由細到大，我地都比人灌輸一種觀念—『婉轉』
細個果陣，呀爸就教落：『做人圓滑啲，第時做野會順利啲，好多野都唔洗去咁盡既』
上到小學，老師某一堂德育課又教：『凡事留一線，日後好相見』
就係咁，大家都開始變得講野婉轉左，就算要開火，落手都會避重就輕
婉轉成為左我地生活既一部份
到底咩係婉轉？筆者我又去左搵漢典。無計啦，鬼叫自己中文得Level 2咩，係差啲嫁啦
『婉轉，意指說話含蓄、典折而溫和』
俗啲咁講，就係講野轉彎抹角。我想拒絕你，但係又唔想傷到你。哇大佬，邊有咁完美既做法嫁？
自古以來，婉轉就已經存在。婉轉基本上係香港人既文化，甚至係東方人既文化
而婉轉有好多種，不過大部份都係萬變不離其中，就係令錯既人變左做自己。
『喂我都想同你去嫁，但果日咁岩有野做』
『你好好呀，係我唔好炸，你搵個第二個啦』
事實上，大家都知，錯既係你，可能你唔夠吸引啦，或者你煩左少少啦。而佢只係婉拒你，唔想你咁傷姐。
但係呢種文化到底是好是壞呢？我睇唔透
好聽啲，婉轉的確係禮貌既一種
事實上，大家都鐘意聽好聽既說話，所以啲無料既擦鞋仔上位先會咁快
難聽啲，婉轉就係假，係糖衣
婉轉恐怕只係令自己良心好過啲既做法
你以為咁樣做佢會無咁傷，事實上佢只會更加傷
因為你比既係一種假希望，唔會發生既可能
最怕聽既人好似我咁蠢，聽唔明你係拒絕緊佢，繼續嘗試，浪費時間。
其實有時，做人直接啲，未嘗唔係好事呀
傷係重啲，但一定會有好番既一日
總好過繼續食慢性毒藥，唔知幾時先醒，到時搞到人地傷得入心入肺，好似黃鐘澤咁就唔好啦
其實，咁多廢話，都係果一句啦
我好蠢 請你唔好咁婉轉
