銀行都有色魔？不要心邪，原來有一群經常於銀行出沒的客戶，叫「息魔」。對一眾跑數同事而言，招呼這群客戶，是吃力不討好的。他們認「息」不認人，當做完定期，便會乾脆取消戶口，待下一個有迎新客戶優惠或高息推廣的日子重臨，動作快，狠，準！不能夠與他們打好關係，這叫我們客戶經理情何以堪呀？

每日未夠九點，銀行門口就會有一堆客戶摩拳擦掌準備衝進來，當中大部分是息魔。

今日一開門，息魔一號衝到小妹座位前，第一句就問：「宜家X個月做緊幾多厘？」待我回答後，息魔一號即刻華麗轉身，消失得快過飛人保特，看來利息不太吸引嘛。

然後一眾息魔不斷重覆以上動作，
「宜家X個月做緊幾多厘？」
「宜家X個月做緊幾多厘？」
「宜家X個月做緊幾多厘？」……

呢一句今朝大約重覆十幾廿次，終於息魔N號出現，他有第二句問題呀！

「乜咁低㗎！隔離XX銀行仲高過你地！你有無得再比高啲息我呀？」其實你大可以過隔離銀行做定期，我又沒有拿槍指著你的頭。

「請問您想做幾多金額？」小妹展示專業微笑。

「大碼。」hey，難道你認為我是你肚裡面條蟲嗎？

「咁即係幾多呀？」深呼吸，繼續保持微笑。

「都話大碼囉。」你都幾大支嘢喎！

「您話我知啦，睇下比唔比到高啲息你？」溫柔，你要忍耐呀！繼續繼續保持微笑。

「溫小姐，你唔好話比其他人知喎。」咁神秘？難道真的超大額？

「當然當然。絕對保密！」

息魔N號周圍望了望，確認身邊沒有可疑人士，就細細聲在我耳邊說：「廿萬。」

「廿萬？」我以為我聽錯。

「嗯，有無得高啲息？」他神情非常堅定。

唓！嚇得我呀，以為二千萬咋！

「高啲息，有！唔知您有無興趣聽下一啲較高息嘅儲蓄計劃？」這次是奸笑。

呢位尊貴的大碼息魔，給您一個溫馨提示，大部分銀行的定期，一般都十萬廿萬起跳，請不要再嚇唬銀行職員了，多謝合作。