是咁的。

唔知你地身邊會唔會有一個人係以下呢個組合，大食＋食極唔肥＋仲要幾好樣？

有？咁你通常會點照顧你呢一位朋友？

我身邊就出現一個咁既組合既朋友，大食＋食極唔肥＋仲幾好……好唔好樣見仁見智啦。

我成日都會笑怇，因為佢除左呢個組合外仲另加一樣，就係臉比較大，所以我會笑佢好似一粒魚彈插左係筷子上面。

係係係……唔好人身攻撃，知道知道……唔好連你塊臉大都講埋出去嘛，收到收到。

但其實呢類型既朋友，佢地自己都幾慘下架。

點解慘？你地可能聽到話食極唔肥唔好咩，我地不知幾羨慕。又或者，大食未好囉，每次食野可以叫多幾樣，多D菜式。係除左臉大麻麻姐。

但係，真的嗎？佢地真係咁樣諗。

所以今日我就決定爆我個FD大鑊，等你地睇下大食妹既生活有咩苦惱。

亦都再次麻煩紙言如果要SHARE篇野去FACEBOOK 係度就可以CUT 文。

好拿，話到係爆大鑊，咁當然要將我個FD 既組合講一講先，佢既構造大致上係：

大食＋食極唔肥＋臉比較大+仲要幾……呢樣真係見仁見智＋極度無記性＋懶＋路痴+怕凍又怕熱＋多兵＋識整野食……太多缺點寫唔晒。

係，除左頭果三樣係呢篇文既重點外，其他果D可以唔理。但你可能會發現，唔係WO，其實塊臉比較大都唔係幾關事，講明先，篇野我既，我想打咩就打咩，哈哈。

講笑，我無咁霸道既，但事關呢一點有個煩惱都差唔多，所以加埋入去姐。

係咩，通常呢種人，一到冬天果陣就好容易比人誤會，誤會D咩？就係女性最唔鐘意聽到果個字。

肥！

肥！！

肥！！！

因為重要所以打三次。

點解會比人誤會，因為一到冬天，所有人都會著好多衫上身，咁凍著衫係好正常既事，呢度就無謂多講。但就係因為著多左衫，遮住佢地既體態，甚至係整到佢地成個人當堂腫左好多。咁你知香港人幾膚淺架啦，一見到一D稍為比以前腫左D既女性，而且咁岩加上果個人本身膽生毛的話，一定會講一句：「咦，妳好似肥左WO。」

呢句說話，所有女性聽到都只會覺係係廢既，除左一個字，「肥」。

呢個字簡直就係死刑，唔係判佢地死刑，而係你被佢地判死列。

所以臉比較大既女仔，一到冬天都成日要澄清自己其實係好瘦，點澄清？未就係除低件褸比人睇下佢係幾瘦。所以臉大既女仔可能係冬天比較易凍親D。

好拿，再講臉大我實比人打，我地講返D比較正經D既先。

大食妹通常有分兩種，一種係大家都知道佢係大食妹，另一種係佢地唔想比人知道佢地係大食妹。而呢兩種會同時發生係同一個人身上。

點解？要睇情況而定，當一個大食妹係一個自己鐘意既人面前，而又未同果個人一齊既時侯，佢地真係老虎蟹都話：「我飽拿。」

係啊，望住隔離枱果鐵板餐，然後再望望另一枱既日式便當，然後不停吞口水話自己飽。各位大食妹，妳地咁樣成日玩挑戰忍耐力大作戰真係勁。

又或者係一大班人，所有人都食飽晒，但自己其實只係半飽，就唔敢再叫野食，點解，因為怕其他人坐住等妳一個。

「咁比人望住食野真係好尷尬架嘛。」係係係，我好認同，就好似你地去動物園一樣，望住D動物係個籠入面，其實D動物尷尬架，所以好多時未見到D動物點都入左自己間屋度訓，都好過望住你地。

你可能話唔係WO，有時D動物會係人面前食野架WO。係啊，因為果D動物知道自己要表演先有野食，所以表演食野囉。

就好似而家有好多大食妹都會自拍自己食野放上網比人睇架，點解，因為有錢收有點撃率囉。

講到咁，你可能會話，咁姐係只要肯比錢佢地就係表演食野比我地睇啦……咁，都要人地自願先得架，你肯請，可能人地唔受你都無得迫。

但通常大食妹有一點好可愛，就係當大家都各散東西後，會係個GROUP 話，剛剛其實未食飽。係果一刻，GROUP MEMBER 就會爸媽上身咁，「點解頭先妳唔話我地知啊？」，「點解而家先講啊？快D去買D野食先再講。」

更有D搞笑既大食妹，會話剛剛又去食左個M記餐……

又或者你係佢好朋友的話，佢可能會PM你：「餓。」通常會加個笑到喊既表情符號。

通常我見到呢D MSG，都會……好可憐妳地點解唔可以有食餐飽飯既權利。

至於如果同大食妹FD左，都係一個樂趣，起馬我次次同佢地食飯果陣，都好似睇緊極限大挑戰咁，佢永遠都可以放D野入口，剛剛果間食左個常餐，而家呢間食左個麵，一陣仲話要去買雪糕食。

點解要分開幾間買？知唔係又怕D侍應覺得佢大食囉。但係你就可以睇住佢地消滅食物既過程，真心講，又時睇到大食妹們食野既貓樣，不顧儀態咁食野又真係幾好笑。

講完大食妹，就到食極唔肥呢個好多人羨慕既TOPIC。

食極唔肥呢個POINT，其實唔一定出自大食妹，但係如果係大食妹加上食極唔肥就更加恨之入骨。係啊！講你啊！未四圍望就係你啊！

但係通常我識得食極唔肥既人，都係要係另一方面付出代價，佢地都會有一個通病，就係便秘。拿，我唔係講你啊，你唔好自己對號入座。

食既野已經多，都唔知點解可以幾日無廁所去，有時我會話。

「係未持住自己得天獨厚，所以食野好肥膩，搞到去唔到廁所啊？」

「又唔係WO，我已經係食草怪，都可以幾日無得去。」

「咁有無試下D瀉藥啊？」

「試過啦，食左好多都唔得。」

無錯，大食＋食極唔肥，但係無廁所去呢個係一個迷。所以佢地好珍惜每一次去到廁所既時光，甚至如果你同佢好朋友的話，佢仲會PM你。

「你估我而家做緊D咩？」

「食緊野？」

「唔係啊，我去緊廁所大便，開心。」

「食緊飯你同我講呢D野……」

其實大食又有咩所謂，只要食野食得開心又健康，我理得食幾多，最重要其實係自己姐，如果下下都要就住就住咁食，咁其實有幾多餐真係可以食得飽。而且，如果真係為你好既人，佢地又點會介意你食幾多，佢地可能介意你食唔飽多D添。

至於臉大……呢一點真係幫唔到你地，其實會唔會係因為食得野多，口部運動大導致咬肌發達，整到臉大呢？我講下架咋，無實據證明架。

至於我位朋友……我已經無用「妳」而係用左「你」，睇既人應該唔會知道你係女仔掛。

完～～～

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus