為咗練六舊腹肌，我呢排飲食都嚴格控制，食到口淡淡。
難得有一晚，我夢見一堆美食喺我面前，多油多糖，任我品嘗，
我一啖咬落去，覺得陣味好奇怪。
我驚醒，望住天花板，先知自己發緊夢......點解我嘴裡面好似真係有怪味？
我即刻吐出黎，就見到半隻曱甴，隻腳仲郁下郁下。
半隻，即係我吞咗半隻？
我即刻彈起身，刷咗十次牙，但都無法驅散果種噁心嘅感覺。
然後我上網，搵下食咗曱甴有咩後果，使唔使睇醫生，佢會唔會喺我肚裡面產卵。
搵下搵下，突然聽到把聲：「Peter，你咁無常識架，產卵都會被溶晒啦！」
我左望右望，都唔覺有人，只係地下有隻曱甴。
「無錯，就係我。你食咗大魔王，改變咗你嘅基因，意外獲得同曱甴溝通嘅能力。」
我呢刻先感受到，果把聲唔係傳入我耳仔裡面，而係直接浮現喺我腦海中。
我嘗試諗一句說話：「即係我有超能力？」
嘩，我地真係可以用思想溝通，呢一點令我不得不信呢隻曱甴，暫且叫佢做小強。
小強話：「有咗呢個能力，你已經成為我地族嘅一員，所以我黎通知你。」
我諗起螞蟻俠，佢咁勁，就係佢可以控制螞蟻嘛，咁依加我咪即係「曱甴俠」？
諗到呢度，我熱血沸騰，我咁辛苦練六舊腹肌都係想型，依加有超能力，仲唔到我發威？
我問小強：「我屋企仲有無其他族人？」
「有嘅，都應該出黎同你打個招呼。」
幾十隻曱甴從角落縫隙爬出黎，我先知我屋企原來有咁多曱甴。
「好，眾位兄弟聽我吩咐，創一番事業！」地球上有億萬隻曱甴，我組織一隊曱甴大軍，天下仲唔掌握喺我股掌中？
突然有隻曱甴問：「點解要聽你吩咐？」
我呆一呆：「因為我有超能力，可以同你地溝通。」
曱甴又問：「咁你可唔可以同人類溝通？」
「可以啊。」
曱甴再問：「咁其他人類有無聽你吩咐？」
雖然佢地好細隻，睇唔到表情，但我已經感受到佢地嘅白眼。
小強見氣氛有啲僵，出黎做和事佬：「Peter係新加入嘅朋友，唔係好識規矩，大家體諒下。」
點解螞蟻俠可以指揮螞蟻，而我，曱甴俠，只可以同曱甴做朋友？
無理由嘅，我咁大隻，佢地咁細隻，我點都有啲優勢掛？
我婉轉咁問小強：「我日後如果麻煩各位......朋友幫我做野，得唔得架？」
「得。」小強答得好爽快：「只要符合本族嘅宗旨，做乜都無問題。本族嘅宗旨係四個字......」
我估：「團結友愛？天地良心？」
曱甴族齊聲答我：「搵、食、繁、殖！」
......又真係好緊要。
「我地出去搵食，好危險架，郁啲就俾人打死踩死。如果你買夠野食，提供安全環境畀我地繁衍，我地咪幫你做野。」小強繼續講：「用你地人類嘅說話，叫做『僱傭關係』。」
我明白晒，小強主動同我講野，根本就係見我可以同曱甴溝通，想我畀著數佢地。
「無問題。」我一口答應，曱甴咁細隻，食得幾多野？
我按照小強嘅說話，將我間屋佈置為「曱甴居」，仲劃咗條特別通道畀我，廢事我誤踩曱甴。
呢個消息一（曱甴）傳十（曱甴），十傳百，好快，我屋企就住滿咗曱甴。
唔知係咪因為基因改變，我同佢地一齊生活，又唔覺得噁心。
當然，做事要一步步黎，我打算先試下我班曱甴員工嘅威力。
