還記得海賊王入面 居魯士為了女兒蕾貝卡可以以後過住幸福既生活 為蕾貝卡編了一個假既身世 令佢成為一個幸福而且叫人羨慕既公主
為了女兒既幸福 甚至 犧牲自己可以去愛佢既權利
有個男人 我細細個開始就唔係好中意佢
佢十歲自己一個黎香港 同何鴻燊一樣十蚊起家 但係卻無成為富翁
自己一個人生活 校服由白色著到黑色 初中讀到一半就無讀了
倒過垃圾 係黃大仙賣過香 訓過天橋底 到最後做左大半生廚房佬
唔識英文無文化 最威水就係小學戴過紅領巾
所以佢唔識教仔 一開口就係鬧 有時仲會郁手郁腳
有時候 佢個仔讀緊幾年級都唔知 年齡都可以答錯
每日堅持一份報紙 卻十個字有九個字唔識寫
雖然粗魯 卻唔比我地拎重物 無論出去買野幾重都會自己拎哂無怨言

無錯 佢就係我老豆
曾經 我甚至懷疑父親呢個角色 係我既故事入面係咪可有可無
但係長大之後先發現 呢個角色係吃力卻不討好
做過野既人都知 付出既勞力同收穫永遠唔成正比 更成日想唔番工
但呢個男人卻風雨不改 病左依然食住口煙去番工
手停口停 一家四口等住佢開飯 責任大 只好頂硬上
成日話要一代好一代 所以我考大學周圍求神拜佛 知識上幫唔到 卻只能盡佢所能 求神保佑
或者老豆同仔之間 總係好老尷 好想話佢知係佢身上學到好多
但係愛 有時卻好難講出口
做仔既 只好趁掙到少少錢 生日或者父親節帶佢出去食餐好 搵個借口 好好多謝呢個男人
雖然呢個家唔係大富大貴 卻感恩有你為我遮風又擋雨
星期日就係父親節 希望天下父親身體健康開開心心
做子女 學會不要負了這份愛
{在回味當初次接觸你}
{而我害怕鬚根粗糙的你}
{嚎哭退開 你卻溫暖地和媽媽蜜意低聲說：「他真百厭。」}
https://www.youtube.com/watch?v=ViqNhuXgROc
.
.
.
如果喜歡我的文章 歡迎到我的Facebook點個讚
你們的讚好 就是我最大的動力
讓我在追夢的路上 有你們的陪伴 謝謝