工仔，甚至係老闆聽到都會聞風色變。

就好似我頭先咁講，呢個活動大有大玩，細有細玩，甚至係玩中再玩。有D人會樂在其中，有D人會避之則吉，所以我地今日就探討下呢個大型活動。

我出黎做野話長唔長，話短唔短，前後轉個三間公司，第一間係蚊型，人數成兩隻手數得晒。第二間就好D，要用四隻手數，第三間就大D，都要用10隻手去數。

就好似我所講，呢D野細有細玩大又大玩，你地唔好以為蚊型公司無辦公室政治，我就由我第一間公司講起。

第一間公司係一個日本公司，佢派左個人黎香港諗住起一間子公司，可能你地聽到話係日本公司咁好，一定好有前途啦……如果係大果D就係。

我入到間公司果陣，全公司加埋我有四個人，兩男兩女，而我果陣剛剛畢業咩都唔識，做錯野就一定會，我都預左比人鬧比人話，但係又估唔到佢地對我又唔錯。

但原來，一切都只係假像……

通常我果陣都好夜先收工，因為新仔做野多野錯又做得慢，唯有將勤補拙啦，所以好多時侯我都係最後一個放工。但有一日我諗住開OT開到好夜，但點知又無我想像中咁夜有得放早D，做完野我就快快手閃。

而我放工途中，就見到我D同事同老闆，原來佢地剛剛去Happy Hour，咁佢地無預我都無所謂，咁我仲有咁多野仲未做晒，但點知當我想上前叫佢地果陣，先發現佢地原來講緊我壞話。

呢一晚，就係我第一次接觸辦公室政治。原來，當我以為間公司好，無辦公室政治果陣，其實呢個活動已經靜靜雞咁玩緊而你唔知。有好多時侯發生呢D事，仲好有可能你係當中既主角。

又果一刻開始，我完住地感覺到一套電影既一段對白：

難道你以為你自己唔去理江湖！江湖就會唔搵你咩！？

我真係深深體會到人在江湖，身不由己既道理……

無錯，辦公室政治就如同江湖一樣，你一經踏上，就係一條不歸路。

當我知道左佢地係咁之後，我每日仲要帶住個臉具係佢地面前笑口迎迎，但係都頂唔到幾耐，呢份互我做左8個月就搵左一份新工，而我都無再接觸佢地。

去到第二間公司，新環境，新人事，新氣象，我係呢間公司做野，先第一次感受到咩野係團隊合作，果陣間公司分左上下兩層，而我就係下層做野，成條Team又講又笑，甚至有D到而家仲有聯絡。

正當我以為我去到一間無江湖既公司之際，個江湖又慢慢咁搵上左我……本身我呢份工要成日去個客度做野，有一排因為個客內部有D問題，所以就調左我返黎。而公司又因為經營上有少少問題，有兩層變成一層。

全公司坐係同一層做野本身無咩問題，但原來呢一層，就係江湖既地方。果陣我係下層從來不問上層既野，但聽D同事講，完來D大佬背後大家都唔妥大家。

下！？唔係掛，咁大家平時點做野架？

鬥比香蕉皮人踩，然後鬥避香蕉皮囉。我咁樣講，係未好似講到玩孖寶兄弟賽車GAME咁呢。

係真架，原來公司一直係玩緊呢一種遊戲，我好彩一入到公司就比人派左出去做野，所以先唔駛玩咋，但而家……返到公司……唯有被迫一齊玩……

因為本人係好鐘意同人合作，有咩唔岩傾到岩果種人，所以放蕉皮真係唔岩我，但係我又要係呢個GAME入面，咁點啊？唯有學下點樣避啦，但係你想像唔到既係，當一個人係有心想比蕉皮你踩，你根本係擋唔住……係啊！係無得避啊！仲會十連蕉出COMBO放到你唔識起返身。

係咁既環境下，仲點做到野，所以好多「好」既同事都走左，剩返果D既都係仲有興趣玩呢隻GAME 既人，大家鬥長命。

不過呢D惡性競爭，又點會剩係影響到D同事咁簡單，仲會影響到公司運作，就係因為呢個遊戲，呢一間公司試過幾次7折出糧，次次出糧都出唔齊。

我都做到心灰意冷，係我做完最後一個Project之後，我都Quit左份工，而我Quit左一年後，就聽到間公司最後執左。就係因為辦公室政治，令到一間公司走上絕路。

真係呢，我又諗係一句電影對白。

出得黎行，你就預左一隻腳係監房，一隻腳見閻王架啦。

我可能誇得滯，但係都近架拿。

第三間公司，呢間真係一間好公司，目標好明確，背後有大水喉所以唔駛驚無錢出糧，但係江湖總係會出現……

人多係上黎，呢個江湖出現係遲早既事，但係出現時都可以係好溫和。公司食飯以前會一齊大家出去食，但人一多就會分開左幾批。玩以前會一齊玩，但係人一多好多時侯玩果陣會約返玩開果班。

但係，咁樣都無咩唔岩，因為人夾人緣嘛。而每個人都有佢地既選擇，佢地可以選擇JOIN 呢場遊戲或者唔JOIN。最緊要既，係唔好影響到大家既工作，同埋最緊要保持一個心態，你係為左生活而打工，打工唔係你既生活，你最終要活出自己既生活，而唔係活出工作。

而且，有人既地方，就必然有政治，你點樣避都避唔到，佢撞上你只係一個時間問題。

咁，身在其中既你地，有無人係Enjoy 緊呢個遊戲？

兄弟姊妹們，共勉之。

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus