短篇故事《初四唔返工得唔得呀？》
一覺瞓醒，總係覺得有啲奇怪，係喎，今日係年初三，即聽日就係年初四啦！
年初四要返工啦喂！
啫係我又要開始較返鬧鐘，將呢三日下下瞓到黃朝百晏嘅美好時光tune返去朝早七點，實行雞年早過隻雞叫咁起身，再狗衝去巴士站排隊等迫做沙甸魚，然後又開始我嘅奴隸式生涯。咩新年有個新開始全部都係呃人嘅！睇下，我嘅美好人生咁就被年初四毀滅咗...... （哭）
天啊，初四唔返工得唔得呀？
「得！」忽然之間，我聽到耳邊傳嚟一把奇怪嘅聲音。「比你休埋初四五六又點話？到時唔好多謝我呀！」
真架？我心靈脆弱，你唔好呃我喎，嗯，我知啦，呢把一定係上帝嘅聲音！
「比你返去年初一繼續玩啦。」
於是，我聽住上帝嘅聲音嚟到自己間屋個客廳度，又再一次扮乖扮溫柔扮善解人意咁招呼班八婆，等到間屋被佢地糟質完之後，我又攞住咁多封利是慢慢拆，不過唔知點解啲時間硬係過得好快，眨吓眼，又到初三。
啫係地獄又開始降臨啦！
「你呃人，明明話年初四五六都唔使我返工，而家聽日咪又要返！」
我指著個天罵。
這是上帝的聲音。「唔好咁心急，睇定啲先。」
話口未完，我就睇住自己飛返去年初一，繼續開開心心咁過我嘅逗利是生活，不過吓吓都笑到烚熟狗頭咁，都咪話唔攰！你班八婆又成日問埋曬啲人工幾多嘅老套問題，唔係為咗封利是，我連親戚表都廢鬼事背！
俗語話，唔辛苦又點得世間財，我呢鋪真係唔方唔辛苦啦！今次來來回回逗咁多利是，仲唔比我威返次？
直至我察覺到，我嘅利是數目來來去去都得咁多，係唔會累積架！
「你估信用卡積分咩。」上帝又再出現。
「喂，老細，唔啱數喎，咁我逗嚟逗去都係得個吉，真係你逗埋我個份啦！」
「道不同不相為謀。」
「喂呢句孔子講個喎！」突然覺得自己叻過上帝，又啲威威豬添。
「你理得我，咁而家你返唔返工呀？」等陣，點解上帝把聲突然變咗做阿媽嘅？「你唔返工我食穀種呀，起身！」
結果，發夢都無咁快，我就享受埋農曆新年最後一日嘅美好假期，之後，第二日拖住個殼返公司，飲杯咖啡，繼續逗利是。
(完)
紫寧 KAIK
https://www.facebook.com/purplekaik
