上年2016年年頭，為咗想參加尖端嘅輕小說比賽，好盡情咁寫呢個故事，

咁當然係入唔到圍啦，因為要80,000字完整一個故事，

《叛神軍團》點都做唔到，既然係咁，不如就放上網，諗住可以搵多啲人去支持自己，比出版社睇下。

之後一攪就攪咗一年，雖然香港唔係無呢個市場，不過就真係要日文翻譯過嚟先有人睇，

而本地創作嘅都只限於幾個類別嘅作品，甚至乎有作者講過，唔係高登或者拉登寫，都唔洗止意有人睇。

其實又真係錯唔哂，因為比我知道有睇《叛神軍團》嘅，十個有七、八個都係台灣人。

但人數都唔係多，即係唔講數據，就算要出版印三十本都買唔哂個隻，

見到好多作者都開始不計成本就要去做自己嘅作品實體化，

我自己覺得有啲可惜，因為我始終覺得，如果第一本書唔好好去做好發行同出版，

之後就好難繼續做落去。

不過話分兩頭，一開始都無人願意比機會自己，唯有係靠自己嘅啫。

所以我都唔排除會有咁嘅一日，希望係之前會搵到出版社幫幫手。

講返《叛神軍團》，本來諗住只係發佈整整第一部就算，即係一至四章，

點知又玩得幾開心，結果連第五章都出埋，宜家反思返，都真係要完... ...

唔係寫完，係要停止發佈。

個故事大概發展咗 1/5 到啦，可能係1/6，因為一直係到修訂第一部，發現有好多問題，

所以想再寫好啲，為自己再一次闖關之用(搵出版社)。

不過大家都明白，出版社有樣好煩嘅規則，

發佈過佢極大可能唔要，但佢地又要啲有人氣嘅作者喎... ...

我就真係知點樣係無作品情況下成為人氣作者，就算我有作品都無唔到啦~~

有時間去搞人氣，不如比返啲時間我寫故事好過啦... ...(呢一點真係好Q麻煩)

於是我只好繼續參加比賽，搵比賽參加，不斷寫新故，

所以... ...我就要放棄多個地方發佈長篇... ...

唔係唔寫，不過唔想再係唔同地方走嚟走去，成日都KEEP住更新，

其實係要好多精神，記LOGIN都死。

而睇返紙言呢到，連點擊率一百都唔夠，

朋友又唔多，不如都係唔寫啦，大家鍾意睇就去返我facebook 或者 penana睇啦。

https://www.penana.com/story/8097/叛神軍團/toc

最少我以為修文都只係用一個地方，唔洗再不斷copy and paste，又要重新排版咁... ...

堅煩... ...

五章九節後，《叛神軍團》會係紙言講bye bye~

多謝大家一直以嚟嘅支持！

如果小弟真係有幸出書，我當然會番嚟報喜啦。

如果唔聲唔聲，咁大家都係唔好問我啦~~

再強調一次，我唔係唔寫，只係去返適合呢個故事嘅平台，

點解特別係到咁講，因為好似比較多香港人睇故嘅平台，

真係得呢個咁真係無我生存嘅空間，咁就唔好再勉強自己

都係塵歸塵、土歸土吧啦~~

請繼續支持大家喜歡又唔係太多人識嘅作者，佢地都等緊機會發揮自己。