上回提到旅行係情侶既考驗，亦係磨合既好時機
因為平日睇唔到對方喺屋企或者處理事情既習慣，
去到旅行都會顯露無遺，如同缺點一樣。

另，去旅行實在有太多雞毛蒜皮既小事要處理
尤其大家又累又熱，要鬧交要意見不合既機會實在太多
小到行邊條路都可以鬧一場交，
重點唔係行邊條路呀，而係點解您唔信我？點解您唔聽我講？
同埋去旅行大家中間都少不免有失去耐性的時間
所以黑面/態度差左就比平時更更更易出現

最近果次旅行我同麥仔完全無鬧過交（奇蹟，齊鼓掌）
因為去左幾次，我開始了解自己邊個位會爆炸
例如肚餓既時候，以前餓了我又唔會好強烈要求去食野
麥仔就諗住我仲可以行多陣，於是我就爆炸了～
所以我就開始學識表達多啲，只有令對方知道先可以解決到問題

旅行最大得著係，學習到更好既溝通

累了餓了想去邊唔想去邊，自己想點都需要好好表達
唔好再期望對方識讀心，然後唔岩心水就黑面
都一齊去得旅行，無謂再客客氣氣保持完美形象喺到扮無所謂啦

同埋去得旅行，輕則三日四日，重則十日八日
雖然中間有好多景點娛樂大家，
但中間亦有好多搭車時間，無無聊聊，兩個人點相處都好重要
我係反對電話大過伴侶既，所以去旅行我都好少玩電話
一來畀得錢出國就唔想浪費沿路風光
二來兩個人難得可以二人世界就珍惜一下，一齊分享下
所以搭車等待既時間我地除左間中玩下電話或訓覺
都會傾下計玩下小遊戲，（例如左一拳右一拳，無聊但好玩吹咩）
於是我地就會比平時傾到更多野，更深入既野
而且回憶起，除左景點，中間的過程也蠻有趣的啊～

仲未講錢銀方面喎。

AA制定男仔畀哂，沒有對錯，只有雙方舒不舒服
同埋旅程中大家點用錢都好反映到對方既理財概念
有朋友話去旅行女朋友買到無哂錢仲碌左好多次卡，
佢先知自己女朋友係咁大花筒，突然感到害怕....
當然，不只是女生，男生一樣可以大花筒
點用錢從來都無對錯，只係兩個人接唔接受到對方既洗錢方法姐
慳人遇上慳人，大花筒遇上大花筒就無問題啦

旅行對情侶來說，要麼增進感情，要麼看清不適合。
畢竟您十日對住一個人都頂唔順既，仲講咩十幾廿年
我有個同女朋友窮遊世界半年既朋友話：
「去完半年旅行都無分手，就可以結婚咖啦」
事實，佢地真係結左婚。

/
我的專頁：https://www.facebook.com/hkgirlfriend/
ig: hkgirlfriend