從女神不斷比機會我，但我又唔知情之下佢已經對我開始冷淡，女神亦都變得好陌生，已經唔係我鐘意昔日既佢。一切都係佢改變咗我，或者可能從來都無改變過。
我係一個好平凡又文靜既學生，係老師眼中亦係好乖，但事實上我係完全Hea讀書上堂打機,成日唔剪頭髮比人捉儀容，正係計捉儀容都積到一個小過，唉其實果時差唔多每個月剪一次好麻煩，太短又太柒唔剪又比人話mk既毒撚。而呀奇，呀二，呀康，呀古係我既老友機本上發生咩事都係我身邊。
而毛毛係我班既女神，點解會咁講？因為係我級入面係中上級女神，加上學校男學生占七成，可以話係男書院，見到靚女就如遇到寶咁，眼大大有少少身材黑長直平陰，好多人追，中一開學無耐就有男朋友啦。而佢男朋友亦係一開始同我最fd既呀奇。
有日小息我同班熟透咗既朋友圍威喂既時候，呀奇同毛毛都過埋黎，傾到咁上下我地就問咗毛毛拎電話，係個時我就覺得佢好有仙氣，有種衝動想溝佢既感覺，亦係一切開端。中一既時候因為佢已經同呀奇一齊，所以我都冇行動過，我只係坐埋一邊觀察我女神。搶人女朋友我真係做唔到，何況對方仲要係我朋友。
直至到中二，聽聞佢地散咗我就問佢兩個點解會分開，
毛毛:我同佢性格都唔係好幾襯，勉強無幸福，所以唔好再問我啦。
之後我走去搵呀奇問佢做乜
呀奇:我都唔想同佢分開架。。。我真係好鐘意佢。
聽到之後我都好同情佢，因為我係望住佢地一開始起埋一齊至到分開，所以說話我都唔多講了，可能只會令佢更傷心。
(隨住之後兩三年佢仍然都鐘意毛毛)
一兩星期之後我就開始咗同毛毛開始sd訊息，慢慢了解佢亦都鐘意咗佢。
每次上數學堂我都會偷偷地坐佢後面，一齊做功課同佢玩，見到佢笑我都好開心，當大家病咗冇返學都會主動sd訊息比對方表示關心。問心有幾多人真心關心過自己。遇上佢亦是種緣份。
呢種關系維持到中三，因為同佢一齊我就覺得返學好開心，慢慢就愛上咗讀書，變得積極改變咗我好多，上英文堂我地兩個被編成坐埋一齊，我真係好開心，每日都同佢玩引佢笑，訓教既時候你整吓我我又整返你。呢啲機會真係好寶貴好難得。
有日放學我同呀二去咗呀奇屋企玩，玩咗無耐毛毛同呀娜( 呀二女朋友)同幾個朋友都上咗黎一陣之後我地就一齊去行咗一陣山。成個過程我緊係睇實毛毛啦唔可以比佢受傷。呀二就同呀娜一齊，其他果幾個男人就一齊行，行咗一半,天都預備黑啦落返山之後都各自返屋企。
到咗放假既一日，我預備搬返部電腦比朋友呀康既時候，
毛毛問我:你宜家係邊呀？
我:我預備搬部電腦去你樓下間m記等呀康呀
毛毛:ok 我一陣過黎
到咗m記之後唯有等埋佢兩個，等咗幾分鐘呀康到咗。我同呀康傾一陣計毛毛同呀娜都黎咗之後就去咗搭車，
我同毛毛講:我去呀康屋企先 一陣返黎
毛毛:記住返黎搵我呀
去到呀康屋企坐咗陣毛毛就sd訊息黎
毛毛:你係邊度呀 我同呀娜係開心商場等你呀
我:唔洗等我啦 我應該有排先返到黎 下次先啦
毛毛:咁好啦
呢個決定令我真係非常後悔點解我冇去到我究竟驚緊乜野?人地比機會你，你又唔要。唉
預備升中四既一個假期，我約咗一部份既人出黎(包括毛毛，呀康，呀古，呀二，呀娜同幾個女仔)大家都相識燒得開心啲，因為毛毛有啲唔舒服所以我都燒埋佢個份，燒咗一個通頂，成個過程我都同毛毛一齊，但係我冇勇氣去行動，其實呢次燒野食係為自己而設，我同毛毛都玩得好開心。到搭車返屋企預備到毛毛屋企既時候，
毛毛問我:你係咪都係度落呀?(眼神充滿住期待)
我:唔係呀，我去呀二屋企玩陣呀
毛毛:嗯，咁好啦，我落車先啦，88(語氣帶點失望)
到咗佢落車之後
呀二同我講:毛毛好明顯想你送佢返屋企啦你又唔送唉。。
聽完之後我先清醒，我又做咗件非常後悔既事。。
經過呢次之後我同佢都少咗搵對方亦都開始淡
直到考完試既一日搭車既時候
呀古同我講:其實毛毛之前好鐘意你 我之前問過佢
我:點解你唔一早話比我知呀?一早知咪唔洗估估吓又不斷係維持曖昧關系囉
呀古:我以為你知呀嘛，有咩計呀
聽到之後我個腦完全一片空白啞咗，我真係好激動成晚都訓唔到，因為之前完全feel唔到佢係鐘意我,一直以為自己係單方面鐘意人，呢件事我知得太遲因為毛毛已經有男朋友了，
返到屋企我一直回想起同佢一齊經歷既野，我既淚水都隨住回憶而流，唉，宜家先後悔咁多野，點解當時唔去行動呢，又要溝人又要淆。
升到中四之後毛毛都改變了，我同佢仍然keep住有傾計，但係我feel到已經唔係我以前鐘意既需要人保護，天真可愛既毛毛，變得好陌生。從此我就消失咗返學既動力，變返一個平凡既我，可能由此至終我都冇改變。可能我地由始至終都只適合做朋友。
End
