上集：https://post.shikoto.com/posts/146498-我屋企有隻熊貓（上）
不過，唔可以逃避，唔代表唔可以搵人分擔下。
我將呢件事話咗畀我男友Billy知，Billy好有興趣，日日上黎我屋企照顧熊貓，買野畀佢食，俾隻熊貓點，任勞任怨。
我就不情不願，成日同熊貓嘈交；Billy就千依百順，望住熊貓，對眼好似發光咁。
熊貓又唔係傻仔，梗係鍾意Billy多啲。
雖然熊貓認咗我做主人，無得同Billy溝通，但每次Billy上我屋企，熊貓都好熱情，下下痴實佢。
熊貓仲成日同我呻：「點解我咁魯莽，將唯一嘅認主名額畀咗你？早知就認Billy做主人啦。」
唉，呢隻衰野真係無良心。
有一次，我要出差，我就委託Billy黎我屋企照顧熊貓。
幾日後，喺回程嘅飛機上，我忍唔住諗，俾Billy養咗幾日，隻衰熊貓肥咗幾多？
點知番到屋企，熊貓唔見咗！
Billy笑住問：「妳唔係成日話，養熊貓好麻煩？」
聽到呢度，我已經估到答案，Billy多數將熊貓轉移咗去適合嘅地方。
但我都係忍唔住問：「你點同政府講？政府信隻熊貓係突然出現？」
「慢慢黎，飲碗湯先講。」Billy裝咗碗湯畀我。
長途跋涉，我都幾攰，一路飲湯，我一路諗，其實我屋企都唔係真正適合熊貓，去番個有同伴嘅地方，可能對佢更加好，只係......有啲唔捨得啫。
「Billy，你帶咗熊貓去邊？我得閒去探下佢。」我心平氣和咁問。
Billy突然問：「妳記唔記得，我之前同妳講，話我識咗個大老闆，如果佢肯提攜下我，我實飛黃騰達嘅。」
「記得，不過呢啲有錢人，大把人巴結，幾時輪到提攜我地丫。講番隻熊貓先......」我唔明Billy點解扯開話題。
Billy好認真咁講：「我就係講熊貓，大老闆話，佢呢世人咩都食過，就係無食過熊貓。」
我呆咗，我懷疑自己聽錯，小心翼翼咁問：「所以呢？」
「你食咗佢？」我簡直無法形容我嘅心情。
「唔係我食，係大老闆食。」Billy即刻辯解：「我食咗好少咋，最後一碗湯都留畀妳，仲幫妳整乾淨個廚房。」
我發晒癲咁行遍全間屋，都搵唔到一絲一毫熊貓存在過嘅痕跡。
我可以點？報警？話我屋企本來養咗隻熊貓，依加俾人食咗？
邊個會信我？就算有人信，要檢驗，我都飲咗碗湯落肚。
我只可以有氣無力咁問：「你唔係好鍾意熊貓架咩......」
「鍾意還鍾意，男人要腳踏實地嘛，我都想儘快儲夠錢買錢娶妳......」Billy有好多好多道理，我一句都無聽入耳。
但最後Billy講咗一句：「妳夠成日話熊貓好煩，唔想理佢，依加又扮晒唔捨得？」
然後，我就同Billy分咗手，因為Billy都成日話好鍾意我。
好多人講大話，唔止係呃你，而係呃埋自己。
只有喺利益衝突果陣，你先會真正了解對方。
不過了解果一刻，你可能已經俾佢食咗。
－完－
