好啦，到最後一章，亦都係我想講嘅一章 － 「銷售偽君子」
相信唔少人身邊都有人做保險，金融，地產至於傳銷，好彩嘅話，佢地仲可以同你做到朋友，或者佢至少佢真係當你朋友，唔係當你係做客。
我係到勸廿歲出頭嘅朋友，你要小心收到一班好耐無見，甚至唔係好熟嘅朋友聯絡你，佢地下半段就會吹噓自己最近撈得好掂個種架啦，當你個樣開始感興奮，諗緊點樣可以一個月內搵到自己成半年都搵唔到嘅人工，佢就開始黎料。
「喂，其實你咁醒目口才又了得，呢行實岩你。」
一個再無自信嘅人，內心深處都對自己都存在住一種認同感，根據巴納姆效應，呢份認同感，十之有九都係差唔多。
「聰明了得」呢個字就真係絕大部份對自己內心嘅感受
「下？我真係得！？」
你自己都懷疑緊由細到大都比人笑你蠢，但今日竟然有人讚你叻！？佢係咪呃鳩我呀？
「真係架，你係無自信姐，所以你對自己嘅決定會猶疑！」
係喎，我真係無乜自信，而且我成日都預計過嘅事，最後都會發生，不過我無同人講之麻。
你繼續說服自己，因為你真係好想成為一個聰明了得嘅人。
「你無謂埋沒你嘅才華同天份丫？」
岩啵，我真係唔想自己嘅才華浪費係呢間垃圾公司到呀。
以上內容十之八九都係咁上下，你好彩個朋友只係做保險，地產嘅話咪當考多個牌防下身（雖然我好少見過有人離開呢一行又會返去）但如果佢係傳銷又或者呢類嘅Sales，只有祝你好運。
我咁了解因為我都中過招，亦都令人中過招。柒就要認，知道自己柒過先會有進步，否則只會再柒多次。
無可否則，有人天生係食呢行飯。其中一種就背景好，一入行就可以做Top Sales（即係身邊都係啲有錢Uncle Auntie個種）不過呢種絕無僅有，另一種我到最後會講。而絕大部份都係我呢種肥料層嘅窮人，一心諗起向上爬，而陷阱就為我地呢種人而設。
不過搞清楚，我咁講唔係否定哂所有做推銷行業嘅人，但呢一行壞人真係特別多，你唔信可以去下旺角附近嘅健身中心到打個轉，或者去Wechat ADD個金融妹。
而大師兄就係導我入局嘅人。
正如我之前所講，大師兄一個咁無人緣嘅人點解都可以令我入局？
當時我正值失戀同失業期間，個人都無哂目標，完全唔知自己可以點做，當然最重要嘅係 － 我柒
大師兄當時介紹嘅就好幾年前大家成日都會收到嘅進修基金Cold CALL。
當時萬念俱灰嘅我就係比大師兄打動，比返小小人生意義我，至少個刻佢呃到我，令我好過少少。
但大師兄當時已經完全中毒，開口埋口都係講信念、意向，而同場入面嘅人都係差唔多咁上下痴線，另一邊又會教你咩係銷售技巧（但其實都係一堆廢話）
不過以大師兄呢種吹水性質嘅人，由佢講真係變得好撚生動，個下聽完真係感覺耶穌再次降臨係你見前咁（係架，所以個陣真係好撚痴線）
個陣最興就係講ＡＢＣ理論，ＣＣＣ理論
Ａ Stand for Attitude
Ｂ Stand for Behavior
Ｃ Stand for Commitment
諸如此類起初聽落言之成理，醒來後發覺狗屁不通。
—
不過最變態嘅人，啲上層就會開始用物質就引誘你，將你啲底線一步步咁退落去。
得閒拎啲車匙、貴錶，最撚戇鳩就係拎一大疊現金出黎。（以上都係倫敦金Sales三寶）
大師兄試過返工拎咗一疊為數大約二萬蚊現金，放係檯到，然後同我地講：
「邊個今日開到單，呢到嘅錢就係佢！」
當然大師兄都唔蠢，以當時嘅開單次數，有咩乜可能會一日內成功丫？
做邊行都好，靚仔靚女一定有著數，但眼見啲靚女成日著到成隻雞咁，都開唔到單，你都會開始考慮下自己使唔使拉低條褲。
當然做仔，就梗係唔使你除褲啦，但為咗證明你自己唔係垃圾，你開始轉向對朋友親人埋手。而你一出手，你就係一件垃圾。
當晚公司嘅人只會教你「成功，成功，成功」！
乜Ｑ野係成功？開單，搵錢，搵到下線就叫成功。過程你點做，無人知亦無人想知。（詳情可以參考The Wolf of Wall Street，有見及此，我幾討厭呢套戲。）
幸好我仲有少少良心，只係對外人入手。不過以我呢種咁廢柴嘅想法，又點會可以令到我成功呢？
所以無耐我都逃離埋呢班咁嘅人。
—
呢段時間絕對係我人生嘅黑暗期，無錢無人生無尊嚴。
不過慶幸係我無推過身邊嘅人落火坑（應該話只係唔成功），所以我仲有朋友。亦因為我無不擇手段去賣野，所以我個良心仲存在。
至於大師兄就繼續做佢銷售員，後來仲成為激勵課程嘅成員（佢又會再次出現係另一章，興奮呢？）
好多人為開單真係乜都做得出，男又好，女又好，我都見得太多呢種事。
銷售人員無錯，只係錯在有人利用人性弱點去害人。
就算佢地唔做呢行，呢種價值觀去到另一個位置都係只會損人利己
咁多年黎我有一個經驗：
無人會同你佢份工係，唔使做，好簡單，搵大錢，一齊做。
只有搵水魚嘅時候先會咁講。
李嘉誠都話自己辛苦命，你信誠哥定信班Sales？我兩個都唔撚信！
有時間關心下你身邊嘅朋友，以免佢地比人又導過。
如果你分享埋呢段文就更加功德無量啦。
—
總結：
其實呢五章節，都係一少部份，其實我仲有好多野想講。
不過你知啦，寫太多長又無人睇（雖然我都唔知會唔會有人睇）。
純粹想分享下自己唔鍾意嘅人同事，最後嘅「銷售偽君子」絕對係我多年想講嘅野，當時真係抑鬱，依家諗起又好柒。
不過真係好好彩，無成功導過朋友入去同埋買野，否則另一邊可能又有人係到寫緊我嘅衰野，哈哈。
