「你明知佢份人係咁，做乜仲要同佢講呢啲姐？」Ｔ仔勸緊我。
我聽完立即火多幾錢重：
「咁即係依家臭脾氣大哂？全世界都要就鳩佢一個？」
Ｔ仔越勸而出事，我真係嬲，點解出名仆街就可以有特權？
【搵交嗌】
朋友Ｙ特別鍾意搵位Show off，好想比人知道自己有幾醒目，幾叻仔；而大家都知道我就特別鍾意挑呢款人機。
某日大家傾計講起一首歌，朋友們都吹得開心，仲唱埋出黎。朋友Ｙ就開始黎料：
「乜你地依家先聽呢首歌咩？我１年前都聽緊啦喎」
『係喎，好叻喎，好勁喎』
無，我無出聲，大家都無講啲咩。Ｔ仔仲繼續話
「係呀，都幾好聽，最近聽到入哂迷。」
歡樂氣氛又繼續，不過全行都知本皇份人小氣到爆炸，已經有點不悅。
無耐大家話題轉咗搵生意，都不外乎講啲Ｒ著數嘅客人，想搵人做野但又唔比錢。
朋友Ｙ又黎：
「其實係睇你自己識唔識做生意姐，我上次搵個JOB就已經一萬囉，傾價嘅野要睇你自己有冇口才囉！」
大家又無出聲，我終於忍唔住
「勁啦，咁上次你話比人屈咗做個無錢JOBS最後R唔R得返份人工返黎？」
骨頭多過乜，大戰就一發不收拾。
【勸交】
朋友自然就勸我唔勸佢。
當然啦，比你揀都勸個識聽人話嗰個啦。
我串多幾句就收聲，Ｙ都仲繼續爆。
佢覺得自己一直係最型，一講佢柒啲野佢就失控。
「你明知佢份人係咁，做乜仲要同佢講呢啲姐？」Ｔ仔都係講返呢句
我唔順氣，係因為認屎認屁無所謂，唔好踩住人黎讚自己。
我唔順氣，係因為大家都覺得臭檔嘅人，應該避得就避。
我唔順氣，係因為大家習慣將順住惡人脾氣，先係合理
好脾氣嘅人多數都會就人，變相一班脾氣差嘅仆街就可以經常被遷就。
【後續】
呢件事已經大約一年前嘅事，事後我同Ｙ都傾過計，我解釋你要認叻唔緊要，小心你嘅詞語會令到人地唔舒服。
事實唔但止係得我一個覺得，只係大家習慣唔出聲去就你一個。
MAN TALK完畢，大家渣渣手就算。
點解我會寫返呢單野，因為江山易改～～～～不過今次主角唔係我。
我只係覺得
唔好認為「明知佢份人係咁」就順哂佢意。
當佢朋友其實你只係縱容佢嘅行為，佢發脾氣唔代表佢係岩。
因此今次又係我出馬去「解釋」比佢聽。
