同好多女仔一樣，我自細就好鍾意熊貓，覺得佢地肥嘟嘟，好可愛。
你鍾意貓，你可能會養貓，可能會救下街上嘅流浪貓。
但你鍾意熊貓，都只可以買下公仔，得閒去海洋公園望下，你唔會幻想養熊貓架嘛。
但喺我24歲呢年，有一日，我番到屋企，我見到隻熊貓。
無錯，係一隻到我膊頭咁高嘅熊貓，坐咗喺我屋企個大廳，拎住支竹喺度咬。
「邊個買咁大隻公仔番黎？」我嚇一跳，唔通係我男友Billy想畀個驚喜我？
呢個時候，隻熊貓郁咗一下。
哦，係人扮嘅！我衝去佢背後想搵拉鏈，但摸黎摸去都搵唔到。
「你摸得我好唔舒服。」把聲係直接傳入我腦海，好似通靈咁。
我尖叫：「嘩，有妖怪！」
「我唔係妖怪，我係熊貓！」隻妖怪好嬲咁回應。
我好奇：「乜熊貓都可以穿越架咩？」
「唔通你以為得人類可以？種族歧視。」熊貓撇撇嘴。
佢又講得有道理，我繼續問：「咁你點解會穿越黎我屋企？仲可以同我溝通？」
「果陣情況危急，我俾隻猛獸追殺緊，就啟動一次性法寶，隨機穿越去一個鍾意熊貓嘅人屋企，並且認佢為主人，只可以同佢溝通。」
坦白講，我第一下知自己有熊貓做寵物，成為全世界唯一一個可以同熊貓溝通嘅人，我覺得自己好幸運。
但當我問熊貓，佢識做乜野，而佢只係答「食野」果陣，我就有啲猶豫：「我無竹畀你食。」最多搵塊樹葉。
熊貓鄙視我：「熊貓係雜食動物黎，我食肉、食昆蟲乜都得，乜妳咁無知識架？」
我都好無奈：「咁通常廣告、公仔果啲熊貓都係拎住支竹。」
「形象黎啫。你地廣告上面啲女人，個個都唇紅齒白，妳咪一樣成臉暗瘡。」熊貓再次鄙視我。
我發現，佢雖然個樣好可愛，但講野好無品。
不過養熊貓，又唔係一般寵物，有得我養就應該滿足啦，唔通我仲嫌三嫌四，可以揀過第隻咩。
於是，我問晒佢啲生活習性，拎咗個熊貓飼養指南，就開始我嘅養熊貓生涯。
老實講，養熊貓真係好煩，佢又揀飲擇食，又對我屋企嘅佈置諸多要求。
我間屋咁細，幫佢沖一次涼，都搞到雞飛狗跳。
「唉，又要買咁多野食。」我望住手上果張「熊貓飲食清單」，再摸下自己個銀包，忍唔住嘆氣。
養熊貓無得炫耀之餘，仲要咁麻煩，我都有啲後悔。
唉，所以養寵物之前，確實要諗清楚，「見到佢可愛好鍾意」同「打算養佢一世」果種鍾意，係兩回事黎。
若要人不知，除非己莫為。
呢句說話，原來擺喺熊貓身上都岩用。
熊貓感受到我嘅不滿，笑笑口咁同我講：「你反悔都無用啦，依加成間屋都係我住過嘅痕跡。就算你想送我去海洋公園，政府都當你偷運、私養國寶。」
咩啫，講到我好似想棄養佢咁，我都知養寵物係一生一世嘅責任，唔會逃避。
