我一直都以為入左黑洞，四周就會變得黑暗。但後來睇youtube片就知道，其實唔係。你會見到空中嘅星光，好多好多，無數嘅星光。我一直以為「黑」洞，裡面一定好黑。但原來，仲有光可以透入黎。不過啲光，有入無出咁解。(我唔是讀天文，所以無咁了解，有錯就講聲唔好意思先）
只不過，你係裡面叫出聲，又或者發出訊號，就無人會聽到。唔係因距離太遠而接收唔到，而係因為無任何野可以逃離黑洞嘅引力。
而且係黑洞周圍，時間流動得好慢好慢。（睇interstellar學的，哈哈）你可能見盡幾世人嘅生離死別，但自己卻無辦法接觸佢地，自己亦無老過。自己長生不老，但親友早已離世，又如何？當然啦，首先你身體可以承受到咁強大嘅引力啦。如果唔係，就實死無生。
黑洞黑洞，人類會害怕，係因為大家對佢嘅認識太少。
人類本來就對未知嘅事物感到害怕。我亦一樣，我對將來感到害怕。最近我係度思考一個好有趣嘅問題。如果有個人話你聽，佢知道你嘅將來會點。但呢個將來，係無任何辦法可以改變到，你會想知道嗎？
我唔會想知道。因為萬一呢個將來，唔係我而家努力所爭取嘅未來，而係一個同我夢想中差十萬八千里嘅未來。咁我咪要傷心多幾年！而且，到果個時候，或者我所追求嘅未來，同我而家已經有差異。
不過，有人害怕黑洞，可能係因為落入黑洞會變得孤單。孤單？有邊個唔怕孤單？就係因為害怕孤單，所以好多人都會嘗試去迎合其他人，而失去自我……我亦一樣。如果同其他人唔一樣，只會被標奇立異。（當然有例外，不過大部分情況，人都會排斥與大眾不同的人）如果唔同其他人講人地是非，可能比人講嘅係自己…所以一個個小圈子，就咁而生。
人本來就係群體動物，需要支持同鼓勵。正所謂，集思廣益，多一個人，多一個腦，解開一個難題都更容易。但係，又有幾多人，因為害怕麻煩到其他人，而無將自己獨到嘅見解話比其他人知呢？又有幾多人，見自己嘅見解同其他人唔一樣，而收埋呢個見解，無講出口呢？又有幾個人，想維持友好嘅關係，而將說話收埋呢？
好啦，我知道自己講到九唔搭八。純粹隨心亂寫，不喜勿插。
如果想知道入左黑洞會點，可以係youtube打 "Travel Inside a Black Hole"。詳細介紹黑洞係咩野一回事。
果張圖我係NASA網站搵的。叫Black Hole's Event Horizon
