有無發覺，人越大，就越少朋友。
講起上黎你會覺得好奇怪，明明中學畢業之後，識既人越黎越多，但係，朋友就越黎越少。
中學畢業之後，有人讀大學，有人讀副學士，有人讀高級文憑，有人做野，或者讀其他課程。
係唔同既場所，明明會識到一班新朋友，但係又有時偏偏覺得，呢班新朋友，唔夠。
唔夠之係點？我都唔係好識形容，但就硬係覺得，差少少野。
或者差左日對夜對，或者差左年月既洗禮，或者差左其他等等……
當開始懷念中學個種日子既時候，想聯絡佢地出黎食餐飯既時候，就會慢慢發現，佢地，都開始走入唔同圈子。
「我要同大學班fd re-u 呀，下次先啦。」
「我約左roommate打機呀，下次先啦。」
「我約左女朋友呀，sor呀，下次先啦。」
原來，大家既圈子，再唔係同一個圈子。雖然你自己都有一班大學既朋友，但就偏偏會，去羨慕中學班死黨。
或者你羨慕既並唔係個班兄弟，而係班兄弟新識既朋友。
然後，再過多幾年，大家都相繼讀完書，開始投身社會，就開始發覺，每一個朋友都好難約。
一個群組入面，越黎越少人講野，有時會講既，可能只係一兩句生日快樂。
約食飯既時候，唔知又點解，越黎越少人會應機。久而久之，你自己都廢事自討沒趣。
慢慢地，慢慢地，一個二個group都變成死group。當初中學仲有聯絡既，可能得返個班一齊扮病逃學去網吧打機既手足。
當初團結一致搞班會活動既三四十人，已經再無聯繫既橋樑。
就係咁，明明識既人越黎越多，面書朋友數字不斷上升，但又，越黎越少朋友。
身下既影，越黎越大。排山倒海既寂寞令你無處可逃。
然後，有幾多人選擇，寄情工作，藉此麻痺自己既感覺。
或者，你我所追求既，只係中學個種純真，純粹。大家就係大家最好既朋友，一班人就好似一家人既個種感覺。
但偏偏，永遠無可能搵得返。
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
更多文章/ 即時updates >>>> https://www.facebook.com/nlsr54604/
多一個like，多一點鼓勵，感激不盡！
