上集：https://post.shikoto.com/posts/132687

當然，做事要一步步黎，我打算先試下我班曱甴員工嘅威力。
果日，我擺咗幾百隻曱甴落個公事包度，偷偷帶番公司。
其實，我單戀同事小薇好耐，但佢總係覺得我無乜特別。
大部份女人都怕曱甴，如果佢突然被大量曱甴騷擾，嚇到花容失色，
我就虎軀一震，散發霸氣令曱甴退散，英雄救美，一定可以令佢留下深刻印象！
我已經同曱甴團夾好晒，幾時出場幾時退場，萬事俱備只欠東風。

我知道，今日輪到小薇加班，我就藉故留喺公司。
等到公司剩番我同佢兩個，曱甴團出場，從四方八面湧向小薇。
小薇如我所料，驚叫一聲，我會等佢驚多十秒，恐懼達到極點，我先出場。
然後我又聽到一聲接一聲嘅慘叫，而且係直接傳入我腦海嘅叫聲......曱甴嘅慘叫！
只見小薇拎起文件夾，大發雌威，不斷咁拍向曱甴團，

曱甴四散躲避，但由於數量太多太擁擠，文件夾每一下摔落去，總有十幾隻曱甴罹難。
斷肢、慘叫、屍體嘅汁液，形成咗一個災難片嘅場景。

我衝上去，搶走小薇嘅文件夾，死死抓住佢對手：「停手！」同時用意識催所有曱甴離開現場。
「Peter你傻咗？我打曱甴咋。」小薇見我呆晒，大叫：「放手啊蠢材！」
曱甴團終於散去，小薇望住桌上嘅曱甴屍，翻白眼：「走晒啦，搞到我張檯咁污漕，一陣要拎掃帚黎清理。」
「唔使妳搞，我黎執。」我有氣無力咁講。
小薇點頭：「咁好啦，我番屋企沖涼先，聽日早啲番黎做埋啲野。」

我好嬲、好傷心，我終於明白小強果句「成為我地嘅一員」係咩意思。
望住呢個場景，我唔係見到一堆污漕嘅害蟲，而係好似見到一班人、我嘅同胞，因為我嘅愚蠢，被殘酷凌虐致死，屍橫遍野。
但我可以點？唔通我可以報警拉小薇？
我只可以小心翼翼，一隻一隻咁執起佢地嘅屍體，拎番去好好安葬。

我帶住倖存嘅成員，番到屋企見到小強，忍唔住喊出黎：「對唔住，係我害死大家。」
「我地預咗。」小強安慰我：「我地族其實無咩攻擊力，只係數量多，既然靠數量，就一定有傷亡。如果無喺你度打工，出街搵野食，一樣係日日都生死邊緣。」

果一刻，我意識到，我根本無辦法用「超能力」去達到目標。
因為我忍受唔到，我每完成一件事，就要建立喺無數同胞嘅死亡上。
我只係個普通人，唔係一將功成萬骨枯嘅帝王。
我，唔係曱甴俠。

自從果次之後，我無再要求曱甴團幫我做任何野，只係買野食畀佢地，出街見到受傷嘅曱甴，都會帶番屋企。
有啲曱甴鍾意周圍去，見到趣聞，都會同我分享，我就咁多咗好多朋友。
我生日果晚，番到屋企，見到班曱甴列隊，喺地上砌咗三個字：「曱甴俠」。
我即刻搖頭：「我都無拯救地球，周圍幫人。」
「你拯救咗我地嘛。」講呢句嘅，係一隻我喺街邊救番黎嘅曱甴。
小強笑住講：「曱甴俠，唔一定係用曱甴黎幫人；都可以係曱甴界嘅大俠嘛。」

係唔係曱甴俠，我自己都唔知。
其實天下億萬曱甴，以我嘅能力，我養到、救到嘅都只係極少。
不過，依加大家都幾開心，咁咪好囉。

有能力，唔一定要拎黎做大事；
可以令自己開心，令身邊嘅人（曱甴）幸福，已經好難得。

－完－