時下嘅中，老年人最鍾意就係挑剔下啲後生仔，不外乎都係話自己以前後生乜乜乜乜乜乜乜乜乜乜乜乜乜乜。（你聽過，你就知道真係好長）
講到咁成熟穩重，見慣風浪，但你出去返多幾份工，見多少少人，你就知道呢種中年人好多時同啲小學雞無咩兩樣，分別係小學生唔識得搵咁多藉口，而佢地就可以大條道理，將自己反智行為合理化。
場地係我同肥安姐結緣嘅地方，當時包括我同肥安姐一行十人，當中兩位就係我地嘅Leader － 保全叔，狂尼姑
當中除左我同另一位新入職嘅男仔，其他人都係公司做咗超過２０年絕對係傳統嘅Old Sea Food。
不過正如我之前所講，當時嘅工作內容真係hea過ＴＶＢ嘅劇，除咗間中要入下File同斟茶递水，基本上都係聽肥安姐電台。
我對呢種相安無事嘅生活工作好滿意，直到嘅「工作」真正來臨。
係到簡單講下「工作」，其實都係幫黎見工嘅人影下相，對下表格，再安排返入房時間，但係點解咁大陣仗，主要原因係坐入房嘅全部都係年薪過幾百萬嘅高層中嘅高層，所以乜野都要做到完美，就連房入面要幾多支筆，放嘅方向都要有規格。
雖然講到咁嚴格，但實際上都係無咩工作壓力，後來我被調上去２層樓，一個比較忙嘅位置，就係每日都要輸入大量求職者嘅資料同評語（不過都係無咩做）
我幾肯定班Old Sea Food平時係舊區嘆慣，依家黎到呢個地方都可以夠薑話好忙好辛苦。
不過算，我又無咩歸屬感，關我閪事咩？準時放工就可以。
保全叔雖然都係Old Sea Food，但佢個人比較易相處，算係我無咁反感嘅一個。
心諗做孝子嘅野，我唔會多多意見，更何況工作根本少一兩個人都唔會有影響，咪少個人洗杯姐。
不過世事就係咁有趣，平時見佢地嘻嘻哈哈好似好撚Friend咁，原來係我被人調走期間已經分哂黨派。哈哈，１０個人都有小圈子，Old Sea Food嘅世界真係奇妙。
話說狂尼姑黨就認為保全叔黨一干人等，工作散漫影響其他人，更加直指保全叔因為成日請假早走，影響埋狂尼姑本人放假嘅機會。
我知，真係知，因為係狂尼姑個老公講嘅。
是否很驚訝講不出說話？點解會係由佢老公講？
係囉，我都想知。
本來我呢種閒人都唔知多理佢地嘅是非，直接到某日突然係放工之後嘅時間，狂尼姑瘋狂咁send錄音黎，我都覺得奇怪，平時放工後大家都各自各玩，點會突然咁熱情。
真係Hi auntie！男人聲黎嘅。
「呀保全叔！！你知唔知你做乜野呀？」
「你影響哂其他人做野呀！」
下刪千字。
我當時就意識到，呢個女人好有資格做特首。係佢老公用佢電話轟炸完一輪，保全叔又死狗認錯，狂尼姑竟然夠膽死話唔關佢事。
特首辦嘅發言，特首係唔知情，我老公拎我電話黎係個工作群組到轟炸你，我更加唔會知情。
我好好奇，一件簡單到不過嘅事點解要搞到咁複雜。
只要狂尼姑直接同保全叔講，我想某日放假。咁就解決哂。你話保全叔唔肯，你直接插佢，我無意見。
不過好明顯，佢無咁做，佢選擇咗一個引起大家話題嘅做法。
然而，我曾經新部門嘅同事分享呢個故事，當然，我無同任何人講過兩位嘅身份，年齡同職位。
「依家啲後生仔係咁，做事唔識得圓滑小小。」
「係囉，做多幾年人，佢地就唔會咁！」
「好彩你唔似佢地咋架，比心機呀。」
真係醍醐灌頂呀！
