幾年前認識左一位朋友,識左佢一啲好處都冇。
我係佢身邊既存在,就好似為左襯托出佢多朋友。
識佢既時侯,佢多次強調唔會話我聽佢既真正身份係咩。個時好好奇,佢唔通係特務?chokchok下終於知道,原來佢係一間中港公司既老闆.......個仔。無錯,只係人地個仔姐
初時識佢,佢好努力打開話題。知道我鍾意影相,話自己既uncle係canon高層,買咩都有八折,可以幫我買相機。而佢係喺外國讀書返黎,表示自己好多同學條件好好,要介紹我識。
之後大家contact唔多,佢有時會打俾我,講黎講去都係幾樣,有邊幾個女仔好似暗戀佢,人地點樣襯佢唔起。令我都唔係好想聽佢電話。
你以為大少爺實好多女啦,點知佢每次搞埋啲三唔識七既活動,都會不停問我地可以幫佢帶到幾多女去。其實我自己都唔想去,況且我又唔係做馬伕既,做咩要幫你帶囡囡呢?
雖然contact唔多,但大少爺一年一度既生日,一定會開個whatsapp group,加哂我地入去,簡間餐廳,要我地請佢食飯。次次食飯埋個張單仲貴過俾人情, that means識左大少爺之後,我每年就好似最少要俾一次人情咁。但每次我地生日,大少就會忙到連一句生日快樂都冇。
有一日,我諗住買相機,就問下佢係咪有折,然後佢缓緩道出其實佢uncle好忙,買唔夠三四萬既話,佢唔好意思問佢拎折。唉,我好窮,我問唔起。
最近,同大少結束左幾年既友情短跑,我個心好舒服。
朋友,確實分好多種,即使係酒肉朋友,都要玩得開心。每個人身邊都總會有啲朋友, 每次搵你都係為左炫耀自己,你地傾計有時好似自說自話, 有時你地既對話可以完全冇連接性。而有一種人承諾你既野,可能未必太認真,只係為左建立一時既關係, 即係r friend。r得一時,r吾到一世。
