Brian一擰轉身，就見到我拎住佢部電話……

「咁夜仲玩手機？」點解佢唔係問我做乜玩佢手機？
「……係呀，有人Whatsapp我呀。」
「哦，早啲瞓啦咁……」佢連呢幾粒字都未講得清楚，又擰轉面瞓返著。

我不禁倒抽一口涼氣。呢秒鐘，係我第一次覺得情侶用同款手機殼，其實都唔係咁MK姐。

＊＊＊＊＊＊＊＊＊＊＊＊

今晚又OT到九點幾先收工。返到屋企，飯枱有幾碟餸，Becky坐喺梳化睇緊電視。

「做咩唔同我講煮咗飯呀？」
「講咗你都係要OT架啦，費事嘈住你做嘢嘛。我去叮返熱啲餸先，沖個涼就有得食喇。」

第一下我有個錯覺，Becky應該係想特登做返啲嘢去修補我哋嘅關係。但諗諗吓，其實幾乎個個禮拜佢都會抽時間煮飯，仲一定唔馬虎，次次起碼有肉有菜有海鮮。佢話，一個星期少不免一兩晚食外賣，可以嘅話就自己煮多啲，平衡吓。味精呢家嘢，拉勻一世食都仲係對身體有害嘅。

而且，諗返轉頭，我同佢嘅關係有咩好修補？到而家已經一齊兩年，對住Becky仲係「若如初見」咁。仲好記得啱啱一齊頭半年，兩個人簡直係糖黐豆，一星期見足七日， 每日傾極都唔厭。每一樣發生喺自己身上嘅事，我哋都想一字不漏咁講俾對方聽。就算時至今日，只要夜晚係一齊食飯，我哋都會食完飯落街行吓散吓步，互相講吓自己點過呢一日。另一半係要對足幾十年嘅人，如果拍緊拖已經覺得無話題，呢段關係都幾難行落去。

集郵其實只不過係一個心癮。究竟邊個先值得投資下半生，我好清楚。

「阿B，呢間公司我想做埋呢個月就唔做喇。趁轉工，不如我哋去東歐旅行幾個禮拜？你唔係一直都話想去歐洲影好多輯婚紗相嘅咩？今次當係探路好無？」

＊＊＊＊＊＊＊＊＊＊＊＊

有時有啲嘢就係咁。你以為自己距離做個壞人、變態佬、或者跟蹤狂好遠，又點會估到有一日，你會歇斯底里地不停check自己男朋友嘅所有電子用品。

過埋今晚就出發去歐洲旅行喇。我一邊叫自己千祈唔好再check Brian電話，因為唔想check到任何證據；但另一邊廂，我又好想確認佢已經無再同Rachel聯絡。

點都好，判死刑之前，每個人都值得一次機會。

之前check Brian手機，我發現佢個iPhone電郵只係得公司郵箱，無佢平時用嘅Gmail。今晚趁佢睇緊歐國盃，我用自己部電腦嘗試登入佢個Gmail。Google帳戶唔同手機密碼得四位數，仲要唔一定係數字，用人手估係根本無可能撞中。

但，Brian部手機而家就喺我面前，放咗喺書枱叉緊電。

我喺電腦輸入佢嘅Gmail帳號，再直接撳「忘記密碼」。Google會發一個短訊去佢手機，利用一次性密碼驗證身份，就可以重設密碼。

GPS3 - google recovery

重設得密碼，Brian就一定會知。所以無論我查到啲乜，無可避免，今晚都一定要同Brian攤牌。

但我更加希望，係咩都查唔到……

＊＊＊＊＊＊＊＊＊＊＊＊

我下載咗一個「Whatsapp chat with Rex」嘅file。

一路睇，呼吸開始越嚟越困難。嗰分零鐘，感覺就好似如果唔每下提住自己要用力呼吸，就會唔識抖氣咁。我開始覺得周圍嘅氧氣唔夠用，點樣大啖吸都係抖唔到氣。

我一邊伸手去手袋拎平時用開嘅哮喘噴霧器，對眼完全離唔開個電腦螢幕。

如果唔係個名唔一樣，我會以為睇緊自己同Brian熱戀時期嘅聊天紀錄。

嗰幾吓噴霧器嘅聲音，似乎無幫到我嘅氣管擴張，但就終於吸引到Brian嘅注意力。佢好緊張咁走埋嚟，可能係想問我咩事，又好似想幫我掃背咁。但喺我嘅世界，視線已經完全失焦，根本聽唔到佢講咩嘢，亦完全郁唔到。

過咗唔知幾多秒，我諗佢終於大概明白到底發生咩事。

「點解……聽日我哋就上飛機喇……點解？」我望住Brian，用不能夠再平淡嘅語氣嘅質問佢。
「對唔住呀B……我，我已經無同佢Whatsapp架喇，你信我丫！」事實上佢可能亦無講大話呃我，因為呢個世界仲有無數個社交手機程式，例如唔會有聊天紀錄嘅Snapchat，或者定時自我銷毀聊天紀錄嘅Telegram 。

嗰一刻我覺得自己體內好似有團火，如果唔吸多幾啖空氣落肚冷靜吓就會爆炸咁。

而事實係，氧氣係助燃嘅。越大啖吸氣，我就越嬲。我好想發狂。但就算將成張枱嘅嘢掃晒落地都好，都唔會紓解到我呢刻嘅憤怒。

我望住佢嘅眼神，已經分唔清究竟呢啲叫誠懇定係叫驚恐。我合埋雙眼，一下一下深呼吸，跟住好平靜地打開書枱個櫃桶，逐字逐句咁同Brian講：

「只要你唔再搵佢……去完呢個旅行返到香港，飛機落地之後，你想做啲咩、同邊個一齊，我都唔會阻你。」

講完呢句，我將Brian部電話放咗入書枱櫃桶……然後，鎖起咗佢。

（待續）

【B612按：第一次試寫連載。呢個故唔會太長架咋，預計四集，下集大結局喇！希望大家俾個面share吓啦！怕miss咗結局嘅記得like埋我個page呀！:)】

B612 Facebook: http://www.facebook.com/b612lpp