阿明今日同我講，「美斯？挑，如果我係巴西出世，我就係第二個美斯。」

我心諗，美斯明明係阿根廷出世。

「如果佢係香港出世？佢做緊張家輝替身，扮緊朗拿度咋！」

佢咁講一講，我又覺得好有道理。

香港地，踢波？第時大個你想食屎呀？

當你老豆老母知道你想做全職足球員嘅時候，第一個反應一定係反對。

讀書啦，廢柴。呢句好有可能係佢地嘅心聲。

但係，係呢個大學學位泛濫，大部分大學畢業生起薪得一萬鬆少少嘅香港，到底讀書仲有乜撚野用？

我都唔知。

作為一個無父幹，無讀專科，唔想做保險地產嘅大學畢業生，覺得夢想呢兩個字，真係好遙遠。

你想追夢？唔洗生存呀？唔洗比家用呀？唔洗儲錢買樓結婚成家呀？你仲細呀？你點同你祖宗交代呀？

一層一層重擔係我老母口中連珠炮發講出黎，其實，我只係講左句，我想追夢。

我甚至連大致內容都未講，佢就用語言殺死左我。

屌，我都係想試下全心全意投入一次，輸一次者，咁都唔得？點解就一定要朝九晚六咁返工？咁樣嘅人生有閪意義呀？

當然，我無講出口，淆底係其一，其二係我知道，有啲人，的確係輸唔起。

當走到某個歲數，你就會發覺，你已經無揮霍本錢，一輸，就真係輸成世。

我知道，係追夢過程上面贏嘅人無幾多個，亦無咩可能係我，所以我只好硬生生咁吞返我想講嘅野。

我無本錢。

係香港，我當買層樓用四百萬，首期按九成，計埋其他，四十零萬，剩低三百六十萬，月供一萬，都要三百六十個月。

之係要供三十年，屌，都未撚計息。

如果美斯係香港出世，可能只係稱霸公屋。好彩嘅話比球探發掘，上門做說客，但就比老豆老母拒之門外。

踢波？無出色呀，讀書啦，你想一世住公屋咩！

美斯心諗：可能踢波，仲有出色過讀書呢……

但佢同我一樣，無講到出黎，亦白白令機會流走，埋下日後成為張家輝替身嘅伏筆。

無錯，就算唔踢波，美斯都係讀唔成書，中五畢業之後，去電視台見老臨，比監製睇中，做張家輝御用替身。

然後係賭俠唔知邊Ｑ個系列入面扮朗拿度扭呀扭，扭呀扭，發揮一技之長。

儲幾年錢之後，用餘下人生嘅大半，黎供一層樓。

你話稀噓唔稀噓。

講完咁多廢話，我只係想講一句，追夢呀？食屎啦！

．
．
．
．
．
．

其實，我真正想講嘅係，我真正想同自己講嘅係－－襯仲輸得起，去啦。