我以前鍾意寫下故仔，都有幻想過，自己嘅小說可以拍成電影架。
不過慢慢大個仔，都腳踏實地咗好多，老老實實做個上班族，夢想呢啲野，「想」下就算啦。
直到有一日，我喺公園散步，見到地下有本簿，寫住「生死簿」。
一打開，裡面密密麻麻，都係人名同死亡日期，嘩，邊個玩到咁大。
咁我幾時死呢？我一諗自己個名，本簿就自動翻去某一頁。
計下日子，我應該有八十五歲命，唔錯啵，真唔真先？
我又諗下我死咗嘅爺爺嫲嫲，本簿翻前幾頁，死亡日期真係岩。
加上呢個「心靈感應翻頁功能」，我已經信呢本生死簿係真。
天降寶物，唔通我好似夜神月咁，會改變命運，展開一段神奇人生？
我拎本簿番屋企，上網搵咗幾個惡名昭彰嘅罪犯名，將佢地嘅死亡時間寫成聽日。
果晚我成晚都瞓唔著，不斷喺度諗，我要點樣用生死簿改造世界。
但係第二日睇新聞，果啲罪犯一個都無死，第三日、第四日......我寫上去嘅名，一個都無死。
我好失望，但諗深一層，生死簿點都算係寶物，無得改變世界，用黎溝下女都得掛。
於是我就將生死簿嘅存在，話畀我女神知，
佢好興奮：「好啊，我好憎XXX個八婆，你幫我寫佢個名上去，仲有果個YYY、ZZZ......」
佢講咗一堆人名，我打斷佢：「對唔住啊，生死簿唔係死亡筆記，唔可以整死人，只可以知幾時死。」
女神沉默咗一陣，然後問：「咁我幾時死？」
我答咗佢，佢又問：「咁有無得延長我嘅壽命？」
我搖頭，女神不屑咁望住我：「咁你同街邊啲算命佬有咩分別？」
溝女路線失敗，我覺得，係因為女神仲後生，未意識到算命佬嘅重要性。
啲老年富豪先會一擲千金，千方百計想知自己嘅壽命。
如果巴結到一兩個富豪，我下半世都唔使憂，乜夢想都實現到啦。
我花咗好多功夫，終於搵到一個富豪，話我捏指一算，知佢五年後嘅今日會死。
我望住果封利是，好震驚：「我講真架！」
管家撇撇嘴：「一年都唔知幾多人同老闆講算命，你師從邊位大師啊？有咩履歷啊？」
我答唔出，果一刻，我好想拎生死簿畀個富豪睇，
但我知自己勢孤力薄，一旦生死簿暴露喺啲有權有勢嘅人面前，我好難保得住。
我粒聲唔出咁走咗，番到屋企，我不斷查生死簿，終於搵到一個死期好近嘅富豪。
佢死期前一日，我千方百計搵到佢，話佢聽日有血光之災。
可能係死期太接近，富豪好重視我嘅說話，特登留咗我電話，仲畀咗張卡片我，話佢聽日會好小心，被信任嘅感覺真係好。
結果，第二日睇新聞，天花跌落黎，壓死咗果個富豪。
報導仲話，個富豪臨死前大叫：「啊，大師真係準......」
我知道，佢口中果個「大師」一定係講我，但問題又黎啦，我可以點做？
去搵富豪個仔，話畀佢聽，我尋日算到你老豆今日會死，佢真係死咗，所以我好準？一定會俾人趕走。
即係話，呢次我連廿蚊利是都無埋。
