當有一日，你唔再需要返學嘅時候，你會覺得好似鬆左口氣。

之後開始溫書、訓覺、打機、睇故、最多咪約幾個同學一齊出黎溫書、食M記、行下旺角。
日子唔覺唔覺咁就開始考試。
考完出埋成績，搵到大學就是鬼但收左先算，又開始漫長嘅三、四年生活。

之後開始溫書、訓覺、打機、睇故、最多咪約幾個同學一齊出黎溫書、食M記、每星期行下銅鑼灣、金鐘、中環。
日子唔覺唔覺咁就開始考試。
考完出埋GPA，搵到份工就是鬼但做咗先算，又開始漫長嘅打工生活。

之後開始朝九晚七、訓覺、打機、睇故、最多咪約幾個同事一齊出黎飲野、食壽司、返下大陸、去下東南亞。
日子唔覺唔覺公司要CUT人手。
發覺自己無比人炒，但無Bouns，不如自己Quit，搵過另一份工。

之後開始send email搵工、訓覺、打機、睇故、最多咪約幾個舊同學吹下政治、討論生意、食泡菜、返下大陸、去下台灣。
日子唔覺唔覺都係無收入，不如自己攪生意算。

咩都撈下，志在存錢。

之後開始24小時on call、訓覺、打機、睇故、最多咪約幾個舊朋友出黎吹下生意、討論政治、食返譚仔、行下深水埗……

突然就係咬住米線呢一刻，就會諗返起好多野，中學讀書個陣嘅野……

你有無發過下夢，自己將來做D咩？
有無曾經收埋一個時空盒留比十年後嘅自己？
重記唔記得校歌點唱？
為左自己鍾意嘅阿Sir同Miss做過D咩蠢事？
點解以前講親粗口都開口𤜯着脷？
為左打籃球既然可以7點鐘返學？
最後一年中學，就算唔識唱歌都要一班人去玩Sing Con？
明明自己唔跑步，陸運會都要同個friend一齊報3200米？

件簽哂名嘅校服去左邊？
好似好耐著過黑皮鞋同打呔。
點解考試時無google，我都寫到英文信？
睇完篇新聞或者本書，好似差d野未做。
好掛住實驗室支Bunsen burner。
唔知而家手仲有無30呢？
點解我會鍾意呢個人架？

唉……
唔知我以前係班房坐嗰個位，重有無我嗰簽名係櫃桶……