我買咗一間屋，一間鬧鬼嘅凶宅。
十年前，一個男人喺呢間屋虐殺咗個女仔，再碎屍。
呢間屋鬧鬼鬧到人盡皆知，上一手業主都無呃我，個女仔夜夜冤魂不散，搵幾多法師驅都驅唔走。
望住佢深深嘅黑眼圈，同埋呢十年頻密嘅轉手記錄，我知呢間一定係鬼屋。
否則，我都無可能用咁低嘅價錢上到車。
唉，鬼有乜可怕？可怕得過窮？
搬入去嘅第一日，我就同自己講，除非隻鬼殺咗我，否則我絕對唔會因為鬼而搬走。
第一晚瞓覺前，我就聽到滴滴答答嘅水聲，牆上慢慢出現一行血字：「我死得好慘。」
我大大聲聲講：「我知妳點死丫，出黎啦！」
既然呢間屋真係有鬼，我就同佢傾掂數，當室友咁啦，之前果幾手業主都無死，證明隻鬼都未必會殺人。
一個女仔慢慢現出身影，出乎意外嘅係，佢成隻鬼都幾乾淨，靚靚女女咁，完全唔似鬼。
女鬼翻白眼：「如果你頭上有雀屎，你番屋企都會洗頭啦。我死咗十年，梗係搞到自己乾乾淨淨。」
估唔到隻女鬼又幾幽默，咁我就單刀直入：「我好同情妳，但妳嘅死真係同我無關。我只係想有個地方落腳，不如我地河水不犯井水。」
女鬼即刻解釋：「我唔係想害你架，我好悶，想搵人傾下計。」
原來佢叫小倩，十年前慘死後，冤魂就困喺呢間屋入面，出唔到去，
但佢始終係鬼，要有人主動同佢講野，佢先可以現身溝通。
「我晚晚寫字，就係想你地同我講野，但個個見到啲字都嚇走咗，得你會叫我。」小倩好感激咁望住我。
「妳寫『我死得好慘』，之前啲住客梗係驚啦。」
小倩皺眉：「唔係架，我試過寫『你好，不如我地做個朋友』，啲人都嚇走咗。」
「傻豬黎，妳應該寫『我知道今期六合彩號碼』丫嘛......」
果一晚，我同小倩傾咗好耐。
其實小倩無乜要求，當年殺佢嘅凶手已經坐緊監，小倩又無話想佢死。
「我只係想有人陪我傾下計。」小倩咁樣同我講。
一個咁可憐、咁可愛、又唔高要求嘅女鬼，我點會拒絕佢？
當然更重要嘅原因係佢幾靚女，唔係果啲跌條脷出黎，見到都食唔落飯果種啦。
自此之後，我就開始咗同小倩嘅同居生涯。
唔好誤會，我地並無越軌行為，應該話，想有都無辦法，小倩無實體，我隻手只會穿過佢嘅身體。
但係每晚放工番屋企，就有個靚女喺度等我，感覺都幾甜蜜。
日久生情，我愛上小倩，同佢表白，佢亦都接受咗。
可能大家唔明，我點解會揀隻女鬼做女朋友。
事實係，有邊個女人，會揀一個窮到要住鬼屋嘅醜男？除非佢本身係隻鬼啦。
我敢講，小倩如果唔係死咗，如果唔係被困喺呢間屋，無其他選擇，佢都唔會揀我。
至少佢唔使買名牌，唔會想搬大屋，唔苛求我「有上進心」，已經係難得嘅好女友。
我同小倩嘅感情愈黎愈深，但所有「人鬼情未了」嘅故事，都會出現一個搞風搞雨嘅道士。
