記憶中,我係小學雞時代真係好鍾意吹水,不過回想返,其實唔係我因為我鍾意吹水,而係我好想將自己幻想出黎嘅世界同故事向大家分享。
所以我好鍾意同人講,我發夢夢見乜乜乜。
不過你識吹時,人地都識得吹,橡筋會吸血,四樓女廁有鬼,學校以前係亂葬崗,十二點時指住個天會吸收到力量等等,做過小學雞都應該聽/講過。只要吹得中,收視率自然會提升,係小學生嘅心目中你就係一個吸引人注意嘅英雄。

不過你唔好以為呢種咁低級嘅交友方法到你中學時期就會消失,有好多人都仍然保留「傳統」,帶到幾十歲都係咁。

我同肥安姐係上年年頭,因為公司亂鳩咁派人去做臨時工而相識,由於當時係要服務班太皇上,浪費人力資源係必須要。
明明一個人就勝任有餘,但為咗「盡善盡美」,公司會選擇安排三個人在場Stand by。正正因為咁,大家平時返工就吹水多過做野。
同場十個人,肥安姐口水多過茶嘅性格就顯得鶴立雞群。不過我無可否認,一個圈子裡面有呢種人的確係會熱鬧得多,而且大家會快啲混熟起黎。

但肥安姐嘅功能又點至咁少呢?
基本上由生活小知識,公司福利,男女感情,食物安全,到捉鬼捉僵屍,肥安姐都可以講足幾粒鐘。
唔係講玩笑!肥安姐嘅演繹功夫絕對唔比電台DJ差,基本上每個故事起承轉合,抑揚頓挫,都可以表演得淋漓盡致,我每日返工都當正自己聽電台,一邊聽一邊笑。

肥安姐最出色嘅節目都一定係靈異節目,基本上一日六粒鐘節目時間表,單講佢撞鬼同捉鬼已經佔咗8成,無他嘅,收視率好丫嘛,其他同事又信到十足,比哂反應,如果呢個工作崗位係固定,呢個節目應該長做長有,可能比「愛。回家」仲要長命。
話就話肥安姐多野講係無咩問題,不過細心少少你就知道佢所講嘅「真人真事」,「自己見過」,「朋友經歷」同網上面相傳嘅都市傳說有八,九成相似。
話說有日,A同事話自己成日係床頭食零食,有時會有蟻

肥安姐照舊智者上身:
「呀囡,話你知,真係唔好將啲食物放係房到。點解?因為蟻好鍾意搵窿捐,你訓覺個陣,啲蟻會走你的耳窿到。我舊同事個老婆就係咁,成日話頭痛,以為食頭痛藥無事,到最後照X光先發現半個腦被蟻食咗,唔夠3個月就走咗,我個陣都有去個喪禮,真架囡,唔好再放食物係房到啦,信我。」(粗體為肥安姐時常用詞)
我轉個頭就係Google 到尋找相關資訊,結果發現如果佢所講咗嘅係真,一係我撞鬼,一係就係肥安姐撞鬼。

不過肥安姐呢種只為觀眾緣而吹嘅,我自本身就覺得問題不大,然而有種人去尋找「悲劇主角射燈」而去吹水,我個人就好反感。

B媽係我學生嘅媽媽,因此工作關係,我地都不時係Whatsapp到同大家聯絡,B媽好自動同健談,本來我以為冷冰冰嘅家長群,又因為佢而變得好熱鬧。(可能呢種就係『水霸王』嘅特性)
本來大家都分享下家庭樂,同伴侶相處之道我都覺得溫馨,但頂你個肺,傾下傾下傾埋你老公點樣搞大你個肚,又查詢埋人地行房次數,雖然大家成年人,但我真係唔想知呀!
不突止,仲要日日話自己屋企環境幾差幾慘,月底要捱麵包先得,繼而再分享兒時被性侵,個囡囡又有隱性病患,再講原來自己個老公出面又有第二個。
一套六十年代要演30集嘅家庭悲劇,戲情只係發生哂係你一個人身上!
仲要一個星期就全套戲情就出現哂係個群到,我個人真係好慢熱,我接受唔到呀!!

B媽一再強調自己屋企經濟情況真係好差,在下細佬雖然唔係咩星級老師但收費都唔算係平啵……而且時不時見到佢地成家人去乜乜主題公園到玩,呢一切都不禁呢到我同其他家長心中都有同一句說話

「係唔撚係咁慘呀?」

不過我作為老師,都盡量唔好太過有偏見,至少個一刻嘅理智係叫我做咁。但直到佢做咗一個行為,我就完全改觀。

劇情仲停留係B媽話自己老公兩晚無返屋企訓,突然之間B媽就問邊到有得蒲。

下?下?下?下?下?
蒲喎!?呀姐?你老公唔係前兩晚先無返屋企訓咩?你蒲咩呀?

聰明嘅各位都應該知道,佢又係到引人注意。B媽一再強調自己想去出去認識下新朋友。
哦?去蒲認識新朋友,無問題嘅,我咪話我有間酒吧我去開都幾舒服。

「有冇得跳舞架?」
大佬呀,酒吧黎架!!!!!!邊有位你跳舞呀!!?!?!?
我沉默一陣都唔知點答佢,另一位相對年青嘅家長就介紹尖咀一間有得跳又有得飲嘅地方。至於B媽為何無啦啦要走去酒吧認識新朋友?Who Fucking Care?

我好記得當日係星期六早上,我9點幾起身見到B媽send一大段文字比我,我心諗做乜鳩?內容大致如下

「XXX

我知道最近我好奇怪,但我真係覺得好無可奈何,老公又咁,我忍得太辛苦啦!我好想出黎放蹤自己!
我尋晚去玩,我仲有魅力架!仲有好多仔包圍住我,請我飲酒架
我好想離婚,我好想做返自己」

原文大約係呢段字嘅三,四倍,最重要嘅係XXX,唔係我個名。
係另一位家長,我睇完段字立即SEND比該名家長。

「B媽有冇SEND呢段野比你?」

「冇喎」

「戇鳩!」

扮飲醉酒SEND錯信息!?救命呀!幫我搵人了結我生命呀!
其他幾件知情嘅家長當然就繼續係到抽我水,話我呢次有艷福。
我都必須係到承認,如果佢好似謝安琪咁樣,效果當然係180度唔同,但你老闆……

其實我身邊都見唔少呢種人,不過B媽可以話係呢種人嘅表表者。
情況係咩? - 唐伯虎想入去華府做家丁遇到梁榮忠

哈哈哈,我條命都比埋你!!邊個夠我慘!

不過吹嘅姐,事實係咪真係捱麵包?我最近見先佢個囡同老公換咗對新波鞋,仲貴我個對。