《放心，我會保護你！》

我叫阿健，仲係一個正應付DSE的普通中六學生。每一天放學後，我同絕大部分學生一樣，都係去自修室溫書。對於學生嚟講，自修室的地點係好講究㗎，雖知道如果自修室遠離你屋企或者學校太多，呢個絕唔係一個好地點，所以我每晚都係去屋企附近的自修室溫習，方便我溫完就可以回家休息。

但是，這天卻有一點驚喜，因為我一直傾幕已久嘅女神 – 阿晴打電話過黎約我星期六去佢屋企附近的圖書館溫書，我梗係諗都唔駛諗，即刻應承佢啦！

其實對我嚟講，搭車去女神嗰度溫書真係一點都唔方便，我要搭大概半個鐘車先去到佢嗰到，但女神叫到喎，唔通話遠唔去咩？

於是，星期六嗰日我晨咁早起身梳洗一番，食過靚早餐之後就搭地鐵去佢果邊嘅圖書館，去到圖書館門口，望一望手錶，九點半，好彩預早左半個鐘，話哂第一次約女神溫書，梗係要準時比番個好印象佢啦！

「阿健！」

邊個叫我？我周圍望都見唔到有人叫我。

之後有隻纖細嘅玉手搭住我膊頭，幼長的食指伸出，我一擰轉面，比佢一篤，篤住我塊面……粒暗瘡。我向後一瞥，原來係阿晴，好彩佢仲未發現篤住我粒瘡同埋粒瘡仲未爆濃。

阿晴笑笑口問我：「你咁早到嘅？」

「嗯……..」我只顧著望著阿晴嘅一身打扮，佢著咗一件貼身嘅白色T-shirt同一條黑色短裙，盡顯佢一身窈窕嘅身材，而且佢紮咗一個馬尾頭，留咗透明瀏海，眼前嘅佢真係好靚，好似一個小公主，比到一種好想令人保護佢嘅感覺。

「喂…你咩事呀？做咩喺咁眼甘甘望住我…」阿晴一邊講，一邊係我眼前揮手，但我仍沒反應呆咗望住佢。

「喂！」

「吓？」我望到根本唔知佢喺到叫緊我。

「我問你做咩好似成個咸濕仔咁望住我呀？」阿晴鼓起臉蛋問。

「冇呀…你今日好靚…啊…唔係，我話今日天氣好好，入去溫書咯？」

「哦…」阿晴聽完我講，臉都紅埋，之後我地就一齊入去自修室溫書。

老實講，呢個自修室真係好細，但好彩我地兩個都算好早黎，所以有好多空位比我地揀，我地揀左靠近牆壁嗰啲大枱兩個孖位一齊溫，方便遇到唔識大家可以問野。（啊！唔係，係方便阿晴問野。）

「阿健！我想問呢條log嘅數學題點做？」阿晴一臉疑惑望向我。

「哦，呢條你睇番書嘅公式就得㗎啦，你背左條公式先，再用計數機就solve到。」數學黎講，我不嬲都有信心。

「如果你遇到再唔識就隨便問我啦，我都溫過哂咁濟。」我滿是自信的道。

「你好勁呀，阿健！」

我感覺到阿晴流露住仰幕嘅目光望住我。

真係唔好話，數學我目標係拿5星星，加上阿晴有少少蠢蠢地，都係問d好基本嘅數學題，所以仲唔係我係阿晴面前型嘅時候？

「阿健，呢題嚟？」

「哦，呢題簡單啦，你咁……..就計到。」

「Err…..重有呢題我都唔係好識呀，阿健？」

「你首先咁…咁…咁，再咁…咁…咁，就計到。」

終於阿晴問哂佢唔識嘅野，我地兩個見有點肚餓就去左食野先，去了譚仔，隨便點了兩個米線就開始食，席間，阿晴不斷讚我：「你數學好勁呀！！下次溫書可唔可以再指點我呀？」

我梗係勁開心啦！但呢個時候，我唔可以比佢睇穿我，所以我扮到一臉不在乎應佢：「OK！冇問題，下次Call 我啦。238 五個零！」，阿晴聽完就哈哈大笑，仲好多謝我今日教咗佢咁耐，我相信我喺呢一刻，我係阿晴嘅心目中地位又高咗，因為佢可以喺學業上依賴我，溝到佢嘅日子總算係指日可待！

食完之後，阿晴又話想去前邊間小食店買魚蛋食，但我見有d口渴就自己去7仔買支野飲先，順便買埋阿晴嗰份，等佢覺得我好貼心。當我準備比錢果陣，見到嗰邊成班人圍住阿晴，當中仲夾雜幾個金毛男，我即刻連野飲都唔記得拿，衝過去睇吓咩事，原來班MK村童想問阿晴拿電話。有個好矮嘅金毛MK仔望住阿晴：「𡃁妹，唔好敬酒唔飲，飲罰酒喎，我大佬想抄你牌，你比唔比！？」

阿晴驚慌的答佢：「唔好意思，我冇手提電話。」我聽到都忍唔住笑咗出黎，阿晴真係一個比較單純嘅女仔，諗住用d咁嘅大話耍走d村童。點知未等到班村童出聲，阿晴已經話：「我只有屋企電話，我比你呀！？」頂！原來阿晴唔係單純咁簡單，直情係單純到有d憨尻！見到呢個情況都仲唔走出黎，我仲係男人黎嘅？所以當佢準備比嗰電話班MK仔嗰陣，我一手捉住阿晴隻手，以一個極度充滿自信的眼神望住阿晴講：「放心，交比我。」

阿晴很是擔心的望著我講：「阿健，小心點！」班MK村童見狀都不斷起哄：「你邊位呀？死埋一二邊啦，學人做㗎兩？」之後有個比較高，但超樣衰嘅人走出黎，應該就係佢地嘅大佬。樣衰男望住我：「𡃁仔，你跟邊到呀？」經過我睇多年嘅TVB嘅膠劇嘅經驗，而家得兩條路：一係走，一係隻抽。但我地呢d梗係……兩條路都唔揀啦！食腦咪得囉！我以強勁嘅臂彎拿出學生證，用手掩著學校個名，快速喺佢地眼前揚了揚，再望住佢地霸氣十足咁講：「警察！你班仆街仔有書唔讀，喺到溝女？再唔走我搭哂你地番去差館！」

個樣衰男同班村童信到十足十，已經好驚咁講：「對唔住呀！阿sir, 我地走㗎啦！！！」說罷，佢地已經跑走，圍住我地嘅花生友都走埋，阿晴撓著我嘅手，小鳥依人的深情望住我：「阿健，你好Man呀!!!」

我當然打從心底裏勁Happy、爽歪歪，但我仍然裝作沒事般，拍一拍自己的心口：「下次再遇到呢d野，放心，我會保護你！」阿晴羞澀的點點頭：「嗯…」

之後，阿晴終於去到前邊間小食鋪買魚蛋食，嗰伙計好快手，三扒兩撥就整熟串魚蛋，之後一野擺入d醬汁到，點知嗰伙計太大力，d醬汁濺了出黎，喺差唔多濺到阿晴嘅同時，我一身擋住阿晴面前，當然我件白色恤衫要報銷！
但唔緊要，因為換黎嘅係阿晴好體貼咁幫我用紙巾清理我件恤衫，仲對住我哭笑不得咁講：「做咩咁傻豬？我嗰條係黑色裙，你嗰件係白色恤衫，d污積好難洗㗎！」

我知道呢個係一個難得嘅機會，因為呢個時刻阿晴一定會覺得我係一個好男仔，無論喺學業或者以上嘅事件上，都代表佢完全放心的依賴、依靠我，所以而家表白係無得輸呀！所以我冇放過呢個機會，我捉緊佢纖幼嘅雙手：「阿晴，其實我好鍾意你，你可唔可以以後比個機會我保護你。做我女朋友呀，好唔好！？」

三秒過後，阿晴含羞答答的點點頭：「嗯…」眼前嘅佢已經臉紅不已，低下頭，不敢看著我。Yeah，我得咗啦！！！正當我準備用手托起阿晴嘅下巴，將我嘅深情都鍚落佢那片櫻桃般的香唇之際，「鈴…鈴…鈴」電話響啦！邊個仆街電話響呀？原來係阿晴電話響，佢話原來明天係要幫人補習，但岩岩嗰家人話要轉時間轉今日下午。

難得可以一享溫柔之際，點知比人打斷，心情真係一個字：差！不過算啦！呢d機會以後多的是，阿晴好不捨得的跟我道別：「明天你得唔得閒呀？一齊溫書呀？BB」

「BB？？」有冇人聽到呀？阿晴叫我BB，真係好Sweet呀！！！我不斷點頭道：「得呀，明天、後日、大後日都得呀！！晴B豬！！！」阿晴笑得很燦爛：「嗯！」

我懷著甜蜜的心情，自己喺自修室溫至關門。

由於我唔係住呢頭，附近又好似冇小巴、巴士之類嘅東西，所以我要經過一個商場行去地鐵站搭地鐵，順便當係行下呢個商場，反正平時都冇乜機會經過呢頭。點知，前邊好似有一個很熟悉的身影﹣阿晴，所以我大叫：「晴B豬！！！」之後嗰女仔向後望：「BB！！！」原來真係阿晴。原來阿晴見有d肚餓，落黎睇下仲有冇野食賣。

我同阿晴並肩而行，上咗三樓，原來呢個商場真係有好多野賣，只可惜而家已經差唔多十一點，好多鋪頭都收左鋪，得番小貓三四隻的鋪頭仍未收鋪。阿晴同我一齊行，我倆之間可以沒有距離，我的手不斷碰撞到阿晴的手，但我又淆淆地底，唔敢拖著阿晴，點知，阿晴一望到前邊間賣Pan cake嘅鋪頭仲未收鋪，眼晴發亮般，一手拉著我的左手向前快走。

我同阿晴拖手呀！係阿晴主動拖著我隻手呀！！！我望著我地拖住嘅手，呢一刻，我覺得阿晴隻手真係好纖細、好溫暖！～～好幸福呀～～阿晴只顧著自己買Pan cake，沒理到我嘅反應。＞＿＜

沿途中，雖然我只顧著點樣可以拖著阿晴隻手，但我一直留意到附近好似有d唔多尋常嘅事。我地一路行，一直都幾群三至四個𡃁仔群埋一齊行黎行去，又不斷穿梭不同嘅樓層之間，三樓又有個肥肥地嘅紋身漢同幾個年約三十中年阿叔係到係咁打電話，神色緊張，似係搵緊人？同埋呢個場景好熟悉，唔知係套電影見過呢？

望住阿晴一邊食緊Pan cake嘅表情很是滿足，不斷“埋頭苦幹”，嘴角還不小心沾了一些Cream，就好似一個細路女見到M記嗰種單純嘅喜悅。

剎時間，我好似記起d野。電影……？望住另一邊嘅肥佬紋身漢，我終於記起係邊套電影。

《古惑仔呀！！》

咁咪啫係劈友？

一心極度擔憂的我，一手拉住還傻傻食緊Pan cake嘅阿晴走：「快d走呀我地，呢度應該有人劈友？」

「吓？但我仲想食前邊間鋪頭嘅冬甩呀？」阿晴無辜地看著我。

「咁呀？」我心諗好危險，仲食冬甩？但望住阿晴可憐兮兮嘅樣，而家買埋應該都走得切嘅，我心念一轉，都係唔好，保護阿晴安全至上，於是我一手以公主抱起阿晴，被我抱住的阿晴還只懂得咬著Pan cake，眼晴水汪汪的望著我，但我已經不理太多，走去扶手電梯準備落去。

點知，說時遲，那時快，我身旁幾個行人本身跟我並肩而行，但他們突然以飛快嘅速度爭先恐後跑落電梯，後邊又突然傳來「呀……」一聲慘勵叫聲，我向後一望，原來係因為後邊個紋身漢同佢d跟班已經拿出鐵通，不斷毆打一個已經訓低不斷抱頭的中年人，我直覺話我知而家好危險，我已經感覺到腎上腺素不斷向上飆，成身血液好似加速流動咗好多，頭、手、腳有d麻麻地嘅感覺，我放低咗阿晴叫佢一齊走，因為咁樣會快d走到，所以我地一落到二樓，我地嘅速度快咗好多，我地一路跑，我一路心諗只要落多層就係通往地鐵站出口！！！

跑吓跑吓，阿晴同我講佢有d累，想休息下，我錫咗佢額頭一啖叫佢乖啦，跑到地鐵站大把時間可以休息。之後我地兩個又跑到去扶手電梯，當我地準備落去之際，有一班MK𡃁仔準備衝上黎，我一手拉住阿晴返轉頭跑，我心諗應該無事嘅，始終佢地並唔係要斬我地，等佢地走左，我地就可以走㗎啦。

點知，帶頭的MK佬拿著染血嘅牛肉刀，望咗我地兩眼，神色慌張的問後邊d𡃁：「大佬係咪搵條著白色恤衫嘅𡃁仔？」後邊班𡃁仔你眼望我眼，似乎一臉懷疑的打量著我們，誰知，突然有一條𡃁仔大叫：「係呀！！大佬。」，成班𡃁仔就起哄：「劈佢老母！！！」。剎時間，個MK佬拎起把牛肉刀衝過黎，緊隨其後係一大班MK𡃁仔拎住鐵通、士巴拿、玻璃樽一齊衝過黎，場面真係千軍萬馬，何其壯觀！但呢一刻我緊握著阿晴的手，一臉自信的望住佢：「放心，我會保護你！」阿晴望住我如絲眼神也陶醉了，但事實上，呢一刻我真係好撚淆底，雖然我有一身強橫嘅肌肉，但成十幾條友拿住武器同我打，邊有可能走得甩？

我地梗係冇咁勇同佢地硬碰硬啦，所以我地一直跑，途中唔小心跑入商場嘅二樓的一條小通道，班友追得愈黎愈貼，終於我地跑到了盡頭，已經冇地方走啦！我心諗今次死梗啦，Err…唔係喎？同佢地講番我地唔係佢地要搵嘅人，應該仲有一絲生機的！當我還想跟他們解釋之際，個MK佬已經衝過黎，舉起牛肉刀，向我準備大力一揮，望住佢把刀，我突然有d頭暈暈嘅感覺……但呢個時候唔容許我頭暈，本能反應之下，我側身提腳向高踢佢嘅手肘，佢持著的刀從後飛甩，準備跌咗落班MK仔到，當然佢地見到一把從天而降嘅飛刀就梗係即刻四散。

我再補一腳大力中踢，落在MK佬的腹部，個MK佬一下子我踼到從後踢飛，班MK仔見狀都嘩然，想衝上前，但又不敢，所以不斷喺我地面前徘徊，突然………….
.
.
.
.
.
.
.
.
.
.
.
.
.
.
.
.
突然，我眼蒙蒙好似見到有人係我眼前不斷拳打腳踢，又起飛腳，之後又有一把又把嘅聲音傳來「呀……」，「唔撚係呀？」，「咁撚好抽嘅？」

？？？

我突然好清楚望一望，發現自己坐係地上，點解我會坐左係到嘅？我岩岩好似驚得濟暈左，再望一望身邊，點解無人嘅？

咁阿晴呢?

我開始好緊張，腦海不禁浮現起喺古惑仔電影入邊嘅細細粒比烏鴉不斷毒打、虐待畫面，剎時間，腦海中那張細細粒嘅臉變咗係阿晴。此時我心就慌了起來，阿晴咁細粒一定頂唔順班MK嘅毒打，最慘嘅係…我好驚阿晴有機會死…一諗到呢到，我情緒已經崩潰了，我雙手抓著自己的頭髮，雙膝跪在地上哭叫一聲：「阿晴！！！」叫聲之大，響遍整個商場，餘聲更回蕩了數次。

之後眼前有一個嬌小玲瓏的身影回首一笑：「咩事呀？BB」

我望住這個情況…我大概呆愣了。

因為喺我面前，係一個好細粒但又十分可愛嘅阿晴係到紮馬，準備以一敵十，佢一個箭步衝上前，穿梭於十幾個拿著武器的MK仔之間，不斷拳打腳踢、飛身轉踢、手起刀落、浮光掠影、天外飛仙、再黎一下餓虎撲食、神龍擺尾，之後阿晴雙掌向天一推，大叫：「大海無量」，隨即身邊所有圍住佢嘅MK仔同MK佬同時間被氣勢推倒，訓低哂。阿晴見狀，一躍跳到MK佬個心口，並以金雞獨立的姿勢踩上MK佬心口，向著我一臉自信的貶了一下單眼笑著～～

我而家嘅反應除左O嘴，就係喺到諗究竟阿晴係咩人…？我還未諗完之際，突然有個MK𡃁仔舉起玻璃樽，神情兇恨的向著我衝過黎，準備爆我樽。我見到呢個情況，驚得濟唔小心本能反應大叫：「救命呀，媽咪！！！」

阿晴聽到，即刻以迅雷不及掩耳嘅速度一躍飛過黎，係呀，你冇睇錯，係飛過黎！並唔係跳過黎。阿晴一身擋在我前邊咆吼：「仆你個街，打我BB，去死啦！」，之後佢以左腳踏前，右腳踏後的方式轉身一跳，跳起身打橫一個湯馬士三百六十五旋轉式飛踢，右腳一踢，成個玻璃樽比佢踢飛，個玻璃樽嘅落點岩岩好降落係訓左係到嘅MK佬頭上，佢好似岩岩想醒，但又被打中後，身體像魚被刀背拍到顫抖了幾下，又再訓番低。之後阿晴落地，再正身右腳奮力一踢，踢中衝過黎嘅MK仔嘅下巴，呢下嘅威力相當有可疑，因為MK仔中咗之後，威力大得要向後打左一個筋斗才落地。

隨後，解決暫時嘅危機後，阿晴蹲下，一臉擔心的望住我：「有冇事呀？BB」

我望到呢個情景，除左望到呆左，仲邊識比反應佢。

我大概兩秒過後，搖一搖頭先識應佢：「冇…冇事呀，晴…晴B豬…」

點知有條MK仔好狡猾，拿刀想從後偷襲阿晴，距離還剩五步，我見到就梗係大叫：「阿晴，小心後邊條仆…」我的話都未說出口，阿晴已經突然站起來，左腳向後一踢，呢個姿勢好優美，就像跳天鵝湖般那樣標準，頭、身、左腳都成一直線，雙手打後，像是展翅飛揚，搞到我有d想幫阿晴影幅相。呢腳之力令到個MK仔連人帶刀向後撲飛，把刀飛甩左，插中MK佬的右腳，MK佬又好似條魚咁顫抖兩下，又訓番低。

之後，由於尚餘五至六個MK仔係我地面前，唔知佢地係咪見識阿晴嘅功夫之後，驚驚地，所以係我地面前，欲“行”又止，重覆的左腳踏前，右腳踏後，右腳踏踏前，左腳踏踏後，好似喺到跳緊家燕媽媽的十字步咁，呢個畫面真係何其壯觀，因為我望住呢班咁活潑嘅MK仔，剎時間，佢地嘅臉孔一下子換哂無墨嘅家燕媽媽，情景就好似同時有5～6個薛家燕係你面前跳十字步唱『唏呀…唏呀…唏…唏呀…唏…團結一心有新轉機』搞到我都有d衝動想唱埋一份，之後有個MK仔唔知係唔係驚得濟，突然放低把刀逃離現場，其他MK仔見狀，大罵一句：「屌，咁撚冇義氣架！」但之後佢地都雞飛狗走。

阿晴扶左我起身，我地一齊走，我心中有好多疑問，但呢個環境都係走左先再問，我地好不容易才擺脫到班MK仔，去到扶手電梯，落到一樓，呢層我地應該安全，因為地鐵站出口已不遠矣！我地轉了彎直行，已經見到商場出口！！！點知，出口亦有一群黑衣人趕過黎，心諗唔撚係呀？呢個時候……..
.
.
.
.
.
.
.
.
.
有人持刀，大力向我揮刀過黎，幸好我避開左，之後又有個玻璃樽向我扔過黎，我本能反應之下驚得濟，抓緊阿晴的膊頭擰轉，當左佢係盾牌擋樽！！！阿晴反應之快，實在無人能及，一腳踢飛樽，之後那群黑衣人亦趕到，準備與我地開片之際………

三樓有個渾厚的聲音大叫：「仆你個街，唔夠抽呀，上黎啦，係下邊做乜撚呀？」全部黑衣人聽到之後，都走哂上三樓幫拖，無視了我地。

我地兩個步出商場後，阿晴兩眼堅定望著我，溫柔地講：「唔駛驚啦！健仔，我地安全㗎啦，以後有咩事，我都會保護你㗎！」其實我一生真係第一次見人劈友，仲要咁多血淋淋嘅畫面，一諗起我個心突然有一股恐懼感傳遍全身，但有個咁強大又咁溫柔嘅阿晴保護我，我聽到呢句說話，唔知係心有餘悸定感動得濟，突然放聲大哭了起來：「嗚…嗚…嗚…其實我真係好撚驚呀……阿晴，嗚…嗚…嗚…」阿晴很溫柔的將我個頭投入佢懷抱中，輕柔的撫著我雄厚的背講：「健仔，件事完左㗎啦，放心啦，以後有d咩事，我都會保護你㗎。」聽到佢呢句，就更觸動我細小心靈，所以我係佢懷中，就更忍唔住喊得鼻涕、眼淚都流哂出黎。原來，我成日以為我同阿晴一齊左，我就可以保護到佢，比到安全感佢，但其實一直都係佢比安全感我同保護我…自此以後，每當有咩事，阿晴都會第一時間保護我，我同阿晴就開開心心一齊生活落去。

﹣完﹣
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
唔知大家覺唔覺，尤其係拍緊拖嘅男女，大家通常會有既定嘅印象，強而有力嘅男方係一定會係保護弱質纖纖嘅女方，又或者有咩事，一定係男仔第一時間企係女仔面前，但事實上
.
.
.
.
.
.
.
.
.
.
.
.
.
一見到“小強”、“米奇”、“Jerry”喺條街又或者喺你屋企散步嘅時候，通常會係男方（阿健）驚得濟，躲在女方（阿晴）後邊，抓緊女仔嘅膊頭，大叫：「好驚呀！！！」又或者「救命呀！！！阿晴。」縱使個男仔有幾大隻，個女仔有幾細粒，都會出現以上嘅情況。但其實 “Jerry”又有乜好怕喎？
.
.
.
.
.
.
.
.
.
.
.
.
.
.
.
「阿晴，救命呀！！出黎打“Jerry”呀！！！」