上集：https://post.shikoto.com/posts/145184-【聖誕節特獻】我嘅職業係：聖誕老人（上）
去非洲唔平架喎，經理實唔會加Budget畀我地架，唔通阿洪又有好辦法？
我提出我嘅疑惑，阿洪詭異一笑：「你記唔記得，每個聖誕老人都有配給馴鹿架。」
我記得，雖然我通常都搭地鐵，但我都好鍾意隻鹿架，始終係好拍擋。
阿洪繼續講：「隻鹿如果死咗、走失咗，公司會配給一隻新鹿。」
我都係唔明。
阿洪索性直接講：「賣咗隻鹿，咪有錢買機票囉。」
「賣？賣去邊？」我呆咗。
「依加啲野味好受歡迎架，鹿肉咁補。你要賣你果隻就話我知，我有門路。」阿洪笑得自信。
呢個時候，我先知道，原來好多同事已經賣鹿買機票去非洲。
我唔反對去非洲送禮物，但馴鹿係我地嘅拍擋！
可能去到現代社會，佢已經唔再有用，唔代表佢我地應該食咗佢架嘛。
我番到屋企，望住自己隻鹿，諗起其他馴鹿嘅遭遇，愈望愈心痛，仲邊有心機去收集快樂。
唔得，我唔可以睇住咁多馴鹿成為盤中餐！
於是，我先打聽果間收購野味嘅鋪頭。
原來果間鋪頭喺鄉下，對於殺鹿都無咩規管，
我一去到，就見到好多馴鹿被困，不斷悲鳴。
「你睇吓啲鹿，好新鮮架，聖誕食火雞過時啦，食馴鹿先係新潮流。」個店主以為我係客人，不斷咁推銷。
「你要幾多斤？要咩煮法？有無話想要咩部位？」
「如果我想成隻買呢？生勾勾咁買。」我見店主有啲懷疑，即刻話：「我屋企人想養鹿，養大啲先宰。」
店主報咗價，唉，果然好貴。
我就算用晒自己成副身家，都救唔晒啲鹿。
番到屋企，我隻鹿見我情緒咁低落，就痴埋黎安慰我。
摸住佢嘅鹿毛，我終於諗到辦法。
我幫我隻鹿影咗輯寫真，上網籌錢，搞咗個「聖誕救救小鹿大行動」。
可能鹿呢種生物，對都市人黎講，真係幾有新鮮感。
到聖誕節果日，我籌夠錢，買晒店鋪嘅所有馴鹿，亦全程直播，畀大家見證。
馴鹿重獲自由，感動到流眼淚。
呢個時候，我見到佢地背上浮現出粉紅色心心......係快樂！係聖誕老人先睇到嘅快樂能源。
原來唔止小朋友，連動物身上都有。
一大堆滿滿嘅、逃出生天嘅快樂，令我今年馬上夠數。
自此之後，我就搞咗個義工組織，專門救被捉走嘅「野味」。
無乜人知道，除咗義工之外，我仲係一個聖誕老人，收集動物嘅快樂。
由於動物好易開心，只要生存落去、有野食就得，實在太容易跑數。
不過，有一件事我一直諗唔通，聖誕老人唔係收集小朋友嘅快樂架咩？點解動物都可以？
我問經理，經理都答我唔到。
直至公司周年晚會，我遇到「快樂聯盟」嘅長老，一個好老好老嘅聖誕老人。
佢話我知，原來一開始，「快樂聯盟」係收集成年人嘅快樂嘅，
但係社會愈黎愈繁榮，成年人就更難滿足，做咗皇帝，又想做神仙，
豐衣足食、平安健康，已經無辦法令佢地開心。
於是，「快樂聯盟」將目標放落小朋友身上，直到依加......
長老嘆氣：「唔滿足，係因為擁有得太多。如果朝不保夕，只要活下去就好滿足。」
係啊，就好似馴鹿咁容易滿足。
呢次馴鹿事件，令我學會咗呢個人生道理。
但我估唔到，其他聖誕老人會利用呢個道理。
第二年嘅聖誕節，聽聞有聖誕老人捉起啲小朋友，百般虐待，等佢地精神將近崩潰再放走，收集佢地劫後餘生嘅快樂。
唉，又一單聖誕老人界嘅醜聞。
當然，呢個聖誕老人都被革職，而我嘅愛護動物義工組織，就蒸蒸日上。
同一個道理，有人攞黎救小動物，有人攞黎虐待小朋友；
同一隻馴鹿，有人用黎騎，有人賣去做野味。
尋找快樂嘅路上，每個人都各出奇謀，
但只有大家一齊快樂，先係真正長久嘅快樂。
－完－
