關愛座由兩個變四個，
對我來說不是什麼，因為搭地鐵已經預左要企
近年甚至有位都唔敢坐（講緊非關愛座）
因為香港地鐵既多人程度，真係隨手要執到幾十個比您更需要坐的人
於是，為免坐低左又要時刻警覺有無人要讓座，就索性不要坐了。
（that's why我憎搭地鐵，搭巴士坐上層輕輕鬆鬆唔洗理咩讓座）

講起讓座，令我諗起睇過文章話日本人讓座文化好低
佢地有關愛座，但坐了非關愛座既人好少會讓位畀老人家
話係因為讓座呢個行為代表您覺得對方係老人係有需要人士
反而係唔禮貌既行為。而且日本老人家都不會覺得年輕人一定要讓座畀自己

而香港，（或中國同台灣都係）唔讓座就是原罪！

然後我只覺得，香港有部分老人家真係，真係好鍾意持老賣老。

我體諒亦明白老人家比年輕人更需要座位呢個生理條件
不過.. Don't take it for granted!
讓座是義務，不是理所當然
而不讓座跟個人質素沒有絕對關係。

加推關愛座，您有反對的理由嗎？
沒有。因為關愛座本來是個帶著正義善良禮貌既產物
您沒有理由反對這種東西，因為反對就等於唔讓座一樣，係賤人。

而話說回來，我真係好憎啲人持老賣老
最常見到人持老賣老就係排隊既時候
我經歷過好多次，好L多次，排排下隊畀老人家打尖既情況
試過買菜同個師奶一齊等緊老闆畀錢，

然後有個婆婆係後面笑笑口話：啲蕃茄幾靚喎
然後一野行左去我同個師奶既前面，眼尾都無望過啲蕃茄就畀左錢走人

又試過好多次排隊搭巴士，明明成條隊喺到排緊，白內障都睇到咖啦
啲阿伯阿婆都係會無懼世事變改，企喺隊頭等車。

我相信，每個經歷過既年輕人都係心諗
「算啦，佢幾廿歲唔通我鬧9佢咩，鬧佢人地以為我怡阿婆呀」
我自己都係。我唔敢出聲，因為我唔想畀人拍片放上網

有時我會諗，我爸媽都開始老了，
將心比心，我都好想去尊重老人家，
可是，要年輕人尊重之前，希望您先做番個值得尊重既老人家。
/
Facebook: https://www.facebook.com/hkgirlfriend/
ig: hkgirlfriend