「你好,我係秦始皇,其實我無死!我喺西安有100億噸黃金,只需要2000蚊就可以解凍。你入2000蚊落我戶口,等我重新登基,畀你統領三軍!」

坦白講,見到呢個騙案訊息,我好嬲。

唔係嬲有人想呃我錢,而係......我先係秦始皇!呃錢還呃錢,點可以用朕嘅名義?

呢件事說來話長,其實我唔係無死,我當年真係死咗,正常地落地府投胎啦。

點知,因為我生前做得太多壞事,背負太多人命債之餘,

又做咗好多好事,咩統一六國、統一文字......大家中學歷史都應該有讀「秦始皇的功與過」。

歷史學家嘈「功大於過」定「過大於功」都嘈咗咁多年,何況地府嘅會計師樓?

要計清楚我要喺地府服刑幾多年,投胎可以投個咩人家,都幾花時間。

計咗幾十年先搞清楚條數(我懷疑佢地都係是但交個答案上黎),我要喺地府服千幾年嘅刑。

渾渾噩噩,一直到工作人員通知我,話「刑期完畢,可以投胎」,並且簡介投胎流程。

我只問咗一件事:「係咪一定要飲孟婆湯?」

我唔關心我投胎會變成咩人,我上一世係秦始皇,我仲可以變成咩人,係會更加出色?

一旦飲咗孟婆湯,就代表我嘅功績都化為烏有。

工作人員皺眉:「唔飲孟婆湯投胎,要受多五百年嘅刑罰,無人會咁樣揀。」

我受刑嘅第一日,好痛苦、第一年,好痛苦,到一百年果陣,其實已經無乜感覺。

再多五百年,又算係乜野?

帶住秦始皇嘅記憶同能力轉世,我唔信我會唔成功。

於是,我受多五百年刑,連比我遲入地府嘅劉徹,都已經離開,我先踏上投胎之旅。

呢一世,我係一個普通家庭出生,外表無咩特別嘅男仔。

即使唔飲孟婆湯,投胎過程中,記憶都被封印。

即係話,我唔係「一出世就識講野,三歲識作詩,八歲天下無敵」果種天才。

直到18歲,我先恢復晒作為秦始皇嘅大部份記憶。

而呢個時候,我已經被世人標籤為一個宅男。

我本來諗住讀政治,創一番事業,

奈何我英文天賦實在太差,公開試英文唔合格,就算中史超班,都考唔到大學。

我到處同人論政,結果俾人起底,話:「你大學都讀唔到,扮咩專家。」

喂,我係秦始皇,秦始皇都無資格講政治?

原來呢個世界,你講野可唔可信,唔係睇邏輯,而係睇你有咩資歷。

我無辦法靠實力上位,苦惱緊嘅時候,我就收到果個「我係秦始皇」嘅騙案訊息。

呢個時候,我再覺醒咗一段記憶,係寶藏!

狡兔三窟,雖然我啲兵馬俑俾人掘晒出黎,但作為一統六國嘅帝王,點會無後備。

我喺唔同嘅地方,都興建咗滿佈機關嘅地下室,本來係用黎做避難所。

避難所入面自然有好多日用品,雖然唔係黃金,但時至今日,絕對係價值連城嘅古董。

呢一次,我要名利雙收!
  
下集:https://post.shikoto.com/posts/162430-我係秦始皇(下)