上集：https://post.shikoto.com/posts/130245-我執到一本生死簿（上）

我可以知道人地嘅死期，但人地信我果陣，已經死咗。
固然仲有一個方法，就係搵個富豪，再講畀佢知，其他人嘅死期，證明我好準。
但問題係，每人得一個死期，富豪知道自己嘅死期之後，我咪無利用價值？

喺一個月黑風高嘅晚上，我思考緊點樣用生死簿，眼前突然出現咗一個阿伯。
阿伯大喝：「本王係地府閻王，依加命令你將生死簿交出黎！」
我試探性咁伸出手，隻手穿過咗阿伯嘅身體，嘩，真係鬼黎。
佢無實體，即係佢奈我唔何？我嬉皮笑臉：「唔交會點架？」

閻王似乎睇得出我嘅諗法，冷笑：「人間係唔屬於本王管轄範圍，但到你陽壽盡果陣，本王會將你打落十八層地獄，等你永生永世受苦。」

雖然我唔知佢係咪講真，但諗一諗，為咗本生死簿，而拎自己死後嘅幸福黎賭，好似唔多抵。
我死死氣氣喺櫃桶拎本生死簿出黎，有啲不滿：「見本爛簿無乜用咋，如果係死亡筆記，我先唔會咁易畀你。」
閻王接過生死簿，皺眉問：「死亡筆記係咩黎？勁過生死簿？」
「勁好多啦！」我指一指我書櫃上果堆死亡筆記漫畫，再Google「死亡筆記」，又有電影、周邊產品，論壇大把人講。
閻王嘅眉頭愈皺愈深：「你搜索下『生死簿』。」
我照做，咪有維基百科，一啲無乜人睇嘅算命網咁囉。

「唔通我地中國鬼，真係比唔上日本鬼？」閻王個樣好失落。

咦，地府都有中日矛盾？
我忍唔住安慰佢：「生死簿都有優點，死亡筆記只可以殺人，但生死簿可以預知死期，畀機會大家及時實現願望。」
閻王都係好灰，我靈機一觸：「其實都係媒體效應啫，如果中國地府都有自己嘅故仔、電影，做足宣傳，分分鐘勁過死亡筆記......」
果一晚，我同閻王促膝長談。

過幾日，一堆富豪聯絡我，話要畀錢我嘅故仔出書拍電影。
原來啲富豪連續幾晚，都收到阿爸／阿爺托夢，要佢地注資畀我，否則祖宗就會喺地府生活得好慘。
嘩，閻王的強權壓逼，果然有用。
有錢乜都易做，好快我就推出咗《生死簿》電影，請最紅嘅明星，宣傳鋪天蓋地。
跟住我仲成立咗「地府創意有限公司」，陸續推出《地府奇遇記》、《閻王與孟婆》、《地府特攻隊》一系列電影。

好多時，機會唔一定係最耀眼嘅野，而係隱藏喺你身邊。

－完－