一剎那就一見鐘情
可能我地讀男校嘅關係，真係好少同女仔相處，我只知佢以前讀曉明街蒙民偉，而因為佢，亦成為我每天返夜校嘅動力，不過點樣同佢Say Hi, 點樣識佢？我只知我每日都偷望佢，而我相信佢都發覺到。
那個年代，雖然已經有手提電話，但做學生，邊有咁多錢出手提電話，直到夜校嘅最後一天，我都未同佢正式傾過計，唉，返到屋企，連飯都食唔落，唔通就係咁...
不過我自己都肯讀書，會考時期，市政局（康文署前身）嘅自修室係要申請先可以入去溫書，我都申請左瑞和街自修室其中一個時段，我記得應該係晏晝嗰段，第一天去到，鬼死咁多人，唯有帶住耳筒聽住CD溫書，又悶，所以坐左無耐就走左...
第二日，又去自修室溫書，搵左個近走廊嘅座位坐，突然間一個熟悉的身影在旁邊經過，抬頭一望，原來係阿菲在搵位，於是我指指前面張枱有個空位，佢就走左埋去坐，今次真係冇死啦，臨走前，我厚住面皮鼓起勇氣行過去
「咁啱嘅，你都來呢到溫書呀？」連我自己都覺得廢話
「係呀，以前唔見你嘅？」佢笑笑口問
「我...我以前係屋企溫書架，不過屋企太多誘惑啦，係呢，得你一個，可唔可以俾個電話我，等我可以幫你霸下位。」俾佢問番轉頭我真係答到一額汗
「好吖，我住瑞和街馬會樓上之麻，俾張紙嚟我寫俾你...」
我就搵左張紙俾佢寫左個電話2345xxxx係張紙上面。
嗰晚我真係開心到瞓唔著...畢竟我十幾歲仔第一次問女仔攞電話，無諗過佢會即刻俾...
小學情緣
咁大個仔，除左小五喜歡過一個小學同學外，中學嗰6年真係做左和尚。
我小學係牛上一間基督教學校讀書，而小學嗰個女仔，唔可以話鐘意，只可以話有好感，佢叫思思，佢住係中產家庭聚居嘅功樂道，而我當時只不過住功樂道隔離屋村嘅屋村仔，思思其實係一個好斯文嘅女仔，而佢細佬嗰時就剛剛讀小一，當時我D成績都唔差，可以做領袖生（即風紀），咁啱係睇住佢細佬嗰班，所以我好take care佢細佬，佢細佬喊，我會專登上番班房搵思思陪佢，而我曾經同我小學嘅同學仔葱葱講我喜歡思思，攪到全班都知道我喜歡佢...到左畢業前寫紀念冊，都唔敢搵佢寫，所以畢業之後就失左聯絡，只知佢去左藍田基孝到讀...
有時緣份就係咁，我估好似我老一代嘅人，知道乜野叫ICQ，即依家類似Whatsapp嘅物體，但只可以係電腦用，嗰時我第一份工有個IT毒男已經係ICQ識女仔，後尾仲結埋婚，所以網上溝女唔係呢一代後生仔嘅專利...
講番思思，有一日，我響ICQ到搵到佢細佬，於是同佢chat下，原來佢地成家移左民去澳洲，之後父母離左婚，佢同兩姐弟同媽咪回流番左離香港，住響近秀茂坪嘅馬遊塘嘅村屋，我膽粗粗問佢家姐思思記唔記得我，思思就走來同我chat，佢原來做緊新蒲崗紅A嘅Marketing，而我當時只係附近廠廈一個助理主任仔，後尾佢send左張相過來，個樣與以前差不多，不過已經唔係嗰種感覺啦，只知佢響澳洲讀書嗰陣識左個男仔，番到香港間唔中會去佢男友美孚屋企過夜，有時chat開都問佢知唔知我小學時喜歡佢，佢話知，不過無耐我地冇再chat，畢竟大家嘅生活已經唔同左，而佢依家應該同男朋友結了婚...
緣份有時候會無疾而終...
表白
講番菲菲，其實我唔知佢有冇男朋友，但以佢的條件，同埋蒙民偉嘅女仔係出名多人追，所以我都預左佢有男朋友...唉，無辦法，讀男校呢家嘢係慢人一拍。
嗰陣，為左見佢，我真係早午晚三段時間走去自修室，唔通真係溫書咩，中場休息時段，我會走去佢屋企樓下，希望撞到佢，嗰時，有個由中二開始識嘅老死，叫阿偉，佢協和街屋企可以望到菲菲屋企，所以成日上佢屋企做望妻石，咁當然望唔到D乜啦。
無耐，我終於見到佢男朋友，一個幾高嘅男仔，仲要響藍田讀男校，嗰間學校係我學校嘅競爭對手，不過係觀塘來講，我校出左個九優壯元先...
當時嗰一刻，個心真係好痛好痛，痛嘅係愛得太遲，佢男朋友應該讀中六，有時佢地兩個會一齊來自修室，兩隻手係枱底拖住，而菲菲就笑得好甜，而我個心就好痛好痛...痛到...係床上瞓唔到覺...
無耐，我夜校班老死知道我想追佢，係咁潑我冷水，唉，只得阿偉撐我...
我依舊每天去自修室，依舊每天行去佢屋企附近撞佢，為嘅係見到佢我已經好心足，有時會問下佢食唔食下午茶，佢大多數拒絕，一來佢等男朋友，二來我地都唔算太熟，而我相信佢係一個為仔死為仔亡嘅女仔...
就快會考，我都去補一補英文及Econ，英文唔可以再肥佬，而Econ我想升到C，咁啱佢又想補Econ，咁我就叫佢一齊去得寶英皇補Ｖ張(係寧波2中教書)，不過只得灣仔有位，於是我同佢一齊去左灣仔補習，嗰陣係我地最近距離接觸，起碼無佢男朋友係到，而放學後，我地會一齊搭地鐵返屋企，嗰時我已經搬左去藍田，但我都會去觀塘落車送佢返屋企，一來可以相處耐D，二來夜晚黑佢住嗰到好靜好雜附近又有酒巴，我唔係咁放心...
慢慢我地開始熟絡左，我好想同佢講我好鐘意佢，但點開口，我估好多男仔都唔知點開口，一來驚衰，二來係怕連朋友都無得做...
點好呢，但我又怕會考之後我地會無左聯絡...
嗰時我地又冇手提，又冇ICQ，又冇email，只有寫信，去文具鋪買D公仔信封信紙寫信俾佢表白...
表示我鐘意左佢，希望做佢男朋友，想同佢拍拖...
其實我有自知之明，畢竟佢男朋友各方面都好過我，但我唔講，又點知唔得...
不過封信寄出左之後我即刻又好後悔...
心情好似等判刑咁...其實我都知道好大機會判我死刑...
到左補習嗰日，我買左包陽光檸檬茶(我希望好似廣告咁，個女仔得米識到伊健，只不過係男女角色倒轉左之麻，咁我就邊到都有陽光啦)入課室等佢，入到班房見唔到佢個蹤影，有D失望同埋後悔，後悔明知佢有男朋友，各樣條件都俾我好嘅男朋友，依家佢可能因為我嘅表白，嚇走左佢...阿Sir入嚟開始教書佢都未出現...而我嘅心情亦跌到落谷底...
突然間一下開門聲，各人都立即將專注力轉向門口那位置，有個女仔走左入嚟，係菲菲，我揚一揚手，佢氣喘喘咁走過嚟坐低
佢拍一拍我膊頭
「衰人，我瞓過龍，又唔打離屋企叫我起身...」佢細細聲罵我
「...」
我見到佢咁我覺得好好笑，亦好開心，起碼佢冇避開我...
佢可能見到我傻頭傻腦咁笑...
「仲笑...」
之後我地又好專心咁聽書。
落堂嗰陣，佢同我講
「我收到你封信，你好多錯字，不過我地係好朋友...」
「...」
「走啦，快D返屋企。」
我有D失望，失望係因為我做唔到佢男朋友，不過其實我預左...
送到佢屋企樓下
「菲菲...我地仲係朋友...你唔會避開我？」
「永記，我地同以前一樣，係好朋友...」
「...多謝你冇嬲我...」
「傻啦...我返上去啦...拜拜...」
「拜拜...」
我望住佢嘅背影入鐵閘入𨋢...
而我就帶住沈重嘅心情返屋企...
嗰晚我輾轉反側，久久未能入睡...
諗住我同佢之間嘅關係...
而第二日，佢如常同男朋友係自修室出現，好似乜嘢都無發生過，直到考完會考，我有時會打俾佢好似朋友咁傾下計，我估佢當我係一個好普通普通嘅朋友，而我只可以嘅係默默咁關顧住佢...
放榜那一天，成績依舊未能讀正規學校嘅中六，不過我相信如果冇佢，我唔會的起心肝去自修室溫書，成績應該比舊年仲差...
佢就同左個女友人入左德福威靈頓讀中六，而我就同班夜校老死去左話全觀塘最多靚女嘅翠屏道職訓讀中六，但靚女係無我嗰班份，係晒隔離班，當然放學後會趕去自修室，美其名係溫書，實際係去撞佢，因為佢未必會到，好多時都係同男朋友一齊到，而我只可以間唔中偷望佢，見到佢地兩個真係有D眼寃...不過又可以點樣...
發現出軌
我第一次見到著校服嘅佢，真有D鄰家少女嘅感覺，真係好掂...
不過其實當大家係唔同嘅學校讀書，關係係會不知不覺咁轉變，會開始疏離...
但佢都會定時定候出現自修室，而我對佢嘅酸同痛已開始麻木到沒有感覺，我只知我內心仍然好鐘意佢...
不久，佢越來越少來自修室，但佢男朋友仍依舊出現，唔同嘅係佢男朋友身邊多左一個女仔...
我覺得佢男朋友知道我嘅存在，所以有時出入𨋢帶住D不肖嘅眼神對住我...
我有D嬲，嬲佢咁樣對菲菲，但亦都有D暗地開心，開心係因為咁代表我係米有機會呢？
分手
我覺得佢男朋友好賤，雖然我好黑心咁想佢地分手，但我又好擔心佢，而同一時間我又唔知講唔講俾阿菲知好，萬一誤會左以為我想拆散佢米死，我咁係米太過小心眼，定係對自己太過無信心，還是我唔想關係會惡化呢？
如是者我每天離開自修室都會行一轉佢屋企樓下...
希望見到佢...
直到某一天，係大廈門口撞到佢
「近排唔見你去自修室嘅...」
「...我男朋友係唔係上面...」
「...」
「係米同個女仔一齊？...我地...分左手...」
「...你...冇事麻...」
「...我冇事...我上番去啦...拜拜...」
我望住佢落寞嘅背影消失於我眼中，心裡有D後悔同自責，點解自己咁小心眼同無勇氣講俾佢知...
個心又好痛好痛...原來佢唔開心會攪到我好down
之後除左有時星期六日佢才會出現係自修室，我估佢係避開佢男朋友，唔係，係前度男朋友才對...
而我都因此冇乜心情溫書，成績一落千丈...
不過我唔敢俾佢知...
太極《留住我吧》
又望你多一眼 淚緩緩的淌下
又是分開的一剎那
實在我心中有極難言的說話
但願你一一知道嗎
留住我吧 留住我好嗎
你說過跟他早已不像話
你說過再不想見他
你說過喜歡聽我的夢話
此刻留住我 可以嗎
但是我永不要在含糊境況下
利用你跟他的變化
若是你愛一個 就完全的愛吧
莫問再應不應記掛
留住我吧 留住我好嗎
告訴我簡單一句心內話
告訴我若要我留下
告訴我讓我知道怎做吧
今天留住我 可以嗎
難道這夢已經消失變化
告訴我簡單一句心內話
告訴我心願別再盼
告訴我讓我知道怎做吧
一生留住我 可以嗎
生日快樂
個星期六下午，自修室休場鐘嚮起，臨走前佢行過我身邊
「Hei, 食唔食Tea...」我問
「唔食啦！阿哥今晚返來食飯...」佢笑住咁答
「...」
「今日有D唔開心，個猩猩(Kipling)背包隻猩猩扣爛左，我好鐘意個袋，唔想掉...唉...」
佢好隨意咁講，可能你地覺得佢暗示想我買俾佢，但我可以話俾你地知，佢唔係D咁嘅女仔，佢D衫都係同家姐撈亂著...佢好慳家...
嗰時我做學生，一日得三十蚊零用，我都唔會問阿媽攞錢買野，因為我都唔想屋企已經幫我交學費又補習，仲要屋企負擔太多...
知佢就快生日，我同阿偉去左又一城，買左個猩猩扣俾佢，我記得都要百幾蚊，不過無所謂，希望佢鐘意姐，我依家只記得佢生日係唔知邊個月嘅29號。
嗰日我係佢樓下間茶餐廰打俾佢
「hei，生日快樂...」
「嘻嘻...多謝...」
「其實我係你樓下，可以落嚟麻，我有D野送俾你...」
「好呀...」
無耐，佢踢住拖鞋咁落左嚟...
「...生日快樂...送俾你...」
「多謝...乜嚟架...」佢笑住講
「...小小心意，你拆左米知囉...」
「...哈哈...好多謝你呀...」佢拆左之後好開心...
「鐘意...多謝...」
「...你今晚有約麻...」
「...有呀...」
「...噢...」我有D失望...
「...米咁啦...我今晚同屋企人去食自助餐...」佢拍一拍我膞頭...
「...下次再約你吖...」
「好呀，我上返去換衫先啦，拜拜...」
「...拜拜...祝你以後好似以前咁...開開心心...」
「好呀....」
星期日，當我坐係自修室無里心機時，突然間有人拍我一下頭，我真係俾呢下嚇一嚇，不過我估到係呀菲，佢今日，揹著個舊嘅猩猩袋，不過已換左新嘅猩猩扣，我覺得佢專登俾我知，同時佢剪短左D頭髮
「你...做乜剪左D頭髮...」
「唔好睇咩？」
「...噢...唔係，睇慣左你長頭髮...有D唔慣...」
「想改變下...」
「...啱嘅...有新嘅開始...不過，你留返長要幾耐...」
「做乜呀？」
「我鐘意你長頭髮多D...靚D...」
「咁俾張相你望梅止渴啦...我朋友幫我影架...」
佢就咁俾左張有D曚嘅沙龍相我，好靚...
等
但慢慢，佢已經好少落嚟自修室，因此我都冇乜心情溫書，成績...唉...
我每日指定動作係去佢樓下撞佢，人地話女人嘅第六感好勁，會預感到身邊嘅人嘅野，特別是自己鐘意嘅人，其實...男人都係一樣，只係你care唔care呢個人，而我有個不詳預感，即將出現...
有首歌，近排好喜歡，佢可以形容我當時嘅心情...
等 寂寞到夜深
夜已漸荒涼 夜已漸昏暗
莫道你在選擇人
人亦能選擇你
公平 原沒半點偏心
苦澀 慢慢向著心裡滲
何必抱怨
曾令醉心是誰人
自願吻別心上人
糊塗換來一生淚印
何故明是痛苦傷心
還含著笑裝開心
今宵的你可憐還可憫
目睹她遠去
她的腳印心中永印
糊塗是你的一顆心
他朝你將無窮的後悔
這一生你的心裡滿哀困
後生仔可能唔識，不過陳百強唱到呢首歌嘅味道...
我記得有一次放學後約左阿偉，經觀塘地鐵站行賽馬會診所旁天橋行去觀塘廣場，最唔想嘅一幕俾終於我見到，佢同個男仔一齊，雖然冇拖手，其實佢以前同男朋友係街都唔拖手，我估佢怕俾屋企人見到...
嗰一刻，真係好似一把刀插入個心，痛，好痛，仲有D涼意，好似個人死左後，D血凍左之後係心臓流緊出嚟咁嘅感覺，我嗰時只可以生硬地同佢say hi，而佢亦有D生硬...之後我連觀塘廣場都冇去，就返屋企...關埋房門狂喊...
邊個話喊係女人嘅專利...我人生第一次為左個女仔喊...
愛與痛的邊緣
我當時嘅心情好似王菲首愛與痛的邊緣咁...
那怕與你相見 仍是我心願
我也有我感覺 難道要遮掩
若已經不想跟我相戀
又卻怎麼口口聲聲的欺騙
讓我一等再等
在等一天共你拾回溫暖
情像雨點 似斷難斷
愈是去想 更是凌亂
我已經不想跟你癡纏
我有我的尊嚴 不想再受損
無奈我心 要辨難辨
道別再等 也未如願
永遠在愛與痛的邊緣
應該怎麼決定挑選
過幾天，心情平伏左，我係度諗，會唔會只係我諗多左，諗大家同學一齊放學行埋同一條路之麻，我諗左好多理由，其實我自己呃自己，只不過我唔想接受現實吧...
嗰排，我依舊每日係佢樓下撞佢，見到佢一次，知道佢點都好，我想見佢嘅要求已經降到低無可低了...
退學
我D成績因為咁而一落千丈，我咁大個仔都未試過滿缸紅，老師話不如repeat多年，我真係唔想讀書repeat三年，何況我讀完中七，考埋A Level，自己都冇信心入到U，二來我唔想嘥錢要屋企人再供我讀書，所以當我同屋企人講我唔讀書出離做野時，佢地都冇乜反應，其實屋企係冇經濟壓力，不過我唔知我爸媽知唔知我D嘢...
好奇怪，我阿媽居然叫我同佢地一齊去歐洲散心，於是同兩位老人家去左十幾日旅行，不過依家睇番D相，除左係威尼斯餵鴿最開心外，係巴黎迪士尼都係心事重重，我係畏高，居然走去玩飛越太空山，可能想大嗌同想死吧，我老豆係一個好慳自己嘅人，去到瑞士好多團友買錶，我老豆就諗買唔買...
「老豆，人一世物一世，呢次嚟到唔知有無下一次，最多返到香港慳D，米會後悔一世...我唔想你後悔...」
我老豆最後買左隻金撈...我O左咀佢居然咁大駛...
我咁大個仔呢十幾日旅程全程用英文，因為我爸媽係英文白痴，我先知原來我英文其實都幾得...係要逼出嚟
返到香港，要開始搵工了...
高考後
當然我返到來都會藉口俾手信佢而見佢，佢依舊好開心咁收左，後尾我入左一間位於太古嘅電業公司做文員仔，第一次出嚟打工，真係好多嘢都唔識，但係其實又冇乜野做，有D失意，故最終報左考A Level，試下自修，所以係試用期最後一天辭左職，如是者又開始蒲自修室，又天天行去佢樓下撞佢，呢D生活，其實好似吸左毒又或者精神病人咁每天咁重覆又重覆，佢已經唔嚟自修室了，我感覺到佢已經有新戀情，而對象已經不是我了...
高考後我約左佢出來食飯，什麼也談，唯獨唔敢問佢嘅戀情，可能...佢都唔敢講俾我知，後尾有人介紹佢去左觀塘一間公司做Shipping，而我就走左去大嶼山機場做文員仔...
我每天放工都會係觀塘站落車，行返同一段路，望一望佢屋企，才返屋企，因為我真係好掛住佢，但我又唔想騷擾佢嘅生活...繼續行屍走肉咁過日子...
眼淚
我記得某一個星期六，我返工時打俾佢，想約佢出來食lunch...
「...你今天有空麻...我想約你食晏...」
「...哎呀...有人約左我食飯...」說話依然清甜但已經有D見外了...
「...唔緊要...咁下次再約...」
我於是嗰日約左阿偉，去左鑽石山荷里活，其實阿偉已約左班朋友，不過佢見我唔係好掂咁，叫埋我出來，我嗰陣好似個外人咁...不過我好感激佢，如果唔係我可能已經死左了...
原來阿偉同班friend係food court到食，不過我真係冇乜心機...阿偉叫我陪佢買麥當勞...就係行去麥當勞途中，我見到一男一女，個男仔搭住女仔個膊頭行街，個女仔就係佢...菲菲...
嗰段路好短，但感覺好長好長，時間過得好慢好慢，步伐亦都好重好重...亦都冇時間俾我諗掉頭走...
我只有硬住頭皮咁行過去...我見到佢眼神有D驚訝...
而我就第一次冇同佢打招呼，扮作見唔到佢係佢身邊行過...
好痛...心好痛......我相信如果阿偉唔係到，我已經喊左出嚟...
阿偉見我唔係好掂，捉我走左，我估如果唔係阿偉係到，我已經可能係商場中庭跳左落嚟，曾經，離開荷里活有一刻我係鑽石山站對住條路軌（當時未有幕門），心裡面已經同阿爸阿媽講對唔住我想死，因為我已經不由自主地想跳落路軌到，只要承受一刹那嘅生理上嘅痛，就可以解決心理上永遠嘅痛苦...
亦都好彩有阿偉係到，因為我唔可以帶俾我老死一個有遺憾的人生...
我只知返到屋企入到房我已經係咁喊...點解佢唔可以坦坦白白咁話我知...
范曉萱有首歌眼涙，有幾句可以表達我嘅心情
愛上你是最快樂的事 卻又換來最痛苦的悲
苦澀交錯愛的甜美 我怎樣都學不會 ｈａ～
ｏｈ～眼淚 眼淚都是我的體會 成長的滋味
ｏｈ～眼淚 忍住眼淚不讓你看見 ｏｈ 我在改變
孤單的感覺 你從不曾發現 我笑中還有淚
ｏｈ～眼淚 眼淚流過無言的夜 心痛的滋味
ｏｈ～眼淚 擦乾眼淚忘掉一切 曾有的眷戀
ｏｈ～眼淚是苦 眼淚是傷悲 o h 眼淚都是你
ｏｈ～眼淚是甜 眼淚是昨天 ｏｈ 眼淚不流淚
上天係米玩緊我，香港咁大，佢樓下咁易撞都撞唔到，要係一個咁冷門的地方遇到...
或者我地兩個真係有緣，但係...係乜嘢緣，連我自己都唔知道...
離開以後
當晚，我好衝動好衝動咁寫左封信俾佢，我送左首歌俾佢...
離開我以後 我會習慣自卑
明天再偶遇 我也不敢偷望你
離開我以後 季節冷暖天氣
我也置諸不理 願名字也再不記起
離開我以後 我會長留這地
晨早到午夜 撲進漆黑想念你
離開我以後 醉了會看到你
夢中方可永久地 接近你
我嘅心情就係好似張學友呢首歌咁...有一排我同阿偉唱K，係咁不斷重複唱呢首歌，但係唔係真係可以季節冷暖天氣，我也置諸不理，願名字也再不記起 咁樣...忘記左佢呢？
犯賤
我繼續行屍走肉嘅日子...我已經唔記得左佢回左封信俾我，內容已經唔係太記得，我只知佢好似話我細心，會搵到一個好過佢嘅女仔...
其實收到佢封信，我已經無乜點嬲了，因為我已經知道無機會...無希望了...
過左冇耐，有個中學同學阿強打俾我，佢問我有冇事，我話下，我有乜野事呀，原來佢識菲菲，有日菲菲係街到撞到佢，好緊張咁同佢講叫佢搵我，驚我有事...我淡淡咁答阿強，我冇事了，日子都要繼續過...
對住當時自己深愛嘅人，其實係唔會記仇記恨，只會記得佢嘅好嗰面...同埋原諒佢所有野...
我嘅毒㽼始終戒唔到，每日放工都會行瑞和街，我留戀同佢美好嘅回憶，其實只要佢開心，我已經開心了。
無幾耐，我考左車牌，老豆買左部二手本田思域俾我操...
佢係我架車第一個女乘客，我唔記得點，只知我約佢接完佢之後就車左佢去旺角，係米睇戲我已經唔記得了，我只記得最後我地去左九龍城食糖水...我地傾左好多嘢，唯獨佢嘅戀情我地無傾，我知道呢D係我地兩個嘅禁忌...嗰一晚，係我自識佢以來我最開心嘅一晚...
有無數個晚上，我會駕部車，去佢屋企對面泊低部車，播住光良首第一次
當你看著我 我沒有開口 已被你猜透
還是沒把握 還是沒有符合 你的要求
是我自己想得太多 還是你也在閃躲
如果真的選擇是我 我鼓起勇氣去接受
不知不覺讓視線開始 閃爍
再望下佢屋企，睇下佢熄左燈瞓左未，去感受那種寧靜同回憶...
水泡
其實我對菲只有留戀無乜期望，因為我已經知道佢唔會擇我，只係我依然未能放低...
公司嚟左個MK文員，叫黑妹，佢好好傾，冇耐我地開始有D曖昧...我覺得其實我唔會鐘意佢呢類形嘅女仔，不過有時候唔知點解，佢可能好樂天好陽光，而我嗰時已變到好宅，返工放工屋企返工放工屋企咁過...
佢令我開始感到...我想有人愛我，而不是我無限咁付出...
我曾經問過黑妹佢有冇男朋友，佢答無，我就好似豁出去咁想同佢發展...
愛係會令人盲目，我個好好上司問我
「...你係米同黑妹拍拖...總之小心D啦...」
我真係冇理會到...
只知黑妹合約完左唔再贖約...
全公司好多同事都知道我地兩個有D野...
不過除左我上司外，無人敢出聲...
佢合約完一晚我地一班同事同係銅鑼灣海旁警察俱樂部同佢fairwell，佢俾左張一家人嘅相俾我地睇，其中有一個佢話係佢契哥，嗰晚我同佢兩個行海旁，打算經那條好隱蔽嘅隧道去世貿中心，我送左份禮物俾佢，同佢表白...
「...我同你一齊好開心...你可唔可以做我女朋友...」
「...永記，我同你一齊都好開心，你好好，好錫我，不過我唔係你想像中咁好...我好複雜...我唔想害左你...」
「...我唔介意...」
最後佢都冇收我份禮物
之後我地每天都通電話，好似以前一樣
佢自己係黃埔附近開左間時裝店，但又唔俾我去舖頭...
佢話俾我知，自己一個人上大陸入貨
我打俾佢時佢係到喊，係到話好驚...跟住收左我缐，亦唔肯聽我電話...
「...你無事麻...你嚇死我啦...」我緊張地問
「...我無事啦，你唔好再搵我啦，我唔啱你架...」佢係到喊
「...發生乜野事呀？」
佢死都唔肯講，最後佢至講
「...我有左契哥個BB，佢要我上深圳落左佢，得我一個人好驚唔敢落，番返落嚟，我阿媽知道後迫佢同我結婚呀...你唔好再搵我啦...」佢喊住咁講
我已經不懂得反應去應付咁複雜嘅野，我黙然咁慢慢放低聽筒...這是我兩最後一次通話...
我係度諗，究竟係佢想搵我做佢水泡，還是我想搵佢做我個水泡去取代菲菲...
直到數年後嘅某日，我見到有個男人抱住個好可愛嘅女孩，而黑妺隻手就撓住個男人嘅手，我相信佢已經搵到佢嘅幸福...
而我仍在尋尋覓覓...
司機
在戀愛嘅世界裡，點解會咁複雜，唔係一男一女好坦誠咁相愛架咩，這令我又留戀菲菲嘅簡單同純真...
我毒㽼又發作，每天放工後又行瑞和街了...
而我最後都轉了工...
一來我可能怕公司嘅閒言閒語
二來我相信男人係要出去捱
唔想一世做文員仔
而菲菲，佢都好犀利，自己係九龍灣供左層樓租俾人...
有時約佢出來食晏，講下大家近況，我地已經可以担然講任何嘢，只知佢男友當時仲讀緊書，同男朋友去左幾次旅行，有時男朋友亦有對佢唔好嘅時候，雖然我有D葡萄，不過已經無咁痛，只係我戒唔到我嘅毒㽼...
我不斷讀書，希望事業有D起色，係某大學報左個Diploma course，班入面分老野同後生，老野嗰班已經係高級主任或經理之類，我地呢D後生嘅大部分都係小薯仔...老野根本睇唔起我地...通常老野最扮野，最多問題問所以鐘意坐最前，而我地後生坐最後最好唔好俾教授見到...
返學第一日我已經坐到好後，突然間有個好靚嘅女仔坐埋嚟...
「...Hi, 我係dada...」
「...Hi, 我係永記...」
放學後我地後生一班人坐地鐵...
各人都介紹自己嘅職業
原來dada係做秘書，兼職做model，佢係上海出世，但兩歲已經嚟左香港，所以佢講到一口流利嘅上海話。
第二堂佢都坐係我傍邊
「...dada，你可以俾個手提我麻？」
佢即刻寫左落我份note到，
我都俾番個手提佢
之後每堂我都會同佢霸位
有一次，其中有幾個男同學提議放學後一齊食飯，我地一行十幾人去左又一城rain forest食飯，係酒精影響下，我地𣈱所欲言...之後我同dada有無盡嘅話題
無耐，我買左車，可以車dada返學放學，有一晚放學校dada同其他兩位女同學問我有乜野做，我話不如出去食飯，食完飯後
「有冇下場」dada問
「不如去我屋企打通宵麻將」
「會唔會左住你屋企人呀」
「我爸媽返左大陸，冇人」
「好野」
「嘩，三娘教子，我唔識計番，你地米食左我」
嗰晚一路打一路傾計，不過好正經無下文，最後凌晨三點幾車曬佢地番屋企。
再下一堂我地放學後又去左唱K
不過有一日佢冇上堂，我有D失落，於是我打俾佢
「我今日唔得閒，因為我幫雜誌影左輯相，不過唔知幾時登」
某日，我見到有份雜誌封面見到佢，我上堂時俾佢
「下，登左啦，點解你知嘅...」
「...你話我知架麻，我留意左好耐啦，俾你吖」
原來佢自己都唔知登左出來...當然我自己買左本俾自己留念...
「...都影得唔靚...」do咀
「...唔係吖，好靚呀，不過無真人咁靚之麻...」佢打左我一下...
不過無耐佢無番幾堂，佢唔講我知原因，雖然D女同學係咁叫我追佢，但我直覺開始覺得佢不是咁簡單，因為有時佢坐我車時講電話會用上海話...
有一次佢同我講
「永記，其實如果唔係因為有好大件事，我已經結左婚...」
我唔知佢當時想同我表達D乜，我只知道其實佢好多野我係唔知道，有次我送花去佢屋企佢都唔肯收...有時失左踪咁
可能...佢只當我係佢嘅...司機
最後佢無考試所以畢唔到業...
我好驚歷史重演，我知我一定接受唔到...
所以畢業後，我連手提電話號碼都轉埋，直到冇幾耐之後有一天早上八點左右佢打來
「有冇攪錯，轉電話號碼都唔話俾我知，你當我係乜...」
我唔知佢點解知道我新手提號碼，但我已經唔想了解，我只知道我再應付唔到咁複雜嘅關係
因為...我已經好怕再受傷...
我説過要你快樂
某日菲菲約我係康寧道晨光大廈嗰間Pizza Hut食晏，除左傾下近況，原來佢男朋友依家做X光師，之後佢同我講
「...永記，我結婚啦，你會來飲麻...」
「...恭喜你呀，你寄張帖俾我，我一定到...」
我對菲菲嘅感覺已經沒有痛了，因為...
我都認識到女朋友，就係我太太，佢好簡單，坦率直接又野蠻，不過我鐘意，我知道佢真心真意亳無保留咁對我好...所以我好錫佢
最後我都去左佢嘅婚宴
「...阿業，過來同我好朋友影張相，佢叫永記...」阿菲介紹
我影完相之後無坐低飲便離開...
這是我同菲菲最後一次見面，雖然佢寄番張相俾我，不過菲菲所有野我都冇保留了，因為我覺得...我地呢段數年嘅關係，呢個時候係要結束了，而背後守護同關顧佢嘅責任就由佢老公嚟接手罷...
有朋友問我點解仲去佢嘅婚宴，因為...我希望我同佢係呢個人生入面有一個有開始同有終結...一個比較完整嘅回憶...
我有時會諗，如果係佢分抄後同作表白，而佢又接受嘅話，我應該同佢結左婚了，而我嘅人生就會不一樣，不過呢個世界係無如果，可能我無呢同佢一齊嘅福氣...而我可能只係佢生命之中一個過客...
好似吳國敬有一首歌，我說過要你快樂
生命似無數連續細小故事
即使傷心了一次 再有更多夢兒
想著你 才會明白許多世事
得不到的一些愛 卻永遠埋藏深處
今天生活似寫意 我也似忘掉往事
你那影子退出了 誰人知
在我心中的愛意
我說過要你快樂 讓我擔當失戀的主角
改寫了劇情 無言地飄泊
我說過要你快樂 換你一生開心的感覺
原諒我 原諒我 求原諒我
今日我還有許多許多故事
當中一位女主角 與你有些相似
消逝了 時間磨滅許多往事
得不到的一些愛 卻永遠埋藏深處
我說過要你快樂 讓我擔當失戀的主角
改寫了劇情 無言地飄泊
我說過要你快樂 換你一生開心的感覺
原諒我 原諒我 求原諒我
只有咁樣我才可無憂無慮咁迎接新的戀愛，去尋找我嘅幸福...
我好喜歡光良有一首歌童話
忘了有多久 再沒聽到你
對我說你 最愛的故事
我想了很久 我開始慌了
是不是我又做錯了什麼
你哭著對我說 童話裡都是騙人的
我不可能 是你的王子
也許你不會懂 從你說愛我以後
我的天空 星星都亮了
我願變成童話裡 你愛的那個天使
張開雙手 變成翅膀守護你
你要相信 相信我們會像童話故事裡
幸福和快樂是結局
你哭著對我說 童話裡都是騙人的
我不可能 是你的王子
也許你不會懂 從你說愛我以後
我的天空 星星都亮了
我願變成童話裡 你愛的那個天使
張開雙手變成翅膀守護你
你要相信 相信我們會像童話故事裡
幸福和快樂是結局
我要變成童話裡 你愛的那個天使
張開雙手 變成翅膀守護你
你要相信 相信我們會像童話故事裡
幸福和快樂是結局
我會變成童話裡 你愛的那個天使
張開雙手變成翅膀守護你
你要相信 相信我們會像童話故事裡
幸福和快樂是結局
一起寫我們的結局
數年後，某日經過APM時，我遇見菲菲拖住個小男孩，而可能我已變成一個幸福嘅男人（唔係變左肥佬），所以佢已經唔認得我了，不過我冇上前打招呼，因為我唔想騷擾佢嘅幸福...佢嘅生活...
而我...就已經成為了我太太身邊嘅天使，佢嘅王子...《完》
後記
我第一次寫文章，好多錯別字不時咁修正，不喜勿插。
寫這篇文章，係因為我係紙言睇到一篇文，其中一段令到我有D感受...
「有好多人...或者係你生命中嘅過客。佢哋令到我哋成長... 令到我哋明白一啲事，可能你因為佢而受傷，而好嬲佢，嬲佢從此令佢再無辦法愛上第二個人。但係 我哋又有冇諗過，當你傷心嘅時候......其實佢...可能比你更傷心，佢可能想同你講出內心個一句輕狂 嘅說話，同你講就算全世界反對，都要同你喺一齊......但係到最終，我哋會發現，現實始終係現實， 不過，因為妳，我終於都經歷一切、感受到一切......學陳奕迅首《明年今日》講，餘生都不會再悲哀。」
戀愛係人生嘅經歷，有D人經歷多D，有D人少D，有D人會痛D傷D，有D人好幸福唔會痛，這些都會令你成長，希望你地都找到你嘅幸福...
永記
