.jpg "【中秋節特獻】作為一隻玉兔（上）")
大家有無諗過，嫦娥喺月亮上面住，點解要配隻玉兔畀佢？
作為果隻玉兔，我一直都諗唔通呢個問題，
每次我畀嫦娥使喚，我就會諗，神啊，點解唔配個菲傭畀佢？
我嘅主要職責，就係番地球採購日用品，嫦娥唔可以離開月亮，只有我可以，
但又要經嫦娥簽名批准，佢仲可以隨時召喚我，令我無辦法拋棄佢。
我就無咩超能力，雖然可以變成人形，但只限喺地球，喺月亮就只可保持兔形。
你明啦，嫦娥呢個上司又無糧出又麻煩，
假如佢無體形優勢，我終有一日會忍唔住，打到佢豬頭咁，唔係幾好嘅。
我每年最期待果個月，就係落地球幫嫦娥買野。
無錢點買野？好簡單啫，我只要化成一個靚女，收下兵，再將嫦娥要買嘅野列一個清單，叫啲兵送禮物。
一邊玩，一邊收禮物，中秋節前就要番月亮。
其實嫦娥已經係仙女，唔使食野，但每年佢都會叫我買月餅，可能係情意結掛，始終中秋節係屬於佢嘅節日。
但係今年，佢好嬲。
隨住一連串「嘩喇喇」嘅巨響，嫦娥將所有月餅盒掃晒落地。
「老細，月餅唔好食？」我明明食過架，雖然無胡蘿蔔味，但味道都唔錯。
「你數下啲月餅盒，有幾多個係用我個樣？以前啲月餅盒，幾乎個個都有我份，依加寧願直接印個月餅上去。」
嫦娥聲淚俱下：「仲有月餅廣告，以前會搵個女星著古裝扮下我，依加男人都代言月餅！兔兔，你話大家係咪忘記咗我？」
「點會呢？你係永遠嘅女神，有仙氣又夠貼地......」收咗咁耐兵，我嘅拍馬屁神功都有番咁上下功力。
嫦娥望住我：「咁你話，依加中秋節啲小朋友環埋一齊，仲會唔會講我同后羿嘅故事？」
見到我嘅沉默，嫦娥已經知道答案。
佢拎晒所有珠寶首飾出黎：「我啲棺材本畀晒你，唔理你用咩方法，一定要重建我嘅聲名！」
嘩，如果唔係嫦娥可以召喚我，我直情想捲款潛逃。
我落番地球，賣咗啲首飾，本來以為「有錢使得鬼推磨」，好容易完成任務。
我就幫嫦娥開咗個FB專頁，講下佢嘅故事，有幾多個大詩人為佢寫過詩，再畀錢做FB廣告。
點知使咗一大筆錢，Like嘅都係古怪外國account，仲要無人留言。
我要改變策略！
我就模仿啲當紅專頁，分享下娛樂新聞，食花生做評論，果然多咗好多回應。
但每次我講嫦娥資訊果陣，個post就無人理，甚至有人問：「點解呢個花生台要叫嫦娥？改錯名喎。」
