《一齊走》

《一齊走》
——照亮黑暗嘅並唔係電筒，而係人性嘅光輝

元朗偏僻位置有個繁殖場養咗70幾隻貓狗，負責人林鄭婆婆係惡毒嘅奸商，一直用非人道手法去管理呢個場。

有203個義工試過報警、遊行、網上聲討等等，但毒婦林鄭一於少理，已讀不回。

眼前佢手法愈來愈殘忍，岡顧動物生死，一班義工決定將反對行動升級。

晚上10點左右，大約30個義工出現喺繁殖場外圍。呢個係快閃行動，大家互不相識，而目標一致。

要解放動物，需要剪爛多個大鎖、破壞CCTV等，其他無參加行動嘅義工，一係就唔贊成行動，一係就仲猶疑緊。

雖然係咁，大家明白呢30位義工無其他辦法，呢一切都係林鄭毒婦逼出嚟。唔通眼白白由得嗰70條生命俾毒婦糟質？

行動好成功，佢哋分批將動物裝入寵物籠放上車，續批人開車離開繁殖場。呢個時候，遠處警車鐘聲響起，義工收到風，鄰居報警話呢度有人搞破壞，call 班警察嚟拘捕佢哋。

真係好諷刺，毒婦虐殺動物就乜事都無，個個視而不見；拯救動物嘅人就係搞破壞，就係暴徒，個個衝出嚟指責。

「我唔走，我要整爛晒所有牢籠先。留守到最後一刻，等林鄭毒婦無辦法再困住其他動物。」有義工 Send msg通知大家。

一個中學生妹妹啱啱坐上最後走嘅車，見到有人喺 group度打呢句嘢，話現場有4個人唔肯走。

車上一名負責開車嘅男義工，聽到中學生妹妹話仲有人未走，即刻熄匙回頭望住車內其他義工，毫無猶疑地話：「唔得，我過去夾走佢哋，你哋走先啦。」

車內所有人鬆一口氣，並唔係因為有人肯出面拉走人，而係有人做咗決定，就好似有股清涼嘅泉水灌入腦中一樣，大家即刻清醒晒，作出同一個決定。

換轉其他情況，反應快嘅香港人梗係即撇啦，仲使講。不過喺大是大非上，大家選擇團結、共同進退。

警車鐘聲愈來愈近，愈來愈大聲，卻無法掩蓋中學生妹妹把聲。

「要走，一齊走！」中學生妹妹第一個回應男義工，打開車門落車，開著電筒搵路衝返入繁殖場。

大家見呢個細細粒嘅妹妹驚到已經喊緊、聲都震埋，仲手騰腳震，同時，大家亦見到佢雙眼流露出嘅勇氣、理智同決心。

又瘦又矮嘅身體或者好脆弱，但佢嘅內心卻並不軟弱。

「一齊走！」大家即刻拎住電筒，跟妹妹落車。

呢一刻，照亮黑暗嘅並唔係電筒，而係人性嘅光輝。

（Credit畀嗰晚所有無名參與者。
不離棄、不割蓆、不分化、香港人幫香港人！）

===完===

p.s. 綠茶嗰晚睇立場新聞訪問立法會救人個妹妹，
終於忍唔住喊咗....

《一齊走》
照亮黑暗嘅並唔係電筒，而係人性嘅光輝