我將會得罪好多女人，好多香港女人。
（人來～護駕）

剛過去的大阪之旅，我同麥仔都有去到著名景點－清水寺
清水寺一公里外已經見到好多人著左和服
不同既係，去清水寺果一日落住時大時細既雨..

當我已經被撇雨搞到個人濕哂好炆既時候，
我內心都不禁佩服身邊著住和服既女人們
果對木屐喺雨天行斜路，難度分十分。
更佩服係佢身邊果個無一齊著和服既男朋友
要扶住個著木屐行到拐下拐下既女朋友，
另一隻手擔住遮，拎住相機，拎埋女朋友手袋（著和服只可以拎小袋子其他袋唔襯又唔靚呀您知咖！）

然後喺去清水寺既路上，二年坂既斜路上，

啲和服女真係無懼世事變改，大雨都可以掉低把遮去影相
而鏡頭背後個男朋友呢？
就繼續拎住把遮啦手袋啦相機啦幫女朋友影相
您知啦，幫女朋友影全身相，識趣既請踎低～
因為踎低影先影到條腿長啲瘦啲呀事後P圖都P小啲呀
拎住咁多野再踎低影相，再加上大雨既背景..

「come on james，做乜咁陰公豬姐？
走！掉低D相機手袋！我地一齊去食拉麵！」（幻想拯救男人情節）

可惜事實既我只係繼續拖住麥仔快速走去避雨
遺下一班可憐男人繼續在大雨中做龍友。
「影我丫！」「我唔望鏡頭您影我丫」「我扮行路您影我丫」

「我扮睇野您影我丫」「我過對面您企呢到影我丫」
「我唔露齒笑再影多張」「我望另一邊您影丫」
高峰時期一個清水寺係咪可以由朝玩（影）到晚？
（呵欠）姐先行去食碗拉麵啦拜～

著和服本質無問題咖，
我見兩個女仔朋友一齊著去姐妹情深都令我覺得幾開心，
只係唔好著完件和服就以為自己變左公主
別讓您的男朋友太辛苦啊～

btw有啲女仔會覺得男朋友肯咁樣做先係好
我只覺得做您男朋友好L慘。
/
我的專頁：https://www.facebook.com/hkgirlfriend/
ig: hkgirlfriend