「人生流流長，實要遇上幾條撚樣。」
呢句說話當你出黎社會做多幾年野，你就會深深體會到點解細個讀書個陣，個個都你叫珍惜求學時期嘅朋友同時光。
因為當你開始供強積金同交家用比老母個日開始，你就會知道你人生係返唔到轉頭之餘，見到嘅「仆街」真係多不勝數。
回想當日只係喺你隔離位成日自言自語嘅Michael，坐你前面話你隻腳頂到佢嘅Tracy，同日日捉你頭髮長嘅副校長，一切都唔夠你投身社會見到啲仆街咁仆街。
本章會嚴選本人覺得最抵死嘅五種人物，第一個就個種永遠都強調自己「我唔怕得罪人」嘅人。
我承認，係我學童時期的確係曾經好欣賞過呢種人，敢作敢為，與眾不同，好似係一種天生嘅領導人。
幼稚嘅我亦多次幫呢種人帶上無限神聖光環，直到我見一個相當特別嘅朋友 － 大師兄
大師兄當然唔係我大師兄啦，佢有呢個名號，全因佢個種乜都包拗頸，句句出口都要得罪人個種性格先至會有「大師」呢種名號。
奇怪嘅係點解以往我一直都會咁認同呢種人，但偏偏對大師兄又可以咁反感呢？
所以話成長係幾咁重要，睇野全唔全面係好影響你自己本身嘅智力發展！
之所以我幼稚，曾經盲撐呢種人全因我只見佢地唔怕得罪人嘅一面，而未見到佢地死狗認錯嗰一面。
大師兄就係比我見識到乜野叫「對住乞丐扮權威，望到皇帝就跪低」
講白啲，呢種強調自己「唔怕得罪人」嘅人，主要只係「唔怕得罪你」！
同大師兄唇槍舌劍只係家常便飯，身邊唔少朋友成日比佢激到頭頂出煙就係因為佢一句口頭禪「我有個句講個句！呢個就係我！」（詳情可以參考火影忍者嗚人的對話，無錯，大師兄係好鍾意嗚人）
唔知大師兄係睇火影睇上腦，直頭當自己係嗚人，定係呢種人都習慣用冠冕堂皇嘅口號黎包裝自己歪理。
首先要講明，我本人唔認同將黑講成白，錯嘅當做岩，但做人互相尊重係一個聰明嘅選擇。言然呢種人，大師兄就係喜歡係言詞之間同你爭論，為贏對方乜都講得出口，然後就會補一句「我份人係咁，我唔怕得罪人！」
聽落真係好型，聽落。
只要你見到佢地死狗個一刻你就會知道，一切都係扮出黎。
大師兄份人除咗鳩ＵＰ多過呼吸之外，仲係典型騙子（佢將會係下個一章節到再次出現）
曾經多次同大師兄係唔同地方合作，同工作過，你就了解到呢種人係面對真正嘅威脅下係會自動妥協。
雖然我同大師兄，同另外兩位朋友係唔同時期入餐廳做兼職，但公司同事都知道我地係相識，由於大師兄「個人風格」相當強烈，有同事希望我同大師兄溝通下，無謂搞到大家不歡而散。
同事向我講述大師兄兩大罪狀：遲到，成日客人拗
喂大佬呀，做飲食業，你痾屎唔洗手直接插隻手指落去杯水到，啲客未必一定會理你，但你夠膽同客拗，你就注定無運行。（好彩當年強國人無咁多同拍片風氣無咁勁，否則大師兄應該可以紅過巴士呀叔）
「明明係個客話要３成熟，咁我咪落囉，依家反轉頭唔要係咪佢錯先？！」
「我覺得你好廢囉，唔通唔係我錯都要認？我同佢講話呢個就係３成，我唔會換過囉，唔係幫公司慳錢，呢Ｄ係原則嘅問題！」
「我係同佢講，佢唔識食架啦，你知我份人係咁，我唔怕得罪人！」
大致上對話就係咁完，第二日經理叫左佢入房，３分鐘之後出黎。無被人抄到，唔通經理真係認同佢！？！我好驚，我驚經理係咪鬼上身，定係大師兄用咗咩邪門方法落咗經理降頭？件事無可能咁快搞掂。
到底頭先個３分鐘發生左咩事？係咪經理同愛與和平去感動左大師兄！？
「哦，我話你再咁嘅態度你唔使再返工。」經理Fanny無乜表情咁同我講。
我個下都無乜表情，因為我個邏輯接受唔到。等於尋晚先話企硬無神論嘅人，有任何宗教信仰都白痴嘅人，今日竟然走左去信耶穌？仲叫我返教會？
後來大師兄表示：「無架，我覺得佢講野有道理囉我咪聽囉。」
咁又係，有咩有道理得過炒你魷魚咁有說服力丫。
其實唔止係大師兄一個，越要強調自己敢言嘅人，越多都係啲見風轉陀嘅牆頭草，只係會唔會咁岩比你見到咁解。
世上我只相信有兩個種人係唔怕得罪人嘅人：
一個就係真正勇敢，隨即準備為自己嘅理論而犧牲嘅偉大使者（相信香港係唔會再有呢種人）
一個就係真係大師兄呢種，只會得罪啲「我得罪得起嘅人」
其實大師兄呢種人並不罕見，所以我後來我都會選擇性去得罪一下呢種咁「唔怕得罪人」嘅人。
