又喺另一個失眠夜。

瞓覺前例行同男朋友Mark傾下電話，近日反送中運動持續，我同佢再次傾到移民嘅話題。

Mark：「今日我同好耐無見嘅同學食飯，佢年尾同女朋友結婚，原來佢地都想移民，仲話唔理點都要走。」似乎Mark嘅朋友、同事，甚至係屋企人都支持佢走。

我弱弱咁回應：「咪好囉！有朋友陪你。不過香港是我家……」我地為咗移民呢個話題討論過無數次，亦都嗌過交、分過手。

佢話已經無可能喺香港再住落去，大陸會慢慢剝削我地嘅自由。加上佢認為自己懷才不遇，香港無機會、無選擇……

移民係個人選擇，無話對錯。但在我而言，我唔係選擇緊移唔移民，而係選擇同唔同呢個男人移民。其實我心裡面好清楚個答案，如果佢留喺香港，或者我地會繼續一齊，平平淡淡過世。無他嘅，佢夠穩陣，擔屎唔偷食，過人世啱晒。不過跟佢去移民，風險就大好多，放棄晒香港嘅家人、朋友同工作。

唉！諗完又點？都係打返開電視睇警察清場。呢一晚又係瞓唔到。