其實每一個香港人都係野比大雄，天生能力唔高但仍然唔肯努力，面對困難時未有全力克服反而想方法逃避問題。好彩既係每次大雄出事都會有多啦A夢幫手解決問題，同樣地香港人每次都立法會選舉，好好彩都會有新冒起既群體為香港人爭氣。但幸福與幫助唔係必然，假如有一日香港人再冇人企出黎為自己發聲，佢地又可唔可以好似野比大雄一樣，發奮向上，到最後大團圓結局?
香港人點解好似野比大雄咁樣?只要睇真D就會發現兩者擁有唔少共通點，睇住多啦A夢就好似將回歸後既香港人特性，一幕幕咁呈現出黎。首先，香港人同野比大雄一樣，本身就冇咩反抗能力，可以話保護自己既能力都冇，同時又要面對住強大既敵人。大雄弱不禁風，但要對住比自己肥幾個碼既大隻佬胖虎，同埋比自己有錢幾倍既土豪小夫，日日比佢地用唔同既方法壓迫，可以話完於生活係恐慌之中。
同樣地香港人面對既都係比自己強大幾倍既對手，人地成個保皇黨，講有錢又有錢過你香港人，講人力既，佢地又有大把土豪鄉紳幫手，香港人面對住一次又一次既疑似恐嚇議員人身安全與賄選舞弊事件，就好似一隻螞蟻一樣任由人地處置。
但好彩既係每一次大雄遇到困難時，都會有多啦A夢幫佢出頭。大雄比胖虎打完之後，多啦A夢會借法寶比大雄還擊，大雄有咩奇奇怪怪既願望想達成，多啦A夢都會幫佢手，保證大雄一定生活係安穩快樂之中。香港人好好彩，英國佬時期慢慢咁開放民主，初時香港人既生活雖然過得好苦，但慢慢明朗化，可惜既係回歸之後一連串既西環介入，令香港係經濟、社會同埋政治上面都蒙上一層層既陰影。而呢個時候，一位又一位既議員為香港人發聲，雖然唔係人人都中意佢地，但佢地確係為香港人發聲出力，其中本土民主前線就當之無愧(巧合地多啦A夢同埋本土民主前線既代表顏色都係綠色)。如果你話佢地太過激進既，咁可以舉下長毛同埋慢必，長毛係選舉期間既付出，大家有目共睹。
最難得既係大雄每次都好無理咁發多啦A夢既脾氣，但佢依然義無反顧咁幫大雄手。大雄每次唔聽多啦A夢話，亂用法寶出事之後就會指責佢，話係佢問題，多啦A夢一次又一次承受既大雄無理既指責，但依然甘心幫大雄手，佢得到咩野回報呢?或者只係一個豆沙包，但佢寧願放棄過檔幫小夫手去食一百個豆沙包，而係留係到為大雄無條件既付出。正如亂世出英雄，梁天琦、長毛為左香港人一次又一次咁付出，流汗，斷送自己既所謂前途，留案底，但佢地得到咩野?好彩既係一個立法會議席，唔好彩既可能係香港人既謾罵。或者好似朱凱廸咁，家人同埋人身既安全受到威脅。但佢地依然唔係好似保皇黨一樣，為錢同埋權力而獻眉同埋招安，而係默默守護係香港人既身邊。
但香港人要記住，我地每一個人既處境係相比野比大雄更差，因為大雄有咩生命危險果時，胖虎同小夫都會義無反顧咁幫手，相反，保皇黨同埋阿公就恨不得反中央，爭取真普選既人早死早著，冇人會幫我地。
呢個時候，我地唔應該再固步自封，諗住捱得一日得一日，或者只係單單要求人地無條件既付出去保障自己既安全。相反我地應該要自強，要努力，自己香港要自己救。我地唔應該只係坐係電腦出個post，打個卡話自己投左票就算，相反應該更加積極以文字或者係行動去表示香港人既決心。
萬一，有一日香港失去左多啦A夢果時，香港人都可以自己救自己，或者幫手救呢班一直為自己出心出力既多啦A夢。
