小遊戲推薦「隱藏我的遊戲母親」

最近玩左隻好勁又好白痴嘅手機小遊戲。Game名叫 「隱藏我的遊戲母親」,一個鐘內就可以爆機,內容惹笑,畫風係得意日本卡通風,無論喺自己一個人挑戰或同另一伴當iq題咁玩,都係一流選擇。

簡介
遊戲設定大概係阿媽每日都會將佢個仔部遊戲機收埋係屋企某個角落,等個仔無得玩,困係屋企悶到死為止。你嘅任務就係要唔好搵到佢阿媽,同時搵返部遊戲機出黎。而呢個亦係隻game 非常弔詭嘅地方,就係佢阿媽除左會收埋部遊戲機之外,仲會收埋自己。例如阿媽哩埋喺窗廉後面,部遊戲機收左喺雪櫃裡面,而當你唔留神,get唔到佢嘅提示,click 左落去個窗廉度,阿媽就會叉住腰咁啤住個細路,令細路失去打機嘅機會,咁你就GAME OVER,懊悔哀傷。阿媽就等如一個炸彈,你就要喺唔引爆佢嘅情況下,用匪夷所思嘅方法執行一次救參任務。

遊戲優秀嘅地方有幾個:

1)白痴× 睿智
佢係隻類似密室脱逃嘅遊戲,要運用屋企嘅道具去達成某d條件,搵返部遊戲機出黎。當中用到d好基本嘅物理常識,想像力,邏輯個類嘅野,則係話,多數嘅關卡係要小小用腦去諗。而當你卡喺某幾關,開始認真思考嘅時候,就正中下懷,陷入佢搞笑嘅圈套。因為你最後會發現解決方法都係d out of the box,或者出人意表地白痴嘅野黎,又有d大智慧喺裡面,只要突破盲點,就好簡單。每過一關,都會覺得自己好聰明,或者好蠢。

2.救救孩子
每次搵到部機都會見到個細路振臂歡笑,算係為佢晦暗嘅童年略盡綿力,係9月開學嘅時間玩別具意義,因為愈忙愈辛苦就愈要打機。

3.文化超展開
加左好多得意野文化野落去,會見到金斧頭銀斧頭,龍珠,日本仙鶴等嘅元素,例如要喺屋企集齊七粒龍珠先可以召喚部機出黎,好九唔搭八無里頭,可以話係文化超展開,但明嘅話就會會心微笑,絕對係錦上添花。

4.動人的最後一擊
如果成功玩到最尾個關(30關)會有小小感動。而呢小小感動係由之前一次又一次戰勝阿媽鋪墊出黎,儲滿氣嘅最後一個PUNCH。(但感動完就會覺得佢太有教育意義,逼人毒撚回頭)